21°C , Partly cloudy | Kigali-Rwanda
Nduwimana Jean Paul uzwi nka Noopja ahugura abanyeshuri

Noopja yashinze umuryango ufasha urubyiruko

Yanditswe na Ndamyirokoye François

Ku ya 05-11-2018 saa 17:10:47

Nduwimana Jean Paul ukoresha mu buhanzi izina rya Noopja yashinze umuryango yise “Necessary Generation” ukora ibikorwa byibanda ku iterambere ry’urubyiruko binyuze mu mahugurwa, kwihangira imirimo n’ibindi.

Aganira n’Imvaho Nshya, yavuze ko muri 2006 mu karere ka Rusizi yahatangirije igikorwa yahurizagamo hamwe abana babaga mu buzima bwo ku mihanda bagasangira ku munsi mukuru wa Noheli.

Muri 2008 yavuze ko ari bwo yifuje kwagura icyo gikorwa mu rwego rwo kugira ngo uwo mushinga ubashe gukorera mu bice bitandukanye by’igihugu.

Avuga ko ubu barimo gukorera mu mujyi wa Kigali no mu yindi migi yunganira Umujyi wa Kigali.

Mu karere ka Rusizi avuga ko ikigo k’ishuri kitwa Rusizi yego Centre n’urwunge rw’amashuri rwa mutagatifu Muko “G.S.Saint Muko” barimo kuzajya bahatanga amahugurwa ajyanye n’ikoranabuhanga.

Nduwimana Jean Paul uzwi nka Noopja ahugura abanyeshuri

Mu karere ka Kamonyi yavuze barimo gutanga amahugurwa ku kigo k’ishuri kitwa New Life Kingdom Ministries.

Mu karere ka Kicukiro yavuze ko barimo kuzajya batanga amahugurwa ku kigo k’ishuri cya Gatenga.

Yasobanuye ko batangiriye ku banyeshuri biga mu mashuri abanza ngo gusa bazakomereza no mu bindi bigo. Mu mashuri yisumbuye yavuze ko hari amahugurwa y’ikoranabuhanga bazahatanga ajyanye n’urwego rw’ubumenyi rwabo.

Abarimu bigisha ikoranabuhanga mu bigo bimwe na bimwe, Nduwimana yavuze ko na bo hari amahugurwa bazahabwa.

Bamwe mu rubyiruko kandi ngo bazahabwa ibikoresho bijyanye n’ikoranabunga.

Umuhanzi Nduwimana yavuze ko kuri iyi ngingo ikigo cya New Life Kingdom Ministries cyo mu karere ka Kamonyi baherutse gushyikirizwa mudasobwa.

Mu yindi mishinga bafite yavuze ko harimo kuzageza umuriro w’imirasire y’izuba kuri bamwe mu batuye mu bice by’icyaro, gutanga amahugurwa ku bijyanye n’imideri no kurushaho gusobanurira abantu uko iterambere rirambye rigerwaho.

Kugira ngo bage gutanga amahugurwa mu mashuri, Nduwimana yavuze ko bavugana n’abayobozi b’ibigo bakanavugisha ubuyobozi bw’akarere ayo mashuri abarizwamo.

Kugira ngo ibi bibashe gukorwa, Nduwimana yavuze ko abafatanyabikorwa babo ari umuryango witwa One World Citizens wo mu Buholandi nawo ukaba ufitanye ubufanye n’umujyi wa Eindoven wo muri icyo gihugu.

Ku rundi ruhande avuga ko we na bamwe mu bo akorana na bo batari bafite ubumenyi buhagije ku ikoranabuhanga bahuguwe n’abantu bo muri Nepal.

Indirimbo yitwa “Murabeho” n’iyitwa “Ni abagabo” ni zimwe mu ndirimbo ze.

TANGA IGITEKEREZO

Leave a Reply

Your email address will not be published. Required fields are marked *