18°C , Mostly cloudy with thunderstorms | Kigali-Rwanda
Sunrise FC nta bwo izongera kuvugwamo ikibazo cy'amikoro nk'umwaka ushize w'imikino

Ntimuzongera kumva ngo abakinnyi babuze imishahara- Habineza

Yanditswe na BIZIMANA ERIC

Ku ya 14-03-2018 saa 07:46:39

Visi Perezida w’ikipe ya Sunrise FC,  Habineza Longin arizeza ko ikibazo cy’ubukene bwaranze iyi kipe bugiye kuba amateka.

Sunrise FC nta bwo izongera kuvugwamo ikibazo cy’amikoro nk’umwaka ushize w’imikino

Ikipe ya Sunrise FC  iri mu bihe byiza  nyuma yo  kwitwara neza dore ko ubu iri ku mwanya wa 4 n’amanota 25 ikaba irushwa amanota 3 na  AS Kigali  iyoboye n’amanota 28 mu gihe igifite umukino w’ikirarane izakiramo  Rayon Sports i Nyagatare.

Ibi biraba mu gihe Sunrise FC yanditse amateka mabi umwaka ushize w’imikino aho yatangiye neza inayoboraho urutonde rwa shampiyona mbere yo guhura n’ibibazo by’amikoro aho abakinnyi bamaze hafi  amezi atandatu badahembwa batangira no kubura amafunguro.

Visi Perezida wa Sunrise FC, Habineza yabwiye Imvaho Nshya ko ubu ibintu bimeze neza. Ati “Uyu munsi nta birarane dufitiye umukinnyi. N’amikoro  turitegura kuyashaka mu baturage bacu. Ntitwifuza kongera kumva ngo abakinnyi babuze icyo barya, ngo nta mishahara. Ntidushaka ibyabaye umwaka ushize’’.

Inkunga ya Sunrise FC izajya itangwa mu byiciro by’ubudehe

Mu gihe Sunrise FC ikomeje gukoresha amafaranga y’Akarere ka Nyagatare,  abayobozi b’iyi kipe baratangaza ko bamaze gushyiraho ikayi y’umusanzu wa Sunrise FC  yamaze koherezwa muri buri Murenge wo muri Nyagatare izahabwa abari mu kiciro cya gatatu n’icya kane cy’ubudehe.

Habineza yagize ati “Ni ibintu twemereje mu nteko rusange. Twahisemo guhera ku kiciro cya gatatu ntawajya gushaka inkunga ku batishoboye. Ariko n’uwo mu kiciro cya kabiri ufite urukundo rwa Sunrise FC ni yo yatanga igiceri cy’amafaranga 100’’.

Uyu muyobozi yizera  ko izi kayi zizava ku murenge ziri kumwe n’imisanzu ifatika yo gushyigikira ikipe  mu mezi asigaye.

Ku bakinnyi, Habineza avuga ko igihe hazajya haba ikibazo biyemeje ko bazajya bavugana n’abayobozi babo. Ati “Mbere ikibazo cyose bahitaga bajya mu itangazamakuru ariko ubu bashobora kumara amezi atatu batarahembwa tukabasobanurira impamvu bakabyumva. Ubu imyumvire yarahindutse  kandi baratuje’’.

Sunrise FC ifite  ingengo y’imari ya ni miliyoni 120 muri uyu mwaka w’imikino.

 

TANGA IGITEKEREZO

Leave a Reply

Be the First to Comment!

avatar