22°C , Mostly sunny | Kigali-Rwanda
Imihanda yo muri Sashwara ubu irimo Laterite bituma imodoka zigenda neza (Foto Ngaboyabahizi P).

Nyabihu: Umuhanda Sashwara-Kalisimbi-Kabuhanga wakuye abaturage mu bwigunge

Yanditswe na Ngaboyabahizi Protais

Ku ya 11-07-2019 saa 14:28:58

Abaturage bo mu mirenge ya Jenda na Kabatwa mu Karere ka Nyabihu bakoresha umuhanda Sashwara–Kalisimbi-Kabuhanga, barahamya ko uyu muhanda bubakiwe wabakuye mu bwigunge, iterambere ryabo rikarushaho kwihuta.

Aba baturage bahamya ko mbere y’uko uyu muhanda wubakwa wari umeze nabi cyane, kubera ibinogo byaterwaga n’imivu y’amazi. Kuva aho wubakiwe ngo ibikorwa byabo byarushijeho kugira agaciro.

Uyu muhanda ureshya na km 18. Nziyimfura Joseph, umwe mu baturage bawukoresha, aganira n’Imvaho Nshya yagaragaje ko uri mu by’ibanze byari byaradindije iterambere ryabo.

Yagize ati: “Uyu muhanda utarakorwa nkatwe b’abahinzi twari twarahombye kuko baravuga ngo umuhanda ni mubi imodoka ntiyagerayo bakatwishyura amafaranga ijana ku kiro k’ibishyimbo, ariko kubera ko uyu muhanda wabaye nyabagendwa urimo laterite, imodoka zigera neza ku mirima yacu, ikibanza cyaguraga ibihumbi 200 ubu kiri kuri miliyoni 2 kuko hari n’amashanyarazi”.

Uyu muhanda abaturage bishimira uhuza akarere ka Nyabihu, Rubavu ndetse na Musanze, uretse kuba warongereye ubuhahirane hagati y’utu turere, ukanazafasha na ba mukerarugendo gusura Pariki y’Igihugu y’ibirunga.

Umuyobozi w’akarere ka Nyabihu Mukandayisenga Antoinette, asaba abaturage bakorewe uwo muhanda kuwubyaza umusaruro, kandi bakawubungabunga kugira ngo uzarambe.

Yagize ati: “Uyu muhanda uduhuza n’uturere twa Musanze na Rubavu, kuko ugera no kuri Parike aho abakerarugendo banyura nge nabasaba gukomeza guhanga imirimo harimo ubukorikori, kuko byagurwa n’abo bakerarugendo.

Abasore bagure za moto, abahinzi nabo bagure imodoka kugira ngo bageze umusaruro wabo ku isoko kuko ubu byaroroshye umuhanda nta kibazo umeze neza”.

Mu ngengo y’imari y’umwaka wa 2018-2019 mu karere ka Nyabihu hakozwe imihanda ireshya na kirometro zigera kuri 32 itwara akayabo ka miliyari 1 na miliyoni magana ane z’amafaranga y’u Rwanda mu gihe mu mihigo ya 2019-2020 akarere ka Nyabihu kateganyije gukora imihanda ireshya na km 109.

Imihanda yo muri Sashwara ubu irimo Laterite bituma imodoka zigenda neza (Foto Ngaboyabahizi P).

TANGA IGITEKEREZO

Leave a Reply

Your email address will not be published. Required fields are marked *