Nta bwo ikipe y’igihugu ari iy’abakinnyi b’i Kigali gusa – Tonny Hernandez

Ubwo Mukura yari imaze gutsinda ikipe ya AS Kigali ibitego 3-1 mu mukino w’umunsi wa 8 wa shampiyona wabaye tariki 6 Ugushyingo 2019, umutoza mukuru w’iyi kipe, Tonny Hernandez yagaye  ubuyobozi bwa FERWAFA ndetse n’abatoza b’ikipe y’igihugu.

Mukura yitwaye neza itsinda AS Kigali ibitego 3-1 byatsinzwe na Ndizeye Innocent,  Iradukunda Bertrand na Ntwali Evode mu gihe igitego cya AS Kigali cyatsinzwe na Nkinzingabo Fiston.

Nyuma y’uyu mukino, umutoza mukuru wa Mukura, Tonny Hernandez ukomoka muri Espagne yatangaje ko yagaye cyane FERWAFA ndetse n’abatoza b’ikipe y’igihugu “Amavubi” kuba mu bakinnyi bahamagawe nta mukinnyi wa mukura n’umwe urimo.

Yagize ati: “Ibi nta bwo ari byo guhamagara abakinnyi b’i Kigali gusa bage baza barebe hari n’abandi bakinnyi bakinira ikipe y’igihugu.”

Yakomeje avuga ko abakinnyi bahamagawe ari abakinnyi beza ariko no muri Mukura harimo abakinnyi bakinira ikipe y’igihugu.  Ati: “Aba bakinnyi bange batsinze ikipe ya APR FC, Rayon Sports na AS Kigali mbese amakipe yose akomeye barayatsinze nta bwo rero numva uburyo bahamagara abo muri ariya makipe ntihagire n’umwe uhamagarwa muri Mukura.”

Hernandez yasabye ko Mukura bayubaha  kuko  abakinnyi  bayo bashoboye kuko berekanye umukino mwiza. Ati: “Nta bwo byanshimishije mbonye urutonde rw’abakinnyi bahamagawe, twerekanye umukino mwiza nta bwo twari kubura umukinnyi mu ikipe y’igihugu.”

Mu bakinnyi ba Mukura bamaze iminsi bitwara neza hari Ndizeye Innocent,  Iradukunda Bertrand n’abandi. Kuri ubu  Mukura nyuma y’umunsi wa 8 iri ku mwanya 2  n’amanota 17 aho muri iyi mikino 8 yatsinze 5, inganya imikino 2 itsindwa umukino 1. Mukura yinjiye ibitego 14 yinjizwa 5.

Tariki 06 Ugushyingo 2019 ni bwo umutoza mukuru w’Amavubi, Mashami Vincent yahamagaye abakinnyi 27 kwitegura  umukino wa Mozambique na Cameroun mu gushaka itike ya CAN 2021. Muri aba bakinnyi 11 bakina hanze y’u Rwanda naho  16 bakina imbere mu gihugu.