22°C , Partly sunny | Kigali-Rwanda

Ngororero: Abajyanama b’ubuzima bateganya kwiyubakira inzu y’ubucuruzi

Yanditswe na Mugisha Benigne

Ku ya 10-10-2019 saa 08:43:47
Abishyize hamwe nta kibananira

Umuyobozi w’Akarere ka Ngororero wungirije ushinzwe iterambere ry’ubukungu, Uwihoreye Patrick  atangaza ko abajyanama b’ubuzima bishyize hamwe bakaba bateganya kwiyubakira inzu y’ubucuruzi mu Mujyi wa Ngororero.

Ibi ngo babiteguriye mu nama yahuriyemo amakoperative 17 y’abajyanama b’ubuzima bo mu karere ka Ngorerore bigira hamwe uko babyaza umusaruro umutungo w’amakoperative ukavamo ikintu kgaragara cyabinjiriza amafaranga.

Yagize ati “Amakoperative 17 y’abajyanama b’ubuzima yahuriye mu nama aganira ku buryo yabyaza umusaruro umutungo wayo, yemeranywa kubaka inzu y’ubucuruzi mu mujyi wa Ngororero.”

Visi Meya wa Ngororero avuga ko uyu ari umushinga ugitangira kwigwa, ukaba uri mu kiciro cy’ibanze, ariko icyo bemeranyijwe akaba ari uguhuza imbaraga mu gukora igikorwa gifatika kibyara inyungu.

Avuga ko aya makoperative uko ari 17 asanzwe afite umutungo wayo, ari nawo uzahurizwa hamwe mu kubaka inzu y’ubucuruzi igezweho.

Uwihoreye avuga ko abajyanama b’ububuzima bahise bitoramo komite ihagarariye iki gikorwa, nayo isabwa guhinda yandikisha uyu mushinga muri BDF.

Avuga ko Abajyanama b’ubuzima bashyizeho n’izina ry’ikigo cyabo kigiye kwandikishwa mu mategeko, bemeza ko gihabwa izina rya “ Ubuzima bwiza Ngororero”.

Avuga ko abajyanama b’ubuzima bemeje imari shingiro mu gushyira mu bikorwa umushinga wabo ingana na Miliyoni 350, bityo buri wese yiyemeza gutanga amafaranga 100.000 yo gufasha mu bikorwa.

Ikindi gitangazwa ni uko buri koperative izatanga buhoro buhoro Miliyoni 20  kugira ngo imari shingiro yo kubaka iyo nzu y’ubucuruzi iboneke, kandi abanyamuryang bose babyemeranyaho.

Visi meya w’ubukungu muri Ngororero avuga ko igikurikiyeho ari ukunononsora uyu mushinga kugira ngo wandikishwe mbere yo gushyirwa mu bikorwa.

Asanga uyu mushinga ushoboka rwose kuko ngo abishyize hamwe nta kibananira, ngo kandi buri koperative ikaba yari isanzwe yifitiye umutungo wabo.

Uwihoreye avuga ko iki ari igikorwa kiza aba bajyanama b’ubuzima batekereje  kandi akaba ari igikorwa kigamije iterambere ryabo ubwabo, iry’akarere ka Ngororero n’iry’igihugu muri rusange.

Avuga ko koperative zabo zifite umutungo zikomora muri Minisiteri y’ubuzima yabashyiriyeho ikigega kibafasha ku bw’imirimo myiza bakorera iki gihugu , bakaba barakomeje kugenda bakibyaza umusaruro.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.