17°C , Partly cloudy | Kigali-Rwanda

Nyagatare: Amarerero  1925 agenerwa ritiro  7000  z’amata ku munsi

Yanditswe na Twagira Wilson

Ku ya 13-02-2020 saa 08:57:38
Amata afitiye akamaro umubiri w'umuntu by'umwihariko ku bana, atuma bagira ubuzima bwiza bagakura neza

Mu rwego rwo kurwanya imirire mibi,  abaturage bo mu karere ka Nyagatare by’umwihariko abagenerwabikorwa muri gahunda ya Leta yo kurwanya imirire mibi n’igwingira mu bana, barashima iyo gahunda  kuko ituma abana babo bahabwa amata bavuga ko atuma ubuzima bwabo buhinduka bukaba bumaze kuba bwiza.

Abo baturage baravuga ibyo mu gihe muri ako karere hatangwa ritiro ibihumbi birindwi z’amata ku munsi mu ngo mbonezamikurire cyangwa amarerero (ECDS) agera ku 1925 ari hirya no hino muri imwe  mu mirenge yo muri aka karere. Ni amata agenewe abana bari munsi y’imyaka itandatu y’amavuko.

Icyo gikorwa cyo gutanga amata mu karere ka Nyagatare cyatangiye mu kwezi kwa cumi n’abiri k’umwaka ushize wa 2019, kugeza ubu ni igikorwa kibanda ku kuyaha abana bari munsi y’imyaka itandatu bavuka mu miryango itishoboye. Ni gahunda kuri ubu ikorerwa mu mirenge ikenda kuri 14 igize akarere kose.

Ikigamijwe aha ni ukurwanya imirire mibi  n’igwingira muri aka karere, akaba ari nayo mpamvu hashyizweho amarerero afatwa nk’ingo mbonezamikurire aho binyuze muri aya marerero abana bahabwa amata mu masaha y’akaruhuko ku bari ku ishuri. Ku bataratangira ishuri bo ababyeyi babo bajya kuyafata ku makusanyirizo abegereye.

Bamwe mu babyeyi  barimo  Mukamunana Mary na Mutesi Sumaya  bo mu murenge wa Karangazi bavuga ko igikorwa cyo guha abana amata ari kiza. Mukamunana ati  «Kuko badakura gusa ku mubiri ahubwo ko no mu bwonko bihinduka bakagira ubuzima bwiza».

Leta y’u Rwanda ibinyujije muri gahunda yayo mbonezamikurire y’abana bato NECDP yishingira ikiguzi kuri ayo mata, ni mu rwego rwo kurwanya imirire mibi mu bana bato batarengeje imyaka itandatu kuko ngo bifite ingaruka mbi ku mikurire yabo.

Mu rwego rwo kurushaho kunoza iyi gahunda, Ubuyobozi bw’Akarere ka Nyagatare buvuga ko muri ako karere hagiye kongerwa umubare w’aya marerero  ku buryo azagera no mu yindi mirenge itanu isigaye idafite amakusanyirizo hafi, nkuko  bivugwa na Gatete Katabogama Michael ushinzwe gahunda y’imbonezamikuririre ku bana bato na porogaramu zo kurwanya imirire mibi mu rwego rw’Akarere ka Nyagatare mu Ntara y’Iburasirazuba.

Ingengo y’imari y’amafaranga miriyoni zisaga magana atanu kuri ayo mata ni yo atangwa muri iyi gahunda yo kurwanya imirire mibi mu bana batarengeje imyaka itandatu mu karere kose.

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.