20°C , Partly sunny | Kigali-Rwanda
Iri shuri rigezweho barihawe na Perezida Paul Kagame (foto Ngaboyabahizi P)

Nyabihu : Abaturage barashimira Perezida Kagame wabahaye ishuri ry’imyuga

Yanditswe na NGABOYABAHIZI PROTAIS

Ku ya 10-01-2018 saa 12:51:11

Abaturage bo mu karere ka Nyabihu barashimira Perezida Kagame wabahaye ishuri rigezweho ry’imyuga, ryanatumye bahabwa imirimo mu gihe cyo kuryubaka.

Iri shuri ry’imyuga, abaturage baryemerewe n’Umukuru w’Igihugu mu mwaka wa 2014 ubwo yabasuraga.

Iri shuri rigezweho barihawe na Perezida Paul Kagame (foto Ngaboyabahizi P)

Kalimba Zachée, ni umuturage wo mu murenge wa Mukamira aho iri shuri ryubatse, yagize ati : « Ndashimira Perezida Kagame watekereje kuduha ishuri rikuru ry’imyuga, ni imbuto z’imiyoborere myiza.

Iri shuri ni igikorwa kije kongera iterambere hano mu murenge n’akarere kacu muri rusange. Batangira kuryubaka nahabonye akazi, ubu nizigamiye amafaranga umwana wange azajyana ku ishuri muri uyu mwaka 2018, nakuyemo amatungo, nta terambere rirenze iri.

Yakomeje avuga ko iri shuri ry’imyuga rigezweho rije ari igisubizo ku bana babo. Ati « Abana bacu bazigiramo guhanga umurimo no kuwukunda mu gihe bajyaga kwigira za Kigali, Goma n’ahandi ».

Uyu mugabo yongeraho ko ngo iri shuri rizatuma babona aho bacururiza umusaruro wabo mu buhinzi n’ubworozi, ikindi ngo amacumbi bagiye kuyubaka ku bwinshi ngo kuko bazajya babona abayakodesha. Abafundi na  bo bemeza ko ngo muri ririya shuri bazahihugurira imirimo inyuranye.

Umuyobozi wungirije w’Akarere ka Nyabihu ushinzwe imibereho myiza y’abaturage Mukansanga Clarisse; yagize ati: « Iri shuri twaryemerewe na Perezida wa Repubulika ubwo yadusuraga muri 2014, none urabona ko ryuzuye. Iki ni igikorwa gishimishije cyane kuko abana bo muri aka karere bagiye kujya bigira hafi kandi bakiga imyuga igezweho, bagiye kujya babyaza umusaruro ibikomoka ku musaruro w’ibihingwa biboneka hano muri Nyabihu, gutegura neza ibiribwa n’ibinyobwa, urabona ko muri kano gace hera ibirayi n’ibigori tubitezeho rero kuzabibyaza umusaruro nyuma y’amasomo bazahabwa muri iri shuri.

Ndasaba ababyeyi gutoza abana babo umuco mwiza wo gukundisha abana babo iri shuri, kuko ni iryabo bige imyuga izabateza imbere ».

Biteganyijwe ko iri shuri ry’imyuga rizafungura imiryango mu ntangiriro za Gashyantare  2018, n’abanyeshuri basaga 300.

TANGA IGITEKEREZO

Leave a Reply

Your email address will not be published. Required fields are marked *