21°C , Mostly cloudy | Kigali-Rwanda
Umuyobozi Mukuru w'Ikigo k'Igihugu k'Igororamuco NRS, Bosenibamwe Aimé

NRS igiye gutangira ubukangurambaga bwo kurwanya ubuzererezi

Yanditswe na UWAYISABA FRANCINE

Ku ya 12-09-2018 saa 07:43:33

Mu gihe barangije ikiciro cyo kurwanya ibiyobyabwenge mu rubyiruko, Ikigo k’igihugu k’igororamuco NRS, kigiye gutangira ikindi kiciro cy’ubukangurambaga bwo kurwanya ubuzererezi ku bana bari munsi y’imyaka 18.

Umuyobozi Mukuru w’Ikigo k’Igihugu k’Igororamuco NRS, Bosenibamwe Aimé

Mu kiganiro n’Imvaho Nshya, Umuyobozi wa NRS, Bosenibamwe Aimé, yavuze ko nubwo ari urugamba rutoroshye ariko ibibazo by’abana bazerera mu mihanda bitewe n’ibibazo bitandukanye bigomba gushakirwa ibisubizo kuko abo na bo uburenganzira  bwabo bugomba kubahirizwa.

Ati ”Haracyari ikibazo cy’abana bari mu muhanda. Ntitwavuga ko bidashoboka kurandura iki kibazo ariko ni urugamba rutoroshye kururwana.  Ubu rero twitegura gukangurira umuryango nyarwanda gukora uko bashoboye ngo dufatanye hakoreshejwe uburyo butandukanye ngo aba bana bakurwe mu mihanda.”

Bosenibamwe avuga ko hari ibibazo bigaragara mu miryango bishobora gutuma umwana aba inzererezi, bityo hakazakorwa ubucukumbuzi ngo bamenye icyateye uwo mwana kuzerera birimo kuba hahora intonganya mu miryango, umwana yarabaye imfubyi akabura ukomeza kumwitaho, kuba ababyeyi batamwitaho, kuba akorerwa ihohoterwa cyangwa ubwe akananirana.

Ati “Tuzabanza tumenye imiterere y’impamvu uwo mwana ari inzererezi, abafite imiryango bayisubizwemo kuko hari n’abazerera ku manywa bwakwira bagataha iwabo, hakaba n’abadafite aho gutaha bazerera ku manywa na nijoro ntibatahe. Abo batayifite rero bashakirwe imiryango yo kubamo cyangwa bashyirwe mu bigo ngororamuco, icyo dushaka gusa ni uguca ubwo buzererezi.”

Bosenibamwe avuga ko bazibanda mu migi itandukanye kuko nta mwana uzererera mu cyaro ahubwo bava mu cyaro bajya mu migi batekereza ko ubuzima buzahinduka.

Ati “Tuzareba cyane mu  migi nka Kigali, Muhanga, Rubavu, Huye, Rusizi n’ahandi dushaka abo bana. Kandi igihe dusanze umwana afite umuryango, tuzasura uwo muryango turebe ikibazo kirimo gituma umwana wabo aba inzerezi ngo gishakirwe igisubizo kuko ntiwagorora umwana udahereye ku mubyeyi.”

Yavuze ko kandi umuryango nyarwanda wose ukwiye gushyira hamwe, buri wese agafata iki kibazo nk’ike, akumva uburemere bwacyo bityo buri wese agatanga umusanzu we mu gukumira ubuzererezi ngo abana b’Abanyarwanda be gukomeza kwangirika kandi ari bo Rwanda rw’ejo. Ati “Nkuko Abanyarwanda bafatanyije kubaka igihugu, mureke tunafatanye kwita ku bana bose, Minisiteri y’Uburezi nayo ikomeze gukumira ikibazo cy’abana bata ishuri kuko hari igihe bavamo inzererezi.”

 

 

TANGA IGITEKEREZO

Leave a Reply

Be the First to Comment!

avatar