19°C , Partly sunny | Kigali-Rwanda

Nta birarane cyangwa ingurane bizongera gutinda kwishyurwa- MINALOC

Yanditswe na SEZIBERA ANSELME

Ku ya 02-02-2018 saa 07:49:13

Minisiteri y’Ubutegetsi bw’Igihugu iratangaza ko yafashe zigamije  kwirinda ko ingurane n’ibirarane bihabwa abaturage byatindaga kwishyurwa kuko hamaze kunozwa ubufatanye bw’inzego zirimo na Minisiteri y’Imari n’Igenamigambi (MINECOFIN).

Minisitiri w’Ubutegetsi bw’Igihugu Kaboneka Francis agaragaza Urwego Minisiteri igezeho ishyira mu bikorwa ingengo y’imari (Foto Gisubizo)

Minisitiri w’Ubutegetsi bw’Igihugu, Kaboneka Francis, avuga ko ingurane zihabwa abaturage zihari ahanini zishingiye ku iyimurwa aho amashanyarazi, amazi n’imihanda byanyujijwe, ndetse mu bindi birarane bijya bigaragara bikaba ari iby’abarimu batinze guhembwa.

Kaboneka avuga ko ibirarane cyangwa ingurane byagaragarijwe MINALOC byujuje ibyangombwa bihita bihabwa MINECOFIN bikishyurwa, hakaba n’ibindi bigera muri MINECOFIN cyangwa MINALOC bigasubizwayo kubera ko amabwiriza agenga ingengo y’imari asaba ko yishyurirwa kuri konti nyamara hari abaturage batazigira.

Atangaza ko kugeza ubu MINALOC ifite imibare yose y’abaturage ndetse n’ibikorwa byose bihari bikaba byarakusanyijwe.

Agira ati: Hari ubwo usanga umuturage yarabariwe amafaranga 5000 by’ingurane kandi asabwa gufunguza konti yarangiza akabyihorera, ikindi hari n’abo usanga badafite ibyangombwa by’imitungo ugasanga imiryango yarabirwaniyemo bakananirana kumvikana kandi nta konti iba ishobora kuboneka. Icyo gihe ku bafite utwo dufaranga duke twumvikanye na MINECOFIN ko yayarekura agahabwa akarere hanyuma kakajya kabishyura, igisigaye ni abanze kumvikana”.

Mu rwego rwo kwirinda ibyo bibazo hari ubwo usanga abaturage basaba guhabwa amazi cyangwa amashanyarazi ariko MINALOC ikaba yarafashe ingamba zo kubasaba gushyiramo uruhare rwabo kugira ngo hirindwe kubeshyana hagati y’impande zombi.

Kaboneka agira ati: Iyo twegereza amazi meza abaturage hari igihe itiyo y’amazi inyuzwa mu isambu y’umuturage ariko na we ntibimubuze guteramo ibishyimbo cyangwa imboga nyuma y’icyo gikorwa. Hari n’igihe kandi  hacukurwa akobo ko gushyiramo ipoto y’amashanyarazi mu kibanza cy’umuturage akaba yakwishyurwa amafaranga 5000 wagereranya n’agaciro k’iyo poto n’icyo izabamarira ugasanga abaturage bamaze kubyumva ku buryo kugeza ubu ibirarane bihari ari ibyo mu gihe cyashize kuri ubu nta bishya bihari”.

Ku bijyanye n’imihanda nabwo Kaboneka, avuga ko hari aho bageze mu kuvanaho ingurane cyangwa ibirarane kuko abaturage bagiye bakangurirwa kwitanga ku butaka bwabo hafatwaho metero nkeya imihanda igacibwa kuko ubundi byajyaga bikerereza abayikora.  Kaboneka avuga ko ahagiye kunyuzwa iyo mihanda abaturage banahabwa akazi bakunguka kurusha kubaha ingurane y’amafaranga 5000 kuzamuka, ibyo bikagira uruhare mu kugabanya ibirarane.

Minisitiri Kaboneka kandi avuga ko hari imishinga yagaragaye ko yaterwaga inkunga itarakorewe inyigo nyayo y’uko izakorwa yahagaritswe hakajya haterwa inkunga imishinga ifitiye inyungu abaturage.

Komisiyo y’ingengo y’imari n’umutungo by’igihugu igizwe n’itsinda ry’Abadepite yanagarutse ku bibazo birebana no kuba hari uturere tumwe dukunze kurangwamo amapfa kandi ukabona nta ngamba zirambye zitekerezwa mu kubikemura ndetse utwo turere tukaba twarasabye iryo itsinda kudukorera ubuvugizi.

Aha bagaragajemo Uturere tw’Iburasirazuba (Kayonza, Ngoma na Kirehe) twifuza kuba twakwegerezwa amazi y’Akagera mu bishanga bihabarizwa ku buryo byajya byifashishwa mu kuvomerera igihe k’izuba ryinshi ubuhinzi bugakomeza.

Minisitiri Kaboneka akaba yatangaje ko hari imishinga yateguwe irebana n’uburyo buri karere kagombye gukora igenamigambi ry’ibintu by’ibanze cyangwa amahirwe gafite zagateza imbere kandi zikazakurikizwa muri gahunda ya Guverinoma y’imyaka 7.

Umuyobozi mukuru ushinzwe ishami ry’igenamigambi, n’ubugenzuzi mu kigo LODA, Ningabire Yves Bernard, avuga ko mu Ntara y’Iburasirazuba hari imishinga igera kuri 3 ijyanye no kurwanya ibibazo by’amapfa, atangaza ko muri Gatsibo hari umushinga wa miliyari 80 ugamije kureba uburyo ikibazo cy’amapfa cyakemuka, hakaba indi irimo gukorerwa Akarere ka Ngoma ndetse na Kayonza, nyuma y’ibyo hakaba hateganywa kongerera ubumenyi mu byerekeranye no kuhira abafite ubushobozi bakagezwaho ibikoresho bijyanye nabyo.

Gusa agaragaza ko gufata amazi nabyo birimo kwigwaho ngo harebwe niba bitazagira ingaruka ku mutungo kamere w’igihugu.

TANGA IGITEKEREZO

Leave a Reply

Be the First to Comment!

avatar