17°C , Partly cloudy with thunderstorms | Kigali-Rwanda
Dr Nyemazi Jean Pierre, Umunyamabanga Uhoraho muri Minisiteri y'Ubuzima

Nta murwayi mu Rwanda ukenera amaraso ngo ayabure-MINISANTE

Yanditswe na MUTUNGIREHE SAMUEL

Ku ya 09-01-2018 saa 07:48:35

Umunyamabanga Uhoraho muri Minisiteri y’Ubuzima, Dr Nyemazi Jean Pierre, yatangaje ko serivisi zo gutanga amaraso mu Rwanda zihagaze neza ku buryo nta murwayi ukenera amaraso ngo ayabure.

Yabitangaje ejo hashize, tariki ya 8 Mutarama 2018 ubwo Minisiteri y’Ubuzima binyuze mu kigo k’igihugu cyo gutanga amaraso yakiraga itsinda ry’abantu 19 baturutse muri Tanzania no mu ishyirahamwe nyafurika ry’ibigo byo gutanga amaraso (AfSBT) baje kureba aho u Rwanda rugeze muri serivisi nk’izo.

Dr Nyemazi Jean Pierre, Umunyamabanga Uhoraho muri Minisiteri y’Ubuzima

Dr Nyemazi yasobanuriye abagize iryo tsinda ko nta kibazo u Rwanda rugihura nacyo muri serivisi zo guha amaraso umurwayi uyakeneye kandi anatangwa ku buryo bwizewe ku rwego rwo hejuru.

Yagize ati “Abanyarwanda bakanguriwe gutanga amaraso ku bushake, kandi bakabikora ku bwinshi ku buryo navuga ko amaraso aba akenewe tubasha kuyabona abantu bayatanze ku bushake, ku kigero kiri hejuru.

Nta bibazo dufite bijyanye n’uko umuntu yaba yabuze amaraso ku bitaro, arahari ku rwego rw’igihugu, turabikora, dushaka abaturage mu ngeri zitandukanye, urubyiruko, abakuru, abakozi abandi bose mu byiciro bitandukanye bose bagerwaho kandi agasuzumwa neza, amaraso agatangwa mu bigo nderabuzima, mu bitaro aho bafite ubushobozi bwo gutanga amaraso ku buryo navuga ko nta murwayi utabona amaraso igihe ayakeneye”.

Yongeyeho ko umwaka ushize wa 2017 mu bubiko habonetse amaraso ari mu dupaki tugera ku bihumbi 61.

Umunyatanzaniya Prof. Muhammad Bakari Kambi uyoboye iryo tsinda, yavuze ko nko mu gihugu cyabo amaraso ahabwa abarwayi hakirimo ikibazo kuko aboneka cyane ku bavandimwe bagize umuryango kuruta ayaturuka ku bayatanga ku bushake.

Ati “Muri Tanzania ntituragera aho; amaraso aboneka ku kigero gito ku bakoranabushake. Turacyashingiye gusa ku guhana amaraso ku bagize umuryango, ariko intego yacu ni ukuzamura uruhare rw’abatanga amaraso ku bushake”.

Yakomeje avuga ko nubwo bimeze gutyo ariko nabo hamaze gutera intambwe bishimira kuko mu 2005 bashoboraga kubona udusashe tw’amaraso yatanzwe tugera ku bihumbi 69 mu gihugu hose ariko ubu bakaba bageze ku bihumbi 196, ni ukuvuga hejuru ya 40%, mu gihe nk’igihugu baba bakeneye agera ku dusashe ibihumbi 450 hakurikijwe amabwiriza mpuzamahanga.

Ati “Ikizatubera kiza ni uko tuzajya tubona 100% by’amaraso dukenera; turabona imwe mu ngamba zo gutuma tugera aho twifuza ari uguteza imbere uruhare rw’abatanga amaraso ku bushake”.

Iryo tsinda rigizwe n’abaturutse muri Tanzania, Cameroun, Afurika y’Epfo, Misiri, Zimbabwe, Malawi na Ghana riri mu Rwanda kuva tariki ya 8 kugeza 12 Mutarama 2018 risura serivisi z’ibikorwa byo gutanga amaraso.

 

TANGA IGITEKEREZO

Leave a Reply

Be the First to Comment!

avatar