18°C , Mostly cloudy with thunderstorms | Kigali-Rwanda
Imiryango itishoboye isaga 400, yahawe ibiro 8 620 by’ibijumba byahinzwe muri ‘Army Week’ (Foto Manishimwe N)

Ngoma:Abatishoboye bahawe ibiro 8620  by’ibijumba byahinzwe muri ‘Army Week’

Yanditswe na MANISHIMWE NOËL

Ku ya 15-02-2018 saa 06:02:42

Imiryango itishoboye 431 yo mu Murenge wa Mugesera, mu karere ka Ngoma, yahawe ibijumba bingana n’ibiro 8620, byasaruwe mu mirima y’ibijumba yahinzwe muri uyu murenge ku bufatanye n’ingabo z’u Rwanda muri gahunda ya ‘Army Week’ mu mpeshyi y’umwaka ushize wa 2017.

Imiryango itishoboye isaga 400, yahawe ibiro 8 620 by’ibijumba byahinzwe muri ‘Army Week’ (Foto Manishimwe N)

Abahawe ibi bijumba barimo abageze mu zabukuru badashoboye guhinga n’imiryango ikennye, bagiye batoranywa na bagenzi babo muri buri mudugudu, muri 35 igize Umurenge.

Ni igikorwa cyabaye mu ntangiriro z’uku kwezi kwa Gashyantare 2018. Buri muryango wagiye uhabwa ibiro 20 kuri ibi bijumba bivugwa ko bikungahaye kuri  Vitamini C.

Iki gikorwa cyabereye mu Murenge wa Mugesera, mu Kagari ko Mugatare mu Mudugudu wo mu Murenge, aho mu mpeshyi y’umwaka ushize wa 2017 ku bufatanye n’ingabo, abaturage n’ubuyobozi bahinze  ibijumba kuri  hegitari  zigera kuri eshanu  mu nkengero z’ikiyaga cya Mugesera ku butaka bwa Leta; ubu ni byo byeze.

Icyo abahawe ibijumba bahurizaho ni ugushimira Leta y’u Rwanda yashyizeho uburyo bwo kubunganira no kubitaho kugira ngo badasonza.

Umubyeyi witwa Mukamwiza Mariana utuye mu mu Kagari ko Mugatare, yavuze ko ubwo ibi bijumba byahingwaga mu mwaka ushize yatunguwe no kubona ingabo z’igihugu zijya mu murima zigahinga ibijumba, none ubu bikaba byeze ndetse bitangiye kuramira abatishoboye.

Uyu mubyeyi yakomeje atangaza ko kuri we asanga ubu ari ubudasa bw’ingabo z’u Rwanda, nabyo akabibona nk’imbuto z’imiyoborere myiza, irangajwe imbere na Perezida wa Repubulika Paul Kagame.

Yagize ati “Sinabona uko nsobanura uburyo nishimiye iki gikorwa kuko mu mwaka ushize ni bwo bwa mbere nari mbonye aho ingabo zihingira abaturage, none bireze, barabiduhaye. Kubera kuba ngenyine naryaga bingoye, ariko ubu ibi bijumba bigiye kumfasha cyane.”

Undi muturage wo muri aka kagari uturanye na Mukamwiza, na we yagaragaje ko ibijumba ari ibiribwa by’agaciro gakomeye cyane muri aka gace batuyemo, bityo bakaba bashimira cyane Leta yabibahaye.

Yagize ati “Burya umuntu uguhaye ibijumba nka hano mu cyaro, aba aguhaye uburisho, na we ushaka imboga, nta bwo habura ibyo kubirisha.”

Mu kiganiro n’Imvaho Nshya, Umunyamabanga Nshingwabikorwa w’Umurenge wa Mugesera Mugirwanake Charles, yavuze ko hashyizweho uburyo bw’uko imiryango ihabwa ibi bijumba itoranywa na bagenzi babo, kandi bigakorerwa mu ruhame kugira ngo bitangwe mu nzira zinyuze mu mucyo.

Abahabwa ibi bijumba basabwa kubitegurana isuku, kandi bagaharanira kwigira, ntihaheho gutekereza ko bazahora bahabwa gusa, ahubwo bagaharanira ko ubutaha nabo baba bafasha abandi.

Ati “Tubaha ubutumwa buvuga ngo uyu munsi niba bari gufashwa bahabwa ibiribwa bitewe nuko bari mu mibereho itari myiza, bakwiye guharanira kwigira. Hari abahawe ibijumba, hari abahawe imbuto, ni ukugenda bagahinga  kugira ngo ubutaha bazagire aho bikura, ntihazabeho guhora abantu bafashwa; kandi gahunda y’igihugu  ni ukwigira.”

Uretse iyi gahunda yo guha ibijumba imwe mu miryango itishoboye,  Ubuyobozi bw’Umurenge wa Mugesera buvuga ko hari no gukorwa ibikorwa byo gutanga imbuto y’imigozi yeraho ibi bijumba, kugeza muri uku kwezi kwa Gashyantare 2018  ikaba imaze  gusaranyanywa mu miryango irenga 500 yo muri uyu murenge, ikigamijwe akaba ari ukugira ngo imiryango nimara kuyitubura (ya migozi), izage igenda  yoroza abandi.

Mu Murenge wa Mugesera hari site 2 ziri ahitwa Mugatare na Nyamugali zahinzweho ibijumba mu cyumweru cyahariwe ibikorwa by’ingabo ‘Army Week’ mu mwaka ushize wa 2017.

Aha hombi ibijumba bireze, kandi ibikorwa byo kubisarura bisaranganywa imiryango itishoboye ngo ni gahunda ikomeje, ndetse iteganyijwe no hirya no hino mu Mirenge yo mu Karere ka Ngoma yakorewemo ibi bikorwa.

Ubuyobozi bw’Umurenge wa Mugesera buvuga ko bwatangiye kuvugana n’ikigo gishinzwe guteza imbere ubuhinzi n’ubworozi mu Rwanda (RAB) kugira ngo harebwe uburyo ahari gukurwa ibi bijumba ari ho hazajya hatuburirwa izindi mbuto zo  gufasha abaturage.

Umurenge wa Mugesera ufite abaturage basaga ibihumbi 26, batuye mu tugari 5 n’imidugudu 35, bari mu masibo 462. Umubare munini ni abatuzwe n’ubuhinzi n’ubworozi, na bake bakora uburobyi mu Kiyaga cya Mugesera.

TANGA IGITEKEREZO

Leave a Reply

Be the First to Comment!

avatar