21°C , Partly cloudy | Kigali-Rwanda
NURC: Imibereho y’abasigajwe inyuma n’amateka irarushaho gusubira inyuma

NURC: Imibereho y’abasigajwe inyuma n’amateka irushaho kuba mibi

Yanditswe na Mugisha Benigne

Ku ya 08-11-2018 saa 09:05:45

Komisiyo y’Igihugu y’Ubumwe n’Ubwiyunge (NURC) yamuritse raporo igaragaza ko abasigajwe inyuma n’amateka barushaho gusubira inyuma, ibasabira kwitabwaho byihariye.

Ubwo yamurikaga iyo raporo muri Sena, Perezida wa NURC, Musenyeri Rucyahana John, yavuze ko sosiyete ibafata nabi ndetse na bo ubwabo bakagira ibibazo mu mibanire n’abandi.

Yagize ati “Iyo urebye imibereho y’aba banyarwanda amateka agaragaza ko basigaye inyuma, usanga ikiri inyuma cyane, biterwa n’imyumvire bafite bo ubwabo mu mibanire y’abandi n’uburyo sosiyete nayo ibafata, bigatuma bakomeza kwiheza ubwabo no kumva ko bagomba kubaho bonyine.”

Aha Musenyeri Rucyahana yatanze urugero rw’uburyo usanga batuye ukwabo mu midugudu kuko akenshi ariko baba babishaka, kuba badashaka gukora imirimo iteza imbere Abanyarwanda bakihambira ku mwuga wo kubumba, ntibinakorwe neza ngo bibateze imbere mu bukungu.

NURC: Imibereho y’abasigajwe inyuma n’amateka irarushaho gusubira inyuma

Yavuze ko abiga ari bake ugereranyije n’abandi, na byo bikaba biterwa n’imyumvire yabo, ari na yo ituma bakomeza gukena ugereranyije n’abandi banyarwanda.

Yavuze ko mu mibereho yabo bashonje, kandi bamwe bakaba batagira aho baba, n’abahafite bagashaka guhora bimuka, na byo bituruka ku myumvire bafite.

Senateri Kalimba Zephiryn yafashe ijambo avuga ko uburemere bw’ikibazo cy’abasigajwe kidahabwa agaciro uko bikwiye kuva u Rwanda rwabaho.

Ati “Ikibazo cy’aba baturage kimaze igihe, ntigihabwa uburemere bwacyo kuva u Rwanda rwabaho, ntibagira ibyo gufungura, ntibagira aho baba, ntibikwiye ko bashishikarizwa iterambere batabasha no kubona ikibatunga gihagije.”

Kalimba yagarutse ku mazina yagiye yitwa aba baturage anyuranye, aho bamwe babita abasigajwe inyuma n’amateka n’andi kandi batagize uruhare rwo kuyahitamo.

Kalimba asanga inzego zikwiye kwicarana n’iki gice cy’Abanyarwanda amateka agaragaza ko basigaye inyuma bakaganira ku bijyanye n’iterambere ryabo, aho guhora mu magambo ibikorwa bikaba bike.

Gusa nanone Kalimba arashima ko hari ibyakozwe, ariko anasaba ko hashyirwa imbaraga mu kuzamura imibereho y’aba banyarwanda bakabaho nk’abandi.

Senateri Ntawukuriryayo Jean Damascene na we yunze mu rya Kalimba avuga ko Abanyarwanda amateka agaragaza ko basigaye inyuma bakeneye ubufasha no kwitabwaho mu bijyanye no kuzamura imibereho kuko bakiri inyuma.

Ati “Ni gute wakwigisha umuntu uburyo yiteza imbere kandi agishonje, baracyafite ibibazo byo kubona icyo barya, ntibarumva impamvu yo kujya mu ishuri, bakeneye kwitabwaho mu buryo bwihariye kugira ngo badakomeza gusigara inyuma kurushaho.”

Ntawukuriryayo yavuze ko ikibazo atari umurimo bakora, ko ahubwo ari uburyo watezwa imbere, bagafashwa kunoza ibyo bakora mu bwinshi no mu bwiza, bikabinjiriza amafaranga yabafasha kwiteza imbere.

TANGA IGITEKEREZO

Leave a Reply

Your email address will not be published. Required fields are marked *