28°C , Sunny | Kigali-Rwanda

Ngoma: Ubuyobozi bw’Akarere burasaba abaturage kwirinda gutwika

Yanditswe na Manishimwe Noël

Ku ya 21-08-2019 saa 18:19:02
Umuyobozi w’Akarere ka Ngoma Nambaje Aphrodise asaba abaturage kwirinda gutwika kuko ari ukwangiza ibidukikije (Foto Manishimwe N)

Mu rwego rwo kubungabunga ibidukikije, Ubuyobozi bw’Akarere ka Ngoma burakangurira abaturage kwirinda gutwika imisozi no gukora ikintu cyose cyateza inkongi; kuko ari ukwangiza ibidukikije.

Ni ubutumwa butangwa n’abayobozi mu nzego zitandukanye mu gihe mu bice byo hirya no hino mu Rwanda hakomeje igihe k’impeshyi, iba ari igihe k’izuba ku buryo ibyatsi bimwe byuma.

Uko kuma kwa bimwe mu byatsi n’ibiti, hari aho bigaragara ko bitewe n’ibikorwa bya muntu, habaho ibyaha byo guteza inkongi z’umuriro imisozi igashya, n’ibinyabuzima bibamo bimwe bikangirikiramo.

Umuyobozi w’Akarere ka Ngoma Nambaje Aphrodise yabwiye Imvaho Nshya ko hafatwa umwanya wo kwegera abaturage no kubibutsa ko ari iby’igiciro kinini kubungabunga ibidukikije kuko hari aho bigaragara ko byangizwa, kandi iyangirika rya byo rigira ingaruka z’ako kanya n’iz’igihe kirekire.

Yagize ati: “Ni ngombwa ko dufata umwanya nk’uyu tukibutsa abaturage ko ibiti, ibimera, ibyatsi n’amashyamba, bigira uruhare rwo gutuma hororokeramo ibindi binyabuzima nk’inyamaswa zo mu ishyamba, n’inyamaswa zo mu ngo nyinshi zitungwa n’ibimera. Tugomba rero kubisigasira cyane kuko bifite umumaro w’uko biduha umwuka mwiza duhumeka, biduha ‘oxygen’ natwe tukabiha ‘Carbone’.”

Nambaje akomeza agira ati: “Mu Karere kacu ka Ngoma rero ibyo bidukikije turabikeneye cyane, ibyo bimera by’amoko yose tukabireka bigakura, ibyo tugomba gusarura tukabisarura ariko mu buryo butuma tuzongera kubyifashisha, kuruta uko tubitwika tukabihindura umuyonga, noneho uwo mwotsi wazamuka ukangiza ikirere ukadusubiza umwuka mubi ushobora no gusenya akayunguruzo k’izuba, bishobora gutuma izuba ritubabura, rikadutera indwara z’uruhu; zishobora kubyara na kanseri”

Meya Nambaje yibutsa abaturage ko ibidukikije birimo cyane cyane ibiti, ibyatsi n’amashyamba bifite umumaro urimo no kuba bikurura ibicu bibyara imvura, no kuba ifumbire ituma ubutaka buhora bwera. Gusa avuga ko muri iyi mpeshyi ya 2019, hari aho biri kugaragara ko ibidukikije byangizwa.

Ati: “Uyu mwaka wa 2019, muri iyi minsi (muri Kanama) hari ba rutwitsi bamaze iminsi batugaragariza ko batumva impamvu tutagomba gutwika amashyamba, tumaze iminsi tubona rero mu mirenge itari myinshi irimo uwa Kazo, Gashanda, n’uwa Murama batwika, bashobora kuba babikora nkana, kubera uburangare, ariko byose bihanwa n’amategeko, ntabwo ari byo. Ntabwo bikwiye ko abantu batwika ibintu, hari abagenda banywa itabi bakarijugunya aho babonye kandi byose bishobora guteza inkongi. Turasaba abaturage kwirinda icyo ari cyo cyose cyateza inkongi.”

Nk’uko bigaragazwa n’Ubuyobozi bw’Akarere ka Ngoma kuva iyi mpeshyi yatangira mu kwezi kwa Kamena, kugeza muri uku kwa Kanama 2019, muri iyo mirenge itatu yagaragayemo gutwika imisozi habarurwa ubuso buri hagati ya hegitari 15 na 20 zakongotse.

Abaturage bo mu bice bitandukanye by’Akarere ka Ngoma bamagana iryo twika ry’imisozi, nubwo hari abavuga ko hari ibyo batwika byoroheje nko mu mirima, batazi ko bibujijwe.

Uwitwa Nzabonimana wo mu Murenge wa Karembo yagize ati: “Numva impamvu abantu batwika imisozi byaba biterwa n’uburangare. Mbere hari abatwikaga bashaka kubona ubwatsi bw’amatungo bwo kuragira, ariko ubu ntibikigaragara cyane kubera ko amatungo ubu asigaye yororerwa mu biraro. Gusa gutwika hari igihe bikorwa iyo nk’abantu bari guhinga, bagatwika nk’amahwa cyangwa ibyatsi bike.”

Undi mugabo witwa Munyakazi Jean we yagize ati: “Mbere byabagaho hakabaho gutongora amasinde, barangiza bagatwika, ariko ubu ngubu n’ibyo batongoye barabyanika, bikazaba ifumbire,… ngewe numva ababa batwika bakwiye kubireka, no kubyirinda.”

Ubuyobozi bw’ishami rishinzwe ibidukikije mu Karere ka Ngoma bwibutsa abaturage ko bitemewe gutwika ikintu icyo ari cyo cyose kuko byangiza ikirere n’ibidukijije muri rusange.

Mutabaruka Sematarabo, Umukozi w’ako karere uyobora ishami ry’ibidukikije avuga ko ikindi kibazo gihangayikishije ari icy’ahagaragara bamwe mu baturage bigabiza bimwe mu byanya bikomye nko mu bishanga n’urufunzo, no muri metero 50 zo hafi yo ku nkengero z’ibiyaga, bakahahinga; kandi bitemewe.

Gutwika ni icyaha gihanwa n’amategeko. Ingingo za 179, 180 na 181 mu itegeko riteganya ibyaha n’ibihano muri rusange, ryo kuwa 30/08/ 2018, zitega uburyo uhamwe n’icyaha cyo gutwika ahanishwa ibihano birimo n’igifungo n’ihazabu.

Umuyobozi w’Akarere ka Ngoma Nambaje Aphrodise asaba abaturage kwirinda gutwika kuko ari ukwangiza ibidukikije (Foto Manishimwe N)

 

TANGA IGITEKEREZO

Leave a Reply

Your email address will not be published. Required fields are marked *