Nyagatare: Ababyeyi basabwe kugabanya kunywa inzoga

Yanditswe na Kayitare Jean Paul

Ku ya 14-08-2019 saa 18:56:17
Mushabe Claudian David, uyobora Akarere Nyagatare anenga abagore banywa inzoga agasaba ko bareka kuzinywa

Ubuyobozi bw’Akarere ka Nyagatare mu Ntara y’Iburasirazuba burasaba abagore kureka cyangwa kugabanya kunywa inzoga kuko zituma bakora ibidakorwa. Bamwe mu babyeyi muri ako karere bo baravuga ko ubusinzi mu bagore bagenzi babo bumaze gufata indi ntera.

Aba babyeyi bahamya ko hari imyitwarire itari myiza irimo kuranga bagenzi babo, aho ngo umugore asinda akaba yakwiyambika ubusa cyangwa akajya ku gasozi agatuka umuhisi n’umugenzi.

Ku rundi ruhande, Umuyobozi w’Akarere ka Nyagatare Mushabe Claudian Divid, yavuze ko bagiye gushaka uko baganiriza abo bagore bakareka ubwo businzi n’ibindi bikorwa bibambika isura mbi aho batuye.

Mushabe yagize ati “Abo bagore tugiye kubegera tubahugure kugira ngo bagabanye ubusinzi no gusebya umuryango nyarwanda. Ni ba mutima w’urugo bakwiye gukora ibijyanye n’indangagaciro zabo kandi natwe tuzakomeza tubaganirize nk’uko nabivuze tubinyujije mu mugoroba w’ababyeyi, mu bikorwa by’umuganda n’ibindi bikorwa bihuza abaturage.”

Kangabe Joyce utuye mu Murenge wa Rukomo, yabwiye Imvaho Nshya ko bagiye gukebura bagenzi babo banywa inzoga bagasinda kuko ngo bituma barushaho kwiyandarika, ikindi ngo ubwo businzi bushobora kuba intandaro y’amakimbirane mu miryango.

Ati “Iyo ababyeyi bakomeje kunywa inzoga bene aka kageni biba intandaro y’amakimbirane mu muryango. Icyo tugiye gukora nk’inzego z’abagore by’umwihariko mu nama nkuru y’igihugu y’abagore, tugiye kubegera tubakebure bityo bareke kwiyandarika banywa inzoga mu buryo budakwiriye Mutima w’Urugo.”

Rwisereka Ngaboyisonga Fred ahamya ko iyo umugore agiye mu kabari akanywa agasinda, ngo umuryango muri rusange urahazaharira kuko ubusanzwe uba ushingiye ku mugore nka Mutima w’Urugo.

Avuga ko ibiyobyabwenge bituruka mu gihugu cya Uganda bikinjizwa mu Rwanda kandi bitemewe usanga n’abagore babinywa bigatuma basinda cyane bigatuma batuka abihisi n’abagenzi.

Yagize ati “Ibiyobyabwenge bituruka Uganda bikinjizwa mu Rwanda kandi bitemewe bigira ingaruka zitari nziza by’umwihariko ku bagore babinywa bigatuma biyandarika bagatuka umuhizi n’umugenzi. Umuryango ntushobora gutera imbere ufite umugore usinda kuko burya iterambere ry’umuryango ni we rishingiyeho. Abayobozi bacu babikurikirane kuko si byiza kubona umugore wa Nyagatare wasinze.”

Gatete Beatha, umubyeyi urerera mu karere ka Nyagatare yavuze ko ubusinzi bukabije mu bagore kandi bukaba buri kwangiza umuryango nyarwanda.

Yagize ati “Kubona umubyeyi uri kunywa agasinda, akaba yakwiyambika ubusa akanatuka umuhisi n’umugenzi, si ibintu byiza. Igitangaje ni uko abana na bo bamaze kwigana ababyeyi babo bakaba bamaze kumenya gutukana, hatagize igikorwa umuryango nyarwanda wakwangirika.”

Akarere ka Nyagatare gaherereye mu Burasirazuba bw’u Rwanda, ni kamwe mu turere turindwi tugize Intara y’Uburasirazuba kakaba gakunze kugaragaramo ibiyobyabwenge birimo kanyanga, urumogi n’inzoga zitemewe zizwi nka zebra waragi n’izindi.

Ahanini biturutse ku miterere y’Akarere ka Nyagatare aho gahana imbibi n’ibihugu bibiri by’abaturanyi ari byo Uganda na Tanzania, biroroha kuhanyuza ibiyobyabwenge. Kugira ngo ibi bihagarare, birasaba uruhare rwa buri muntu.

Umwanditsi:

Kayitare Jean Paul

Tanga Igitekerezo

Email yanyu ntigaragazwa ku rubuga. Amazina na Email ni ngombwa.