17°C , Partly cloudy | Kigali-Rwanda

Ngororero: Urubyiruko rworojwe ingurube n’inkoko by’asaga miliyoni 180

Yanditswe na Ngaboyabahizi Protais

Ku ya 11-07-2019 saa 14:00:05
Zimwe mu ngurube zorojwe urubyiruko rwo mu murenge wa Gatumba (Foto Ngaboyabahizi P)

Koperative 39 z’urubyiruko rwo mu mirenge itandukanye mu karere ka Ngororero, zorojwe inkoko n’ingurube zifite agaciro k’amafaranga y’u Rwanda miliyoni 181, mu rwego rwo kubafasha kwihutisha iterambere.

Abasore n’inkumi borojwe izi nkoko n’ingurube bahamya ko ari umusanzu ukomeye Leta ibahaye, bakaba biteguye kuzifata neza kugira ngo zizababyarire umusaruro, bazamure iterambere ryabo n’iry’igihugu muri rusange.

Bamwe mu basore n’inkumi bagize koperative Ubudasa yo mu murenge wa Gatumba, baganira n’Imvaho Nshya bagaragaje ko bashimira Leta yabagobotse nyuma yuko barangije amashuri yisumbuye bakabura akazi.

Mihigo Desiré, umwe mu banyamuryango b’iyi koperative yagize ati: “Urubyiruko ni imbaraga z’igihugu, ariko ntabwo rwakubaka rudafite aho rukura amafaranga, ariko kuri ubu ibi ni bimwe mu bigiye gukomeza kuduteza imbere.

Kandi iyo umuntu adakora yirirwa ku muhanda akaba yakwishora mu biyobyabwenge, ubu kuba nari nararangije amashuri abanza singe muri kaminuza, ubu bworozi bw’ingurube buzatuma mbasha kujya kwiga”.

Mihigo yongeraho ko ngo uruhare rw’urubyiruko muri uyu mushinga ahanini rwabaye imirimo y’amaboko mu bwubatsi bw’ibiraro, kwita kuri aya matungo buri munsi no kwishyura umukozi uhoraho.

Umuhuzabikorwa w’inama y’igihugu y’urubyiruko mu murenge wa Gatumba Irankunda Ruth, avuga ko ibikorwa byo guhuriza hamwe urubyiruko mu makoperative byatangiye kunoza imikorere y’inzego z’urubyiruko, bakaba banamaze gutora umuco wo gukunda umurimo.

Yagize ati: “Wabonaga nta gahunda bagira, ibi bigatuma nta n’umusaruro babona, ariko kugeza ubu ubwo bamaze kubona ingurube bigenda bigaragara ko koperative yahinduye imibereho yabo.

Usanga nanone uru rubyiruko rwaratangiye no guhinga imboga bikomotse ku ifumbire bakura mu biraro byabo, nkaba mbasaba gukomeza gufata neza amatungo borozwa, bakayabyaza umusaruro”.

Uyu mukozi yongeraho kandi ko ubuyobozi bukomeza kubafasha mu guhura n’abavuzi b’amatungo, kandi bakabigisha ubworozi bwa kijyambere, no kurinda amatungo.

Aya makoperative 39 yo mu karere ka Ngororero yorojwe ingurube 331, inkoko 9000 zirimo 8000 zo mu bwoko bwa Sasu na 1000 za Brown zitera gusa.

Zimwe mu ngurube zorojwe urubyiruko rwo mu murenge wa Gatumba (Foto Ngaboyabahizi P)

TANGA IGITEKEREZO

Leave a Reply

Your email address will not be published. Required fields are marked *