17°C , Partly sunny | Kigali-Rwanda

Nshimishwa n’urwego Abanyarwanda bagezeho mu gukora amatora- Makuza

Yanditswe na SEZIBERA ANSELME

Ku ya 04-09-2018 saa 10:02:58

Perezida wa Sena y’u Rwanda Makuza Bernard yashimangiye ibyishimo mu byiciro 3 aterwa n’imigendekere myiza y’igikorwa cy’amatora mu banyarwanda by’umwihariko ay’Abadepite yabaye ejo hashize ku itariki ya 3 Nzeri 2018 kuko akoranwa umutuzo, ubwitabire nta muvundo bitandukanye no mu bihugu bimwe na bimwe hirya no hino ku Isi.

Perezida wa Sena Makuza Bernard ubwo yari ku murongo yerekeza mu cyumba k’itora (Foto Mutungirehe S.)

Ibyo Makuza yabitangarije Imvaho Nshya nyuma yo gusohoka mu cyumba k’itora kuri site yatoreyeho ya SOS mu murenge wa Kinyinya  mu karere ka Gasabo.

Perezida wa Sena y’u Rwanda Bernard Makuza avuga ko muri ayo matora y’abadepite yashimishijwe n’ibintu 3 birimo kuba yujuje inshingano n’uburenganzira bwe bwo gutora nk’Umunyarwanda uwo ari we wese, icya 2 ari nacyo cy’umwihariko yishimira akaba ari uko yitabiriye gutora bagenzi be b’Abadepite nk’urwego rwa Sena ahagarariye kandi rukorana bya hafi n’urw’Abadepite, hanyuma akaba yaranashimishijwe bikomeye n’uburyo amatora arimo gukorwa mu ituze kuko yateguwe neza n’Abanyarwanda bakayitabira.

Kuri iyo ngingo ya 3 iranga ibintu byamushimishije mu matora y’Abadepite, Bernard Makuza yagize ati: Uhereye ku myiteguro ikorwa na Komisiyo y’Igihugu y’Amatora (NEC) n’uburyo Abanyarwanda bagiye bitabira gukurikirana uko bagomba gukora, ibikorwa byo kwiyamamaza byabaye nta muvundo, nta gusebanya kw’abakandida baba abo mu mitwe ya Politiki n’abigenga aho bagiye biyamamariza, kuri ubu Abanyarwanda bakaba bitabiriye guha amajwi uwo bumvise ufite ibanogeye.”

Muri rusange Perezida wa Sena Makuza asanga amatora Abanyarwanda ubwabo bayafata nk’ibirori, nk’ubukwe bikagaragarira mu byumba by’amatora, kuri za site zayo, agahamya ko bikorwa nta buyobozi bubikoze bigaragaza ko baba banogewe no kwishyiriraho ababahagarariye mu byishimo, nta kuvunda, nta n’imvururu nta n’impagarara zibarimo.

Makuza akomeza avuga ko imyitwarire y’Abanyarwanda mu gihe cy’amatora itandukanye n’ibijya bikorwa mu bindi bihugu, aho usanga amatora yabyo arangwa no gutukana, gushyamirana bikagaragaza itandukaniro.

Perezida wa Sena Makuza Bernard ashyira urupapuro rw’itora mu gasanduku nyuma yo gutora (Foto Mutungirehe S.)

Yagize ati: Twifuza ko ku Isi hose amatora yagakozwe mu buryo buzira imvururu, nta gusebanya, nta mirwano, kuko ibivuye mu matora ari abagiye guhagararira abanyagihugu. Birababaza kuba amatora hamwe arangiza kuba umaze gutorwa akihutira kubanza gusana cyangwa kwisobanura ibibi byakozwe mu gihe cy’amatora kandi ari bo babiteye. Igishimishije ni uko mu Rwanda amahitamo yacu ari uko abo dutoye bahita bajya mu mirimo yabo.”

Gatoto Callixte, umusaza w’imyaka 75 waganiriye n’Imvaho Nshya nyuma yo kwitorera abazamuhagararira mu Nteko Ishinga Amategeko, avuga ko abo yatoye abitezeho kuzuza inshingano zabo bahagararira abaturage mu Nteko Inshinga Amategeko, bageza ibibazo byabo kuri Guverinoma.

Uyu Gatoto kandi mu kiganiro n’Imvaho Nshya yakomeje asobanura akamaro k’amatora no kuyitabira, avuga ko ari inshingano za buri muturage kandi kudatora ubifitiye uburenganzira bigaragara nk’umuntu utari umunyagihugu, gutora bikaba bifasha Leta kumenya ibyifuzo by’abaturage. Yashimye imigendekere y’amatora y’Abadepite kuko basobanuriwe bihagije uko bazayitwaramo bikuraho urujijo kandi n’uburyo abanyantege nke boroherezwa gutora.

Mageza Adolphe ukuriye site y’amatora ya SOS iherereye Gacuriro mu murenge wa Kinyinya muri Gasabo, avuga ko amatora yatangiye ku gihe cyagenwaga n’amategeko, kandi abakorerabushake ba Komisiyo y’Igihugu y’Amatora babanza kurahira abaturage baboneraho gutora.

Mageza atangaza ko kuri iyo site hari hateganyjiwe gutora abaturage 10 351 kuri lisiti y’itora hatabariwemo abo ku mugereka. Agaruka ku bwitabire, yavuze ko abanyantege nke nk’abasheshe akanguhe bitabiriye kandi bahawe imirongo yabo ngo boroherezwe kandi bakirwe mbere, gusa abafite ubumuga mu masaha ya saa moya n’igice z’igitondo bari batagaragara kuri iyo site y’itora.

Gusa icyagaragaye nk’imbogamizi kuri bamwe mu baturage akaba ari uko bitaboroheye gusobanukirwa neza ibijyanye n’inyuguti zitangiza amazina yabo (Alphabet) ziyobora buri wese icyumba aba agomba gutoreramo bitewe n’uko amazina yabo akurikirana kuko hari umudugudu uba ufite ibyumba bibiri ariko akemeza ko bagiye babibafashamo.

Muri aya matora y’Abadepite ya 2018 uwatoraga yasabwaga kuba ari kuri lisiti y’itora, yitwaje ibyangombwa birimo Irangamuntu, Pasiporo n’ikindi cyabisimbura kemewe n’amategeko ndetse n’ikarita y’itora.

Aya matora y’abadepite yabaye mu 2003, yongera kuba mu mwaka wa 2008, akurikirwa n’ayo mu 2013 ari nayo aheruka, akaba akurikiwe n’aya ya 2018.

Abadepite batorerwa manda y’imyaka itanu, mu Nteko ishinga amategeko bakaba ari 80, ku munsi w’ejo hashize hatowe 53 baturuka mu mitwe ya politiki yemewe n’u Rwanda ndetse n’abigenga. Abanyarwanda baba mu mahanga bo batoye ku cyumweru tariki ya 2 Nzeri 2018, ari na wo munsi hatowe umudepite uhagarariye abafite ubumuga. Uyu munsi haratorwa abagore 24 bagize 30% by’abagize Inteko Ishinga Amategeko ndetse n’abahagarariye urubyiruko babiri.

 

TANGA IGITEKEREZO

Leave a Reply

Your email address will not be published. Required fields are marked *