17°C , Mostly cloudy | Kigali-Rwanda

Nyabihu: Umumotari yafatanywe urumogi ashaka gutema abapolisi

Yanditswe na Imvaho Nshya

Ku ya 29-11-2020 saa 09:05:40

Ku wa Gatanu tariki ya 27 Ugushyingo 2020, mu Karere ka Nyabihu, mu Murenge wa Mukamira hafatiwe umumotari witwa Niyonzima François w’imyaka 34 usanzwe ukorera mu Mujyi wa Musanze ahetse ibiro 30 by’urumogi arukuye mu Karere ka Rubavu, ahagaritswe arwanya abapolisi ku buryo yagerageje no kubatemesha umuhoro yari afite.

Umuvugizi wa Polisi mu Ntara y’ Iburengerazuba, Chief Inspector of Police (CIP) Bonaventure Twizere Karekezi, yavuze ko uyu momotari Niyonzima yafatiwe mu bikorwa byateguwe na Polisi kuko hari amakuru yizewe bari bafite ko ajya atwara urumogi arukura mu Karere ka Rubavu.

Yagize ati: “Niyonzima utuye mu Murenge wa Kinigi mu Karere ka Musanze, usanzwe ukorera umwuga wo gutwara abagenzi kuri moto mu Mujyi wa Musanze, twari tumufiteho amakuru ko iyo moto ye ajya anayikoresha mu gutwara ibiyobyabwenge. Ku wa Gatanu rero ni bwo twamenye ko avuye mu Karere ka Rubavu ahetse imifuka ibiri kuri iyo moto ye bikekwa ko ari urumogi.”

Abapolisi bahise bamutegerereza mu Murenge wa Mukamira wo mu Karere ka Nyabihu. Ahageze, bamuhagaritse yanga guhagarara, ahubwo ashaka kubagonga.

Ati: “Yari ahetse imifuka ibiri kuri moto, ariko imibare iranga ikinyabiziga (pulake) yari yayisize ibyondo kugira ngo itagaragara. Kandi yari anafite n’umuhoro. Yageze ku bapolisi baramuhagarika aranga agonga n’ibyuma bari bashyize mu muhanda ariruka, abapolisi bahise bajya mu modoka baramukurikira. Abonye ko bamukurikiye, ahambura umufuka umwe muri iyo yari ahetse awutura hasi mu muhanda kugira ngo imodoka y’abapolisi iwugonge igwe hasi abone uko acika, ariko ntibyamuhira aza gufatwa ku bufatanye n’abaturage bamutangatanze. Yaje kuva kuri moto, afata wa mupanga ashaka gutemana abapolisi, bahita bamufata.”

Umuvugizi wa Polisi mu Ntara y’Iburengerazuba avuga ko bakimara gufata Niyonzima basanze muri iyo mifuka ibiri yari atwayemo urumogi rungana n’ibiro 30, ngo akaba yari arukuye mu Murenge wa Bugeshi ahitwa Kabukombe, akaba kandi ngo yari ari kumwe na nyirarwo Nshimiyimana Dieudonnée wo mu Mujyi wa Kigali, wari uri kuri moto yindi imbere ye agenda amurebera inzira. Ariko ngo ubwo yageraga kuri abo bapolisi bari i Mukamira, shebuja uwo nta bo yabonye agahita yikomereza.

CIP Karekezi akomeza avuga ko kugeza urwo rumogi mu Mujyi wa Kigali, uyu mumotari yari arutwariye amafaranga ibihumbi 40 y’amafaranga y’u Rwanda, akaba ngo ari ubwa kabiri yari arushyiriye Nshimiyimana.

Niyonzima yahise ashyikirizwa Urwego rw’Igihugu rushinzwe Ubugenzacyaha (RIB) rukorera kuri Sitasiyo ya Polisi ya Mukamira kugira ngo akorweho iperereza.

Umuvugizi wa Polisi mu Ntara y’Iburengerazuba yibukije abakoresha ibiyobyabwenge mu buryo bwose ko bitazigera bibahira kuko amayeri yose bakoresha Polisi itazabura kuyatahura abagira inama yo kubicikaho bakareba indi mirimo yemewe n’amategeko bakora.

Niyonzima François yatwaye urumogi anitwaje umuhoro yifashishije agerageza gutema abapolisi

Ibindi biro 72 by’urumogi byafashwe biturutse i Burundi 

Uretse urwo rumogi rwafatiwe muri Nyabihu, Ku wa Gatandatu na bwo Polisi y’u Rwanda ikorera mu Karere ka Kirehe na yo yafashe imifuka ibiri irimo ibiro 72 by’urumogi, bituma urwafashwe mu mpera z’iki cyumweru rugera ku biro 102.

Urwo rumogi rwafatiwe mu Murenge wa Gahara ku mugezi bivugwa ko rwari ruturutse mu gihugu cy’abaturanyi cy’u Burundi.

Umuvugizi wa Polisi mu Ntara y’Iburasirazuba, Chief Inspector of Police (CIP) Hamdun Twizeyimana, avuga ko ruriya rumogi rwafashwe biturutse ku makuru yatanzwe n’ubuyobozi bw’Akagari ka Murehe.

Yagize ati: “Ubuyobozi bw’Akagari bwari bufite amakuru ko hari Abarundi bari bwambukane urumogi banyuze ku cyambu cy’u Burundi kitwa Nyankurazo. Abapolisi bahise bajya aho byakekwaga ko ari ho barwambukiriza, bakomeje gutegera aho baza kubona abagabo 4 baje bikoreye imifuka ibiri, babiri bayikoreye abandi babiri babashoreye. Nuko bambutse bageze mu rufunzo, bikanga abapolisi barukubita hasi biruka basubira iwabo.”

CIP Twizeyimana avuga ko urwo rumogi barupimye bagasanga ni ibiro 72.

Ingingo ya 5 y’Iteka rya Minisitiri Nº001/MoH/2019 ryo ku wa 04/03/2019 rigena urutonde rw’ibiyobyabwenge n’ibyiciro bya byo, rishyira urumogi mu biyobyabwenge bihambaye.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranyije n’amategeko, aba akoze icyaha.

Iyo abihamijwe n’urukiko igihano kiba igifungo cya burundu n’ihazabu y’amafaranga y’u Rwanda arenze miriyoni makumyabiri (20,000,000 Frw) ariko atarenze miriyoni mirongo itatu (30,000,000 Frw).

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.