18°C , Partly cloudy | Kigali-Rwanda
Umuyobozi mukuru wa NIRDA, Kampeta Sayinzoga (iburyo) n'abandi bayobozi baraganira ku iterambere ry'inganda zenga ibitoki (Foto James)

NIRDA igiye gufasha abatunganya ibikomoka ku bitoki kunoza ibyo bakora

Yanditswe na MUGISHA BENIGNE

Ku ya 06-07-2018 saa 07:36:55

Ikigo k’igihugu gishinzwe ubushakashatsi n’iterambere ry’inganda (NIRDA) kigiye gufasha inganda zitunganya ibikomoka ku bitoki kunoza ibyo zikora, binyuze mu marushanwa y’imishinga, izatsinda ikazahabwa ibyo ikeneye kugira ngo irusheho kunoza umusaruro wayo mu bwiza no mu bwinshi.

Umuyobozi mukuru wa NIRDA, Kampeta Sayinzoga (iburyo) n’abandi bayobozi baraganira ku iterambere ry’inganda zenga ibitoki (Foto James)

Iyi gahunda yaganiriweho mu nama yahuje NIRDA n’inganda zenga urwagwa n’imitobe mu bitoki ku bufatanye n’Ishami ry’Umuryango w’abibumbye ryita ku iterambere ry’inganda (UNIDO) n’Ikigo cy’Abanyakoreya gitsura iterambere mpuzamahanga (KOICA), zisobanurirwa uburyo amarushanwa y’imishinga azakorwa hagamijwe gufasha iyatsinze kurusha indi kubona ibikoresho zizaba zikeneye kurusha ibindi.

Nk’uko byagarutsweho n’Umuyobozi Mukuru wa NIRDA, Kampeta Sayinzoga, ngo iyi gahunda igamije gufasha abafite inganda zikora urwagwa rw’ibitoki n’imitobe kubyongerera agaciro bigahaza isoko kandi bikagera no ku masoko yo hanze y’igihugu.

Ati “Ubusanzwe dufite ibigo bigera kuri 80 byiyandikishije kandi byujuje ibisabwa, hari amarushanwa y’imishinga agiye gutangira akazitabirwa n’ibigo bimaze imyaka itari munsi y’itatu bikora uwo murimo, imishinga izatsinda ni yo izahembwa hagamijwe guha izo nganda ibikoresho zikeneye kurusha ibindi byazifasha kongera umusaruro mu bwiza no mu bwinshi”.

Uretse kubona imashini n’ibindi bikoresho byabafasha mu mikorere myiza y’inganda zabo, abakozi b’izo nganda bazahabwa amahugurwa yo gukoresha izo mashini kandi abatarabona ibirango by’ubuziranenge na bo bakabasha guherekezwa no gufashwa kubigeraho ku bufatanye bwa NIRDA n’Ikigo k’igihugu gitsura ubuziranenge (RSB).

Aya marushanwa y’imishinga azakorwa mu buryo bw’ikoranabuhanga binyuze ku rubuga rwa NIRDA, aho upiganwa asabwa kuzuza ibyo abazwa kuri uru rubuga, guhera ejo hashize ku wa Kane tariki ya 05 Nyakanga kugera tariki ya 20 Nyakanga 2018.

Munyaneza Alfred wo mu Murenge wa Mutenderi, Akarere ka Ngoma,  ni umuhuzabikorwa wa Koperative yenga urwagwa, avuga ko barebye ibisabwa abagomba kwitabira amarushanwa y’imishinga asanga babyujuje byose ku buryo biteguye kuyitabira kandi bakizera ko bazaba mu bazayatsinda.

Ati “Amarushanwa y’imishinga koperative yacu izayitabira kuko numvise twujuje ibisabwa, birimo kuba tumaze imyaka 4 twandikishije ubucuruzi bwacu, ni mu gihe abapiganwa basabwa kuba bamaze imyaka 3, kuba twaratangiye inzira yo gushaka ibirango by’ubuziranenge n’ibindi nabonye bisabwa byose turabyujuje”.

Munyaneza yagaragaje ko ikibazo nyamukuru yabonaga muri koperative abereye umuhizabikorwa ari ukubona amakuru ku mahirwe ahari yafasha kuzamura inganda zenga ibitoki, iki kibazo kikaba gitangiye gukemuka, cyane ko bahawe urubuga bazajya babarizaho ari na rwo bazanyuzaho ibyifuzo by’ibikoresho bakeneye muri aya marushanwa.

Nzabandora Patricie, ni perezida wa “Koperative Menya Nawe” ikorera mu karere ka Gakenke, avuga ko koperative yabo ikora ubuhinzi bw’urutoki ruvuguruye, umusaruro bavanamo ukabafasha kwenga urwagwa  n’umutobe.

Avuga ko bakoraga mu buryo bwa gakondo batara mu rwina bakengera  mu mivure, ariko ngo nibatsinda amarushanwa bizeye gutangira gukora mu buryo bwa gihanga n’ikoranabuhanga.

Yishimiye inama akaba afite ikizere ko nibabona inkunga bizabafasha gutera imbere no kongera umusaruro w’ibyo bakora mu bwiza no mu bwinshi.

Inganda zenga ibitoki  zifite imbogamizi zo kubona ibirango by’ubuziranenge kuko abazikuriye bavuga ko bisaba inzira ndende ndetse n’ubushobozi buhanitse, kuri ubu mu nganda 80 zenga ibitoki, 2 gusa ni zo zimaze kubona ikirango cy’ubuziranenge cya Smark.

 

 

TANGA IGITEKEREZO

Leave a Reply

Your email address will not be published. Required fields are marked *