19°C , Partly cloudy | Kigali-Rwanda

Ntacyo u Rwanda rutakora ku nyungu z’Abanyarwanda n’ibihugu by’abaturanyi-Mushikiwabo

Yanditswe na SEZIBERA ANSELME

Ku ya 14-03-2018 saa 06:39:22

Minisitiri w’Ububanyi n’Amahanga n’Ibikorwa by’Umuryango w’Afurika y’Iburasirazuba Mushikiwabo Louise, avuga ko nta cyo u Rwanda rutashyigikira mu bikorwa bifatika by’akarere ruherereyemo ku nyungu z’abaturage barwo ndetse n’iz’abaturage b’ibihugu by’abaturanyi.

Abanyamakuru mu kiganiro na Minisitiri Mushikiwabo Louise bagaragarijwe ishusho y’u Rwanda mu mibanire n’ibindi bihugu (Foto James)

Ibyo Mushikiwabo yabitangaje mu kiganiro n’abanyamakuru mu rwego rwo kubagaragariza ibijyanye n’ububanyi n’amahanga, ibibazo by’impunzi ndetse n’uko u Rwanda ruhagaze mu mibanire n’ibindi bihugu ahanini hagarutswe ku Bufaransa na Uganda.

Minisitiri Mushikiwabo ashimangira ko u Rwanda rukomeje kubana neza n’amahanga bikanagaragarira mu mishinga imwe n’imwe yagiye ishyirwaho kandi ikagenda neza hagati y’ibihugu by’umwihariko ibigize Umuhora wa Ruguru u Rwanda ruherereyemo.

Yatangaje ko mu mezi make ashize hari byinshi byiza byagezweho mu rwego rw’ububanyi n’amahanga by’umwihariko u Rwanda rukaba rwaranahawe inshingano zikomeye ku mugabane w’Afurika no kuyobora umuryango w’Afurika Yunze Ubumwe.

Ku byerekeranye n’imishinga ihuza ibihugu byo mu Muhora wa Ruguru, Mushikiwabo avuga ko nubwo hari iyadindijwe n’impamvu zinyuranye icya mbere ari ubushake bwa politiki ituma bisubira aho byari bigeze mu bijyanye n’imishinga kuko abaturage b’ibihugu byose babikeneye kandi akaba ari bo babikorerwa ngo batere imbere.

Aha yanatanze urugero ku masezerano y’ubufatanye aherutse gusinywa hagati y’u Rwanda na Tanzaniya ku iyubakwa ry’umuhanda wa Gari ya moshi uzahuza ibihugu byombi mu korohereza ubucuruzi.

Asobanura ko kudindira kuri imwe mu mishinga y’ibyo bihugu, yatewe no kuba hari amatora mu bihugu nka Uganda, ayabaye muri Kenya na Sudani y’Amajyepfo hamwe na hamwe hakaba harabaye amakimbirane n’imyivumbagatanyo hagati mu baturage.

Mu gusubiza ibibazo by’abanyamakuru ku bivugwa ko ibihugu bya EAC byihugiyeho bigatuma imishinga isinzira, Mushikiwabo asobanura ko nubwo iyo mishinga yifuzwa ko yihutishwa atariko bigenda, iyo bigaragaye ko hari igihugu gifite uruhare mu gutinza imishinga yumvikanyweho bigira ingaruka kuko abaturage bacyo ari bo babihomberamo.

Yagize ati: Hari ibihugu bikomeje kugendanirana ari nako binoza imishinga byiyemeje, ibyari bihari ntibyahindutse si no gusinzira ahubwo guhuza ibikorwa nk’ibihugu ntibiba byoroshye”.

Mu bibazo byabajijwe ku mubano hagati y’u Rwanda na Uganda uko uhagaze muri iki gihe nyuma y’inkuru zakomeje gutambuka mu bitangazamakuru, Mushikiwabo avuga ko mu bihe bishize uwo mubano hagati y’ibi bihugu wajemo agatotsi aho Abanyarwanda muri Uganda bagiye bahohoterwa abandi bagafungwa n’ibindi bitari byiza.

Akomeza asobanura ko ibibazo nk’ibyo iyo bibaye hagati y’ibihugu abayobozi bagirana ibiganiro kugira ngo bikemurwe kandi abakuru b’ibihugu bombi bakaba barabashije guhura mu mpera z’ukwezi kwa Mutarama 2018.

Yagize ati: “Hari ubwo ibihugu bigirana ibibazo ariko nk’u Rwanda ntirwigeze rwumva impamvu yabiteye kuko umubano wacu na Uganda ni igihango, nta bwo twakwifuza ko hari umuturage wa Uganda wagirira ikibazo mu Rwanda. Turi abavandimwe, dusangiye byinshi birimo amasano, amateka, ndetse n’amaraso kandi byagiye bigaragara uko Abagande bafashwe mu Rwanda birasa nk’uko Abanyarwanda babayeho”.

Avuga ko ikifuzo ari uko ibyo bibazo byahagarara kuko nta mpamvu ihari ifatika yatuma Abanyarwanda bafatwa nabi muri Uganda.

 

 

TANGA IGITEKEREZO

Leave a Reply

Be the First to Comment!

avatar