21°C , Intermittent clouds | Kigali-Rwanda
Abaturage bavuga ko bamaze gusobanukirwa akamaro ko kurya indyo yuzuye

Ngororero: Basobanukiwe uko bagomba gutegura indyo yuzuye

Yanditswe na Tumukunde Georgine

Ku ya 14-08-2019 saa 08:30:21

Abaturage bo mu Murenge wa Hindiro mu Karere ka Ngororero baratangaza ko basobanukiwe uko bategura indyo yuzuye n’akamaro ifite mu kubungabunga ubuzima barwanya imirire mibi.

Abaganiriye n’Imvaho Nshya batangaje ko hari ubumenyi bwinshi bagenda bunguka burimo ubwo kwita ku isuku no gutegura indyo yuzuye, binyuze mu nama zibahuza n’ubuyobozi, mu bimina bahuriramo, mu Mugoroba w’ababyeyi, mu Gikoni cy’umudugudu, mu Nteko z’abaturage n’ahandi.

Hari abavuga ko batajyaga bumva neza akamaro ko kurya imboga, ko uwaziryaga bamufataga nk’uwabuze icyo arya, ari utabonye ikijumba cyangwa umwumbati, abandi bakumva ko nta mugabo warya imbuto, ngo anywe amata, arye n’amagi, byitwaga amafunguro y’abana gusa kandi na bo bakayabona ari uko habanje kuboneka ibijya ku isoko, hatagira ibisaguka bakaburiramo.

Bariya baturage bavuga ko iyi myumvire itakibaho, bamenye ko ari umwana n’umuntu mukuru bakeneye kurya indyo yuzuye kugira ngo bagire ubuzima bwiza.

Uwitwa Nzayisenga Hillarie wo mu Kagari ka Runyinya mu Murenge wa Hindiro yavuze ko basigaye bita ku ndyo yuzuye kuko bamenye akamaro ifite, mu gihe mbere bumvaga ko icya ngombwa ari ukuba wabonye ibyo uteka ukarya ugahaga bihagije.

Yagize ati: “Twamenye akamaro ko gutegura indyo yuzuye, kurya indyo yuzuye birinda umuntu kugira imirire mibi no kurwaragurika, ubu turya ibiryo birimo imboga, tukamenya no gutegurira umwana agakono ke mu gihe twatetse amafunguro ashobora kuba atamworohera, tukagira umwihariko we kugira ngo akure neza”.

Uwitonze Emeritha na we ni uwo mu Kagari ka Runyinya, ashinzwe gukurikirana ubuzima bw’umwana n’umubyeyi, avuga ko hari gahunda nyinshi zihuza abaturage zirimo n’Igikoni cy’Umudugudu, bakaba bahigira byinshi birimo kugira isuku no gutegura indyo yuzuye mu rwego rwo kurwanya imirire mibi n’igwingira.

Ati: “Ubu utegura ifunguro uzirikana ko hagomba kuba harimo ibitera imbaraga, ibirinda indwara n’ibyubaka umubiri. Mbere umuntu yateguraga amafunguro uko abyumva ntiyite ku bijyanye n’indyo yuzuye, ariko ubu ushobora kuba wabonye utwo tuboga, udushyimbo n’ibijumba ubuzima bugakomeza, kuduha ubukangurambaga byatumye abantu bagira icyo biyunguraho, byatumye duhindura imibereho”.

Nyiramahirwe Vestine utuye mu Kagari ka Gatare, yagize ati: “Ubu iyo ngiye gutegura amafunguro ntegura indyo yuzuye, nta biryo nateka bitarimo imboga, niba nateguye nk’ibirayi nshyiramo dodo n’indagara, nkazirikana no gutegura imbuto”.

Tuyishime Vestine wo mu Kagari ka Runyinya na we yagize ati: “Indyo yuzuye igomba kuba irimo imboga, ibinyabijumba n’ibinyamisogwe, iyo twagiye nko kwipimisha cyangwa gukingiza abana kwa muganga barabitubwira”.

Uwitije Marie wo mu Murenge wa Hindiro na we yagaragaje ingero z’ibiribwa bigize indyo yuzuye, avuga ko birimo ibirinda indwara nk’imbuto n’imboga, ibyubaka umubiri nk’inyama n’ibikomoka ku matungo, hamwe n’ibiribwa bitera imbaraga (byitwa ibinyamafufu) nk’ibijumba.

Abagabo bagira uruhare mu kwita ku mirire y’abagize umuryango

Habiyakare Aimable wo mu Murenge Hindiro, yavuze ko n’abagabo basigaye bagira uruhare mu mibereho myiza y’umuryango wabo, bakita ku isuku, bakita ku mirire myiza ndetse bakaba banateka igihe bibaye ngombwa batagombye gutegereza abagore ko ari bo babikora.

