22°C , Partly cloudy | Kigali-Rwanda

Ngoma:Biyemeje gufatana urunana bakagaruka mu myanya y’imbere mu mihigo

Yanditswe na admin

Ku ya Nov 15, 2017

Ubuyobozi bw’Akarere ka Ngoma, butangaza ko kuza ku mwanya wa 20 mu turere 30, mu kwesa imihigo y’umwaka ushize wa 2016-2017 ari ugutsikira, kandi biteguye impinduka, mu myaka iri imbere bakajya baza mu turere tw’imbere.

Umuyobozi w’Akarere ka Ngoma, Nambaje Aphrodise, avuga ko batashimishijwe nuko muri iyi myaka ibiri ishize bagize imyanya mibi mu mihigo.Ni nyuma y’uko mu mwaka wa 2014-2015, n’uwari wawubanjirije, aka karere kari kaje ku mwanya wa 2 mu mihigo.

Nambaje Aphrodise, Umuyobozi w’Akarere ka Ngoma (ubanza iburyo), ashyira umukono ku mihigo ya 2017-2018 (Foto Manishimwe N)

Iyo myanya kaje kuyivaho mu mwaka wa 2015-2016 kajya ku mwanya wa 19, umwaka ushize wa 2016-2017 nabwo gasubira inyuma ho umwanya umwe, kajya ku mwanya wa 20. Nambaje avuga ko mu myaka 2 ishize y’imihigo habayeho kutitwara neza, icyakora ngo ntibisanzwe mu muco w’abatuye aka karere.

Ati “Nyuma y’imyaka 2, dusa n’aho dutsikira mu mihigo, murabizi ko hari umwaka twabayemo aba 19, uheruka twabaye aba 20, rwose nta bwo ari umuco wacu.”

Akomeza asobanura ko gusubira inyuma mu kwesa imihigo, babikuyemo isomo ku buryo ubu imbaraga ziri gushyirwa mu gukorana ubufatanye, hagamijwe guteza imbere imibereho myiza n’iterambere ry’abatuye Ngoma.

Ati “Twiyemeje kurangwa no gufatana urunana, ngo duteze imbere akarere kacu, kandi ubwo bufatanye bukaba bugamije kugeza abatuye akarere kacu ku mibereho myiza n’ubukungu, ari na ko dukomeza kubakemurira ibibazo, no kubaha serivise nziza bishimira. Kuko birashoboka ko twasubira ku mwanya wacu wa 2 twahoranye, ndetse no kuza ku mwanya wa mbere birashoboka.”

Icyakora nubwo ubuyobozi bw’Akarere ka Ngoma buvuga ko habayeho gutsikira mu mihigo mu myaka 2 ishize, bunishimira ko mu mwaka ushize  hari   aho bwabashije gutwara ibikombe 2 birimo icy’urubyiruko, n’icy’uko abaturage bishimira uko bayobowe nk’uko Nambaje Aphrodise akomeza abisobanura.

Ati “Turashaka ko tutazongera gusubira inyuma bwa gatatu, ubu turishimira ko akarere kacu kaje ku mwanya wa 2 mu mihigo y’urubyiruko mu mwaka wa 2016-2017.Ndetse twongera kumva inkuru nziza yatashye i Ngoma yuko abaturage bacu bishimira uko bayobowe kuko ubushakashatsi bukorwa n’ikigo k’imiyoborere myiza RGB, twongeye kwesa umuhigo tuba aba 2, umwanya twari twaratakaje ubushize.”

Ubuyobozi bw’Akarere ka Ngoma butangaza ko ubu bwafashe ingamba zo kurushaho kwegera abaturage, mu mirenge, utugari n’imidugudu ibibazo bigakemurirwa mu ruhame, kandi abaturage bagatozwa ubupfura n’umuco wo koroherana, kugira ngo ibibazo bijye bikemuka bitaragezwa mu nkiko.

MANISHIMWE NOËL