19°C , Showers | Kigali-Rwanda
Nsabimana Callixte wamenyekanye nka Majoro Sankara, yeretswe abanyamakuru afashwe mu maboko n'abapolisi babiri

Nsabimana ‘Sankara’ yashyikirijwe Ubushinjacyaha nyuma yo kwerekwa itangazamakuru

Yanditswe na Nshimyumukiza Janvier Popote

Ku ya 17-05-2019 saa 11:50:49

Nsabimana Callixte wamenyekanye nka Majoro Sankara yigamba ibitero byagabwe Kitabi, Nyabimata no muri Nyungwe, yashyikirijwe Ubushinjacyaha kuwa 17 Gicurasi 2019.

Ni nyuma gato yo kwerekwa itangazamakuru ku cyicaro gikuru cy’Urwego rw’Igihugu rw’Ubugenzacyaha (RIB) ku Kimihurura, aho yazanwe n’abapolisi yambaye amapingu.

Nta jambo na rimwe yabwiye abanyamakuru, yaje yambaye amataratara y’umukara, ishati y’ubururu n’ipantalo ya kaki, bamaze kumureba no kumufotora abapolisi bamusubizayo.

Nyuma gato y’icyo gikorwa, Ubushinjacyaha Bukuru (NPPA) bubinyujije kuri Twitter bwatangaje ko bwamaze kwakira “dosiye ya Nsabimana Callixte alias Sankara.”

Uyu mugabo akurikiranweho ibyaha bifitanye isano n’iterabwoba no guhungabanya umutekano w’igihugu byakozwe muri 2018, bishingiye ku bitero byagabwe mu Ntara y’Amajyepfo.

Ubwo yagezwaga mu cyumba cy’inama cya RIB, yari ategerejwe n’abanyamakuru benshi, dore ko ari bwo bwa mbere bari bamubonye kuva yatabwa muri yombi mu kwezi gushize.

Mbabazi Modeste uvugira RIB avuga ko Nsabimana yafashwe kuwa 13 Mata 2019.

Umwunganizi we mu mategeko, Mé Nkundabarashi Moise, n’umuvugizi wa RIB, Mbabazi Modeste, birinze kuvuga uko Nsabimana yafashwe, aho yafatiwe n’uko yazanwe mu Rwanda.

Gusa impande zombi zemeza ko Nsabimana ukurikiranweho ibyaha by’iterabwoba afunzwe mu buryo bukurikije amategeko kuva yagera mu maboko y’abagenzacyaha mu kwezi gushize.

Abajijwe uko umukiliya we yatawe muri yombi n’uko yaje kugarurwa mu Rwanda, Mé Nkundabarashi yasubije ati, “Yafashwe nk’uko abandi bose bakurikiranweho ibyaha bafatwa, ari mu maboko y’ubugenzacyaha, arimo gukurikiranwa kandi ibyagombaga gukorwa byose byarubahirijwe,” yirinda kugira ikindi arenzaho.

Mbabazi uvugira RIB na we yabajijwe iki kibazo, asubiza atya, “Ikigendanye n’uburyo yafashwe n’aho yafatiwe, icyo nabwira ni uko nta kure kubaho mu butabera, umuntu ushaka guhungabanya umutekano n’umudendezo w’igihugu aho yaba ari hose ubutabera buzamugeraho, rero mbabwiye ngo yafashwe gute yafatiwe he, ibyo byo ni ibintu ubugenzacyaha bugikoraho, bigifatwaho icyemezo, uko urubanza ruzagenda rukomeza muzagenda mubimenyeshwa.”

Mé Nkundabarashi asobanura ko Nsabimana ari we wamwihitiyemo ngo amubere umwunganizi mu mategeko, amufasha nk’uko yabimusabye mu gihe cyose cy’amabazwa mu bugenzacyaha.

Avuga ko yabonye umwanya uhagije wo kuganira na we, naho ibivugwa ko abandi bavoka baba baregerewe ngo bamwunganire bakabyanga, byo ngo niba byarabaye ni uburenganzira bwabo.

Yagize ati, “Icyo nababwira ni uko uwo nunganira ari we wampisemo, kuvuga ko hari abandi bavoka baba barasabwe kumwunganira ntibabikore, abavoka barigenga mu kazi kabo, bafite uburenganzira bwo kuba bakunganira umuntu cyangwa ntibamwunganire bitewe n’uko babyumva ariko kugeza uno munsi ni njye urimo kumwunganira mu mabazwa yose yabaye mu bugenzacyaha.”