Yagize ati: “Ndubatse mfite umugore n’abana batanu, abo bana ndabagaburira neza. Mu buzima busanzwe ndi umuhinzi, iyo bavuze kurya neza numva imirire yujuje ibice by’ingenzi bigize indyo yuzuye birimo ibitera imbaraga aho twibanda ku binyamafufu cyangwa se ibinyampeke, tukajya kubyubaka umubiri aho tubonamo ibinyamisogwe, aho tujya ku birinda indwara aho tubonamo imbuto n’imboga”.

Yongeyeho ati: “Ngewe iwange ndateka kuko ngomba kugaburira abana bange nkunganirana n’umugore wange. Icyo bimfasha ni uko niba umugore adahari ngomba kwita ku buzima bw’abana, igihe bagiye kwiga bakaza basanga amafunguro ateguwe neza”.

Yakomeje asobanura uko ategura indyo yuzuye ahereye ku byo yeza n’ibindi abona hafi ye agira ati: “Mu gutegura indyo yuzuye nshobora gufata ibirayi, ibishyimbo n’imboga n’ubunyobwa cyangwa se ngashyiramo n’ibikomoka ku matungo nk’inyama n’indagara ibyo byose nabiteka ku buryo mbona indyo yuzuye.

Guteka ntibintera ipfunwe kuko ubwuzuzanye iwange burahari; gusa nta bwo guteka ku mugabo bimenyerewe cyane biba biterwa n’uburyo umuntu abyiyumvamo n’uko abitekereza”.

Yakomeje asaba abagabo batarumva agaciro ko gufatanya n’abagore babo mu kwita ku muryango ko bakwiye guhindura imyumvire, bakamenya ko bafite inshingano zo kwita ku ngo zabo kuko hari igihe hashobora kuboneka uburwayi ugasanga habuze uwagira icyo yakora kandi hari byo yagombaga kuba yarakoze.

Ibi kandi abihurizaho na Rukikampunzi Gerald wo muri uriya murenge, ufite umugore n’abana batatu, aho ashimangira ko mu rugo hagomba kubaho ubufatanye kugira ngo abarugize bagire ubuzima bwiza.

Yagize ati: “Imirire iboneye, isuku n’irindi terambere ry’urugo byose biratureba, aho turimo kugana imyumvire ya kera ikwiye guhinduka[…], kera umugabo yumvaga ko icyo agomba gukora ari ukugaburira itungo agakora n’indi mirimo y’ingufu nko kwasa, ariko ubu byarahindutse, nta mirimo y’abagore nta n’iy’abagabo, abantu barajijutse, mu buzima bwose bw’urugo abantu barafatanya”.

Yongeyeho ati: “Ubumenyi tugenda twunguka ni bwo budufasha, tubukura muri za nama duhuriramo n’ubuyobozi, tubikesha ubuyobozi bwiza bw’Igihugu, ubu nta nama yarangira batavuzemo isuku, batavuze gutegura indyo yuzuye, batavuze kurwanya imirire mibi n’ibindi”.

Mukamana Soline ukuriye Ishami rishinzwe ubuzima mu Karere ka Ngororero avuga ko mu bukangurambaga bakora mu birebana n’imibereho myiza y’abaturage hazamo n’ibijyanye no kwita ku isuku kuko nubwo habaho kurya neza ariko bitateguranywe isuku nta musaruro byatanga.

Agaragaza ko iyo isuku ititaweho cyane cyane ngo usange abantu bafite imisarani myiza iboneye, ari ho haturuka indwara zikomoka ku mwanda, usanga zinibasira abana bari munsi y’imyaka ibiri.

Yagize ati: “Umwanda uva mu bwiherero ni ikintu gikomeye cyane kuko ni ho havamo za ndwara zikomoka ku mwanda, bigatuma habaho imirire mibi n’igwingira mu bana bato bari munsi y’imyaka 2, kuko umwana ashobora kurya indyo yuzuye ariko ntibigire icyo bitanga kuko yayiryanye umwanda”.

Kurya indyo yuzuye bivuga kurya ibiribwa nyabyo bihagije, bituma umubiri ubona intungamubiri ukeneye kugira ngo ukore neza kandi ugumane ubuzima bwiza.

Abaturage bavuga ko bamaze gusobanukirwa akamaro ko kurya indyo yuzuye

TANGA IGITEKEREZO

Leave a Reply

Your email address will not be published. Required fields are marked *