19°C , Mostly cloudy | Kigali-Rwanda

Nigeria: Ingendo z’indege imbere mu gihugu zigiye gusubukura

Yanditswe na NYIRANEZA JUDITH

Ku ya 03-07-2020 saa 11:31:52
Ingendo zo mu kirere imbere mu gihugu zigiye gusubukurwa ku kibuga cya Abuja muri Nigeria

Nigeria yoroheje ingamba zo kwirinda Koronavirusi, hasubukurwa ingendo z’indege imbere mu gihugu guhera ku itariki ya 8 Nyakanga, nk’uko byatangajwe na Hadi Sirika Minisitiri ushinzwe ubwikorezi bwo mu kirere ejo hashize ku wa Kane.

Amakuru yatangajwe ku mbuga nkoranyambaga yagize ati “Nejejwe no kubamenyesha ko ibibuga by’indege bya Abuja na Lagos bizasubukura imirimo yabyo imbere mu gihugu ku itariki ya 8 Nyakanga 2020”.

Yasobanuye kandi ko ibibuga bya Kano mu majyaruguru, Port- Harcourt mu magepfo, Owerri mu magepfo y’iburasirazuba na Maiduguri mu majyaruguru y’iburasirazuba byo bizasubukura gukora ku itariki ya 17 Nyakanga. Nta cyatangajwe ku mikorere y’ingendo zo mu kirere ku rwego mpuzamahanga.

Nigeria yari yafunze ikirere cyayo muri Werurwe hagamijwe kwirinda ikwirakwira ry’icyorezo cya Koronavirusi, kimaze kugaragara ku bagera ku 26 484 n’abamaze guhitanwa nacyo 603.

Nubwo bimeze gutyo, ariko Minisitiri w’Ubuzima mu ntara ya Ondo mu magepfo y’iburasirazuba bwa Nigeria, Wahab Adegbenro wari ufite imyaka 65 yitabye Imana ejo hashize ku wa Kane tariki 2 Nyakanga kubera Koronavirusi.

Nk’uko bitangazwa n’ibinyamakuru byo muri Nigeria bigira biti “ Yitabye Imana aho yari mu bitaro by’indwara zandura aho yavurirwaga”. Urupfu rwe rukaba rufitanye isano na Covid-19.

Urupfu rwe rubaye nyuma y’iminsi ibiri hagaragaye ko agace ka Rotimi Akeredolu kagaragayemo abarwayi ba koronavirusi. Abayobozi benshi bo mu ntara ya Ondo bafite ubwoba ko baba baranduye kuko hashize iminsi bahuriye mu nama yarimo na Guverineri.

Umwanditsi:

NYIRANEZA JUDITH

Tanga Igitekerezo

Email yanyu ntigaragazwa ku rubuga. Amazina na Email ni ngombwa.