“Amabazwa yakozwe ku rwego rw’ubugenzacyaha yararangiye, twaraganiriye mbere y’uko habaho ibazwa na nyuma, twaravuganye, ibyo twagombaga kuvugana byose twarabivuganye.”

Abajijwe uko ubuzima bw’umukiliya we bumeze, niba nta burwayi afite bwatuma akenera kujya kwivuza, Mé Nkundabarashi yasubije ati, “Uburenganzira bwo kubonana na muganga ni uburenganzira umuntu wese ukurikiranwe n’ubugenzacyaha yemerewe n’amategeko ariko nibaza ko impamvu nyir’izina y’iki gikorwa ubugenzacyaha bwakoze nk’uko mumaze kumubona, afite ubuzima bwiza, ibyo agomba kubona byose arabibona ku buryo kugeza ubu icyo kibazo cyo kuba yaba hari uburwayi afite ntabwo afite.”

“Umukiliya wanjye afunze mu buryo bukurikije amategeko ndetse n’ibyo umuntu wese ukurikiranwe n’ubugenzacyaha akenera arabibona, kuri ubu rero ibyo turi gukora ni ugukurikirana dosiye ye igiye kugera mu bushinjacyaha tukaza gukomeza gukurikirana.”

Me Nkundabarashi yavuze ko umukiliya we ameze neza

‘Ntiyatinze kugezwa mu bushinjacyaha’

Nsabimana Callixte ‘Sankara’ wafashwe kuwa 13 Mata 2019, ubugenzacyaha busobanura ko budamutindanye bitewe n’uburemere bw’ibyaha akurikiranweho, by’iterabwoba.

Mbabazi uvugira RIB avuga ko ibyaha by’iterabwoba bifite umwihariko ukekwaho amaranwa n’ubugenzacyaha, ndetse  byashyiriweho itegeko ryihariye nimero 46/2018 ryo kuwa 13/8/2018 bitewe n’uburemere bwabyo.

Ati, “Mu ngingo ya 12 y’iryo tegeko riteganya ko ubugenzacyaha bukora inyandiko mvugo y’ifata n’ifungwa by’agateganyo by’ukekwaho iterabwoba igira agaciro k’iminsi 15, ishobora kongerwa byemejwe n’umushinjacyaha uyobora ku rwego rwisumbuye, kongera icyo gihe bigomba gutangirwa impamvu zigaragaza aho iperereza rigeze n’ikigambiriwe gukora muri icyo gihe cy’inyongera gisabwa, icyakora icyo gihe ntigishobora kurenga iminsi 90. Rero kuva twabatangariza y’uko Nsabimana Callixte tumufite iminsi 90 ntirashira kandi ibisabwa n’itegeko mu buryo itegeko ribiteganya.”

Umuvuizi wa RIB, Mbabazi Modeste avuga ko Nsabimana atatindanwe n’ubugenzacyaha

Kuwa 30 Mata ni bwo Minisitiri w’Ububanyi n’Amahanga, Dr Sezibera Richard, yeruriye itangazamakuru ko Nsabimana ‘Sankara’ ari mu maboko y’ubugenzacyaha bw’u Rwanda.

Nsabimana yari amaze iminsi avuga ko ingabo abereye Umuvugizi za FLN zafashe Nyungwe ndetse anigamba ku maradio mpuzamahanga ibitero byahitanye abantu za Kitabi n’ahandi mu Ntara y’Amajyepfo.

Icyo gihe RIB yasobanuye ko Nsabimana akurikiranweho ibyaha bitandukanye byakorewe ku butaka bw’u Rwanda, birimo gushinga umutwe witwaje intwaro, ubufatanyacyaha mu gukora ibikorwa by’iterabwoba, ubugambanyi no gushishikariza gukora ibikorwa by’iterabwoba, gufata bunyago abantu, ubwicanyi n’ubusahuzi.

 

Abanyamakuru bari bitabiriye iki gikorwa cyo kwerekana Nsabimana ku bwinshi

TANGA IGITEKEREZO

Leave a Reply

Your email address will not be published. Required fields are marked *