20°C , Partly cloudy | Kigali-Rwanda

Nubwo bavuye ku rugamba rw’amasasu baracyari ku rw’iterambere ry’u Rwanda

Yanditswe na Amani Claude

Ku ya 06-07-2018 saa 08:21:09
Inzu 32 ziciriritse zagurishijwe abaturage mu Murenge wa Masaka, Akagari ka Gako

Nyuma y’urugamba rwo kubohora u Rwanda, abahoze ari abasirikare basezerewe ku rugerero bakibumbira muri Koperarive KVCS (Kigali Veterans Cooperative Society) ikora ibikorwa byo kwishyuza amahoro y’aho imodoka zihagarara/parikingi (parking) bahagurukiye gukoresha imbaraga n’ubwenge bafite mu rugamba rw’iterambere ry’Abanyarwanda.

Inzu 32 ziciriritse zagurishijwe abaturage mu Murenge wa Masaka, Akagari ka Gako

KVCS yabonye ubuzima gatozi nka koperative y’Ingabo zavuye k’urugerero mu mwaka wa 2006, ubu yahinduye izina yitwa MISIC (Millenium Savings and Investment Cooperative) nyuma y’aho ibikorwa byayo bimaze kuba ubukombe mu gihugu hose.

Umuyobozi wa MISIC Lt.Col (Rtd) Mushabe David yavuze ko impinduka zijyanye n’intego bihaye zo gutanga serivisi nziza banafasha mu kubaka igihugu.

Lt. Col (Rtd) Mushabe ati: “Gahunda yacu ni ugukorana ingufu kugira ngo intego yacu igerweho, tunoza serivisi ku bakiriya bacu mu rwego rwo kurushaho guteza imbere MISIC n’igihugu muri rusange.”

Umuyobozi Mukuru wa MISIC, Lt.Col (Rtd)Mushabe David

Yakomeje agira ati: “MISIC Nticunga gusa umutekano w’ibinyabiziga, ahubwo yashinze na kompanyi zikora imirimo itandukanye: twavuga nk’Abadahigwa ku Ntego ikora ibikorwa by’ububatsi, hari umudugudu ugizwe n’inzu 32 yujuje i Kibuga zituwemo n’Abanyarwanda biguriye ku giciro giciriritse, bityo abavuye ku rugerero batanze igisubizo ku kibazo cy’amacumbi mu gihugu.”

N’ubu hagiye kubakwa izindi nzu 54 zizagurishwa abafite amikoro make hagamijwe gukomeza urugamba rw’iterambere ry’igihugu.

Ku bufatanye bw’Abadahigwa ku Ntego, Inkeragutabara n’Ubuyobozi bw’Akerere ka Kicukiro, mu murenge wa Masaka hamaze kuzuzwa Umudugudu w’Ikitegererezo ugizwe n’inzu 40 ndetse hagiye kuzura izindi nzu 32 muri uwo mudugudu, zose zikazatuzwamo abatishoboye.

Mu rwego rwo gushyigikira gahunda ya Leta ya “Made in Rwanda”, MISIC   igiye kubaka uruganda mu karere ka Rwamagana rukora imyenda n’inzitiramibu ibinyujije mu kindi kigo kitwa  “Vision Garment Ltd”. Nyuma yarwo hazubakwa urundi rwitwa “Unique Chalk”  rukora ingwa zifashishwa n’abarezi mu mashuri.

MISIC ifite abakozi mu turere twa Rubavu, Rusizi, Ngororero, Gakenke, Gasabo na Rwamagana bacururiza utwo turere umutungo kamere watwo ukomoka mu bucukuzi bw’amabuye y’agaciro.

MISIC iri no mu bikorwa by’ubuhinzi n’ubworozi, aho ifite umushinga wo gutubura imbuto zizajya zihabwa abahinzi.

Mu karere ka Gasabo na Kicukiro, MISIC ihafite Hegetari 50 zigiye guhingwamo ibigori bizatanga imbuto y’indobanure ikabakaba toni 300. Bizafasha abahinzi nyarwanda kubona imbuto iwabo idateze guturuka mu mahanga.

Ubuyobozi bwa  MISIC burishimira ko  MISIC imaze gutanga akazi ku banyarwanda bagera kuri 788 muri rusange, harimo ingabo zavuye ku rugerero 308. Ibikorwa uko bigenda byaguka ni ko abanyamuryango ba MISIC bazakomeza kugenda bitabwaho, bashakirwa akazi kandi n’imigabane yabo muri Koperative igenda yunguka.

Ikoranabuhanga ryoroheje akazi muri MISIC

Ubuyobozi bwa MISIC  buboneyeho umwanya wo kwifuriza abanyamuryango n’Abanyarwanda muri rusange  isabukuru nziza ya 24 yo Kwibohora, buzirikana n’ubutwari bw’Ingabo zabohoye igihugu zirangajwe imbere na Nyakubahwa Perezida wa Repubulika Paul Kagame.

Umwanditsi:

Amani Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.