21°C , Intermittent clouds | Kigali-Rwanda

Ngoma: Ubumwe bw’Abanyarwanda bwashinze imizi bushamikiraho iterambere

Yanditswe na Manishimwe Noël

Ku ya 18-07-2019 saa 09:16:28

Umuyobozi w’Akarere ka Ngoma Nambaje Aphrodise avuga ko Kwibohora kw’Abanyarwanda  mu myaka 25 ishize kubonerwa mu iterambere  rishingiye ku bumwe bw’Abanyarwanda bwubatswe n’imiyoborere myiza u Rwanda rufite.

Ni ibikubiye mu kiganiro kihariye yagiranye n’Imvaho Nshya mu gihe  kuri iyi tariki ya 4 Nyakanga 2019, u Rwanda ruri kwizihiza isabukuru yo Kwibohora ku nshuro ya 25.

Meya Nambaje agaragaza ko nyuma y’uko Ingabo zari iza RPF-Inkotanyi  zihagaritse Jenoside yakorewe Abatutsi tariki ya 4 Nyakanga 1994,  Ubuyobozi bwiza bwahereye ku busa bwongera kubaka u Rwanda rwari rwarasenyutse.

Yagize ati: “Ikintu cya mbere gikomeye cyane ni uko umuntu yasaga n’uhera ku busa. Iyo rero  urebye mu myaka 25 ishize  hari ikintu gikomeye cyane cyo kwishimira Abanyarwanda bagezeho gishingiye cyane cyane ku kuba abantu baratekereje kuba hamwe, bakaba umwe  mu bumwe bw’Abanyarwanda.  By’umwihariko Abanyengoma  muri izo ntekerezo zo gukorera hamwe, gufatanya, gusabana, byarubatswe birinjira  biba ubuzima.”

Meya Nambaje avuga  ko mu myaka 25 ishize u Rwanda rwibohoye hari  iterambere rifatika Abanyengoma bagezeho  kandi  ryishimirwa.

Ahereye  ku  bijyanye n’imibereho myiza y’abaturage yagaragaje ko hari ibikorwa byinshi bakoreye hamwe bimwe bigashamikira ku gikorwa cy’Umuganda, gusana imihanda no  guhanga  imishya  bakoresheje amaboko yabo ariko bashyigikiwe na Leta.

Ati: “Ubu imihanda yaragutse,  irananozwa  ihuza imirenge yacu, ihuza Akarere kacu n’utundi turere. Ubu dufite imihanda myiza yatunganijwe  ku birometero bisaga  216 bizenguruka kano karere ibyinshi bimeze neza kandi byafashije abaturage bacu kugenderanira, guhanahana ubumenyi ndetse no guhahirana.  Kandi abantu barahinga bakeza, bakanahahirana mu byo beza, kuko ubuhinzi bwateye imbere.”

Mu iterambere rishingiye ku bukungu,  Meya Nambaje agaragaza ko  gahunda  zigamije    guteza imbere imibereho myiza y’Abanyarwanda zateye imbere zirimo nka gahunda ya Girinka Munyarwanda yatangijwe na Perezida wa Repubulika   y’u Rwanda Paul Kagame muri 2006,  kugeza muri uyu mwaka wa 2019  zikaba zimaze kugera ku miryango isaga 8500 itishoboye muri ako karere.

Ubworozi na bwo bwateye imbere kuko hirya no hino mu mirenge 14 igize Ngoma  abaturage boroye inka zigera ku bihumbi 40 zirimo n’izitanga umukamo.

Mu bukungu kandi   ubucuruzi bwaragutse, ku buryo muri buri murenge  hari  nibura isantere  y’ubucuruzi  igira n’isoko aho abaturage bacururiza ibyabo, abandi bagahaha.

Mu myaka 25 ishize  abagerwaho n’amazi meza  mu Karere ka Ngoma  ubu bageze  ku gipimo cya  82%.  Mu gihe abagerwