21°C , Partly cloudy | Kigali-Rwanda
Nizeyimana Djuma

Nizeyimana arashaka kuba umukinnyi ngenderwaho mu ikipe y’igihugu

Yanditswe na Bizimana Eric

Ku ya 09-11-2018 saa 09:48:11

Nizeyimana Djuma ukinira ikipe ya Kiyovu  avuga ko afite intego yo kuzamura umubare w’ibitego atsinda kugira ngo abe umukinnyi ngenderwaho mu ikipe y’igihugu «Amavubi».

Uyu mukinnyi   byavuzwe kenshi ko yifujwe  bikomeye n’ikipe y’ APR FC ariko Kiyovu yanga kumurekura kuko yari akiyifitiye amasezerano.

Muri uyu mwaka w’imikino wa 2018-2019 amaze gutsinda ibitego 3  harimo 2 yatsinze ku mukino wa Etincelles FC na kimwe ku mukino wa Sunrise FC  anatanga umupira umwe wavuyemo igitego.

Nizeyimana yatangarije Imvaho Nshya ko intego ye nyamukuru muri uyu mwaka wa nyuma ari iyo kongera ibitego muri shampiyona.

Ati  « Intego yange ni ukuza mu bakinnyi batsinze ibitego byinshi. Bagenzi bange bazamfasha, tuzashyira hamwe tuzaganira kandi bizashoboka. Nziko nzabigeraho ».

Nizeyimana Djuma

Akomeza avuga ko    gutsinda  ibitego byinshi bizamufasha kubona umwanya uhoraho nka rutahizamu uca ku ruhande mu ikipe y’igihugu « Amavubi ».

Ati «Guhamahagarwa ndahamagarwa ariko hari  icyo mbura  ni na yo mpamvu ndimo gukora cyane  nkagerageza gutsinda ibitego kuko  bataguhamagara ngo uze mu bakinnyi 18 udatsinda. Nziko nimbasha gutsinda byanze bikunze nzaza mu bakinnyi 18. Nziko icyo mbura ari ugutsinda ibitego ».

Yavuze ko niyongera ibitego atsinda bizamuhesha amahirwe yo kujya mu makipe akomeye ashobora kuba arimo n’APR FC n’andi yo hanze.

Ati « Kuba APR FC baranyifuje ibyo ni byo ariko nari mfitanye amasezerano  na Kiyovu ni yo mpamvu ndimo nkina kugira ngo ndebe ko yarangira, nibiba na ngombwa nshobora kujya n’ahandi hatari muri APR FC. Nta byo navuga byinshi, intego ni imwe ni ugutsinda ibitego byinshi  nkanatanga imipira myinshi ivamo ibitego ».

Akomeza avuga ko  anafite intego yo kuba yakina hanze y’u Rwanda  kuko yumva abishoboye.

Nizeyimana Djuma ufite  25 yavukiye mu murenge wa Nyakabanda mu karere ka Nyarugenge. Yazamukiye mu ikipe y’abana ya Vision na Kiyovu mbere yo kuzamurwa mu ikipe nkuru.

TANGA IGITEKEREZO

Leave a Reply

Your email address will not be published. Required fields are marked *