21°C , Mostly cloudy | Kigali-Rwanda

Ntitwakwemera ko uburemere bw’amateka buduherana-Perezida Kagame

Yanditswe na Imvaho Nshya

Ku ya 07-04-2021 saa 11:33:18

Perezida wa Repubulika y’u Rwanda Paul Kagame, yatangaje ko umuhango wo kwibuka Jenoside yakorewe Abatutsi ufasha Abanyarwanda n’inshuti z’u Rwanda kuzirikana igihe cy’ubu ndetse n’urusobe rw’amateka yagejeje Igihugu aho kigeze kuri ubu.

Umukuru w’Igihugu yavuze ko nubwo amateka y’u Rwanda aremereye cyane, ariko Abanyarwanda bahisemo kutemera ko ubwo buremere bubaherana ngo bubabuze gukomeza urugendo rw’iterambere mu bumwe n’ubworoherane.

Ibyo yabigarutseho kuri uyu wa Gatatu tariki 7 Mata 2021, mu ijambo yageneye u Rwanda n’Isi ku munsi wo kwibuka ku nshuro ya 27 Jenoside yakorewe Abatutsi mu 1994.

Perezida Kagame yagize ati: “Ntabwo uyu muhango tuwufata nk’ibisanzwe, buri gihe utwibutsa byinshi bikomeye. Kugeza uyu munsi turacyabona imibiri y’abajugunywe mu byobo hirya no hino mu Gihugu, abakoze aya mahano baracyidegembya hirya no hino ku Isi, ariko ntabwo twakwemera ko uburemere bw’aya mateka buduherana.”

Perezida Kagame yagarutse ku mateka ashaririye n’urugendo rutoroshye Abatutsi banyuzemo guhera mu mwaka wa 1959 kugeza mu 1994, nk’uko yatangajwe n’Umunyamabanga Nshingwabikorwa wa Komisiyo y’Igihugu yo kurwanya Jenoside, ashimangira ko ayo mateka ari ukuri kutazahinduka.

Yakomeje agira ati: “Ariko rero niba abahakana amateka ibyabaye bitabatera isoni, njyewe nawe twagirira iki ubwoba bwo guhangana na bo?”

Uyu mwaka ubaye uwa kabiri wo kwibuka ubaye mu gihe cy’icyorezo cya COVID-19, bikaba biri mu byongerera intimba Abarokotse Jenoside yakorewe Abatutsi kuko batabasha guteranira hamwe ngo bahumurizanye.

Perezida Kagame yavuze ko ukwihangana no kudacika intege kw’abarokotse Jenoside yakorewe Abatutsi ari byo byongerera buri wese imbaraga zo gukomeza kwiyubaka no kubaka Igihugu.

Ati: “Turabashimira inkunga yanyu, kwihangana no kwitanga mugaragaza kugira ngo twese tugire ejo hazaza heza. Kongera kubaho nk’Igihugu, tubikesha Abanyarwanda benshi bashatse kubaka u Rwanda rwiza, rubabereye, bakanga kuba ibikoresho by’abayobozi babi. Amahirwe yo kubaho mu buzima bwiza bayabonye bayafatishije amaboko yombi, iyi ni inkingi ikomeye mu bigize imbaraga zacu.”

Yavuze ko no mu bihe bikomeye, Abanyarwanda barushijeho gukomeza kunga ubumwe mu gihe hari abashakaga kubarangaza no kubatesha igihe. Ati: “Nta kindi gihe u Rwanda rwaranzwe n’ubumwe no kureba imbere nk’ubu. Aha ndavuga cyane cyane urubyiruko, ari na rwo rugize umubare munini, w’abaturage, b’Igihugu cyacu.”

Umuhango wo kwibuka Jenoside yakorewe Abatutsi ku rwego rw’Igihugu wahereye ku Rwibutso Rukuru rwa Kigali ruherereye ku Gisozi, aho Perezida Kagame na Madamu Jeannette Kagame bashyize indabo ahashyinguwe imibiri isaga ibihumbi 250 y’abishwe muri Jenoside yakorewe Abatutsi, nyuma bagacana Urumuri rw’Icyizere.

Ibikorwa byo byo kwibuka byakomereje muri Kigali Arena mu muhango witabiriwe n’abantu basaga 500, ukaba unakurikiwe n’imbaga nini y’Abanyarwanda n’inshuti z’u Rwanda bifashishije Radiyo na Televiziyo by’Igihugu ndetse no ku mbuga nkoranaymbaga zitandukanye.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.