18°C , Mostly cloudy with thunderstorms | Kigali-Rwanda
Nizeyimana Olivier watowe yiteguye guhuza inzego za Leta n'izabikorera

Nizeyimana Olivier yatorewe kuyobora Ishami ry’ubucuruzi na serivisi muri PSF  

Yanditswe na SEZIBERA ANSELME

Ku ya 20-02-2018 saa 06:54:09

 Umushoramari ufite kampani itwara abagenzi Nizeyimana Olivier, yamaze kugirwa umuyobozi w’Ishami ry’ubucuruzi na serivisi ku rwego rw’Igihugu mu rugaga rw’abikorera, PSF.

Nizeyimana Olivier watowe yiteguye guhuza inzego za Leta n’izabikorera

Binyuze mu nteko rusange y’Ihuriro nyuma yo gutangwaho umukandida n’abagize ishyirahamwe ry’abatwara abantu n’ibintu (ATPR), Nizeyimana Olivier ni we waje kwegukana umwanya w’ubuyobozi bw’Ihuriro ry’ubucuruzi na Serivisi mu Rwanda, aho yasimbuye kuri uwo mwanya uwitwa Mazimpaka Mohammed.

Mu kiganiro kihariye yagiranye n’Imvaho Nshya ku migabo n’imigambi ashyize imbere mu kuyobora iryo huriro, Nizeyimana avuga azibanda akanashyira imbaraga mu guhuza imikorere mu nzego za Leta n’iz’abikorera kugira ngo ubukungu bw’igihugu bukomeze kwiyongera.

Mu bindi atangaza ko yiteguye kongeramo imbaraga muri manda y’imyaka 3 ateganya kuba ari muri uwo mwanya harimo kuzamura abacuruzi bato kugira ngo ibikorwa byabo bibashe kubateza imbere, guhuza amashyirahamwe y’abacuruzi no kuyamenyesha amategeko, harimo gushyiraho uburyo bwo gukorana n’abashoramari bo hanze no kuborohereza, hakaba gukora ubuvugizi bw’Ihuriro no gukorana n’Urugaga rw’abikorera PSF byose bigamije kuzamura ubukungu bw’igihugu.

Nizeyimana ashima abamubanjirije akizeza imikoranire myiza n’abo bazakorana mu gufasha abikorera gukomeza kugera ku rwego rushimishije mu mikorere, imyumvire, guhangana ku masoko mpuzamahanga n’ibindi.

 “Tuzibanda mu kongerera ubushobozi abanyamuryango, kubahuza n’abandi bikorera bo mu bindi bihugu kugira ngo bagere ku masoko mpuzamahanga ndetse n’ubufatanye na bo bwiyongere”.

Nizeyimana Olivier usanzwe anamenyerewe cyane mu bijyanye n’umupira w’amaguru mu Rwanda nk’Umuyobozi w’ikipe ya Mukura, akaba ari na we nyiri kampani itwara abagenzi “Volcano Express”,  asanga ahazaba hakigaragara intege nke hazabaho ubufatanye n’ubuyobozi bw’Urugaga rw’abikorera PSF kugira ngo babashe kuhazamura.

Amahuriro muri PSF yagiyeho mu 2005, agamije guhuriza hamwe ibikorwa by’abahuje umwuga kugira ngo bahuze imbaraga mu buvugizi n’imikorere byabo. Ni muri urwo rwego Ihuriro ry’ubucuruzi na serivisi, rihuriza hamwe amashyirahamwe 13, arimo abacuruzi baranguza bakanacuruza, abikorezi mpuzamahanga, abatwara abantu n’ibintu mu buryo rusange, abakodesha imodoka na kampani zikora isuku. Rihuza amashyirahamwe y’abacuruza ibikomoka kuri peteroli, abahagarariye ibirango (bland) z’imodoka mu Rwanda, amashuri yigisha gutwara ibinyabiziga, koperative z’abamotari, abakomisiyoneri n’abarangira abantu abakozi.

Nizeyimana Olivier atorewe uwo mwanya mu gihe PSF yatangiye amatora kuva ku rwego rw’utugari kugeza ku rwego rw’Igihugu irimo gutora ubuyobozi bushya, mu matora yatangiye tariki ya 8 Gashyantare akazarangira tariki ya 21 Gashyantare 2018 hatorwa umuyobozi ku rwego rw’Igihugu.

 

 

TANGA IGITEKEREZO

Leave a Reply

Be the First to Comment!

avatar