23°C , Mostly cloudy | Kigali-Rwanda

NURC yagaragaje imbogamizi zikibangamiye kugera ku bumwe n’ubwiyunge 100%

Yanditswe na Mutungirehe Samuel

Ku ya 08-11-2019 saa 07:57:00
Komiseri Umubyeyi Marie Mediatrice ahamya ko umwaka utaha Abanyarwanda bose bazaba babanye mu bumwe n'ubwiyunge 100% (Foto Samuel M)

Komiseri muri Komisiyo y’Igihugu y’Ubumwe n’Ubwiyunge (NURC) Umubyeyi Marie Mediatrice asanga hari intambwe yatewe mu nzira y’ubumwe n’ubwiyunge mu banyarwanda kuko Abanyarwanda bagera kuri 90% bemeza ko biyunze nk’igihugu abantu bakongera kubana ariko hakiri imbogamizi zituma bitaragera ku 100% nk’uko byifuzwa.

Umubyeyi avuga ko inzira y’ubumwe n’ubwiyunge yagezweho bigizwemo uruhare na Leta n’abafatanyabikorwa barimo n’imiryango ishingiye ku myemerere nk’amadini n’amatorero afasha mu kunga no kubanisha Abanyarwanda mu mahoro, ibyo bikaba byaratumye ubushakashatsi buheruka bwerekana ko Abanyarwanda 90% bemeza ko Abanyarwanda biyunze nk’igihugu bakongera kubana.

Yasobanurirye abanyamakuru ko iryo 10% rikibura rituruka ku bintu bimwe na bimwe ariko nabyo umwaka utaha wa 2020, ubushakashatsi bizeye ko bazasanga byarakemutse Abanyarwanda biyunze 100%.

Ati “Iryo 10% riracyari muri twa dusigisigi tw’ingengabitekerezo ya Jenoside, turacyafite abantu bafite ibikomere biterwa nuko batarabasha kubona ababo ngo babashyingure mu cyubahiro, abagifite ibibazo batewe na Jenoside yakorewe Abatutsi, abo imitungo yasahuwe, iyo mibiri itarashyinguwe, ibyo byose bitera ibikomere ku 10% nk’igihugu tutarageraho.”

Umubyeyi yongeyeho ko nanone hagikenewe ubwiyunge mu banyarwanda ubwabo; buzagerwaho neza ari uko gahunda ya ‘Ndi Umunyarwanda’ imanutse ikigishirizwa ku mudugudu. Ati “Ubwo tumaze kubona igihugu nk’umuryango turimo, dukeneye ubwiyunge twebwe ubwacu nk’Abanyarwanda, dukeneye gusubira mu mateka yacu nk’Abanyarwanda ari nayo mpamvu tuvuga ngo ibiganiro bya ‘Ndi Umunyarwanda’ bigere kuri buri wese.

Ubu ihuriro ry’Ubumwe n’Ubwiyunge ryageze ku mudugudu kugira ngo abantu babashe gusesengura ibyo bibazo bigisigaye kandi babishakire n’ingamba kugira ngo na rya 10% nk’igihugu rigerweho, tube turi igihugu kiyunze nk’uko biri mu Kerekezo cyacu 2050.”

Migambi Julien wo mu karere ka Kicukiro Umurenge wa Gahanga, avuga ko ubumwe n’ubwiyunge Abanyarwanda bazabugeraho akurikije imibanire bagezeho n’amateka ya Jenoside banyuzemo.

Ati “Nta gushidikanya igihugu cyavuye kure, aho ubwoko ari bwo bwagenaga imibereho yawe, Abatutsi babonwa nk’abanyamahanga bateye igihugu kandi ari Abanyarwanda babyawe n’abandi, babanye nta n’umwe wavuye ahandi ngo umwange kuko utamuzi.

Kubura bwa bumwe ni byo byagejeje kuri Jenoside yakorewe Abatutsi mu 1994, ariko ubu aho Leta y’Ubumwe yongeye kubanisha Abanyarwanda bose ubumwe n’ubwiyunge burimo kugerwaho.”

Kankera Lenatha na we ashimangira ko Leta y’ubumwe yakoze byinshi byo kongera kubanisha Abanyarwanda, ubu uwahemutse akaba abana mu mahoro n’uwo yahemukiye kandi nta kwishishanya.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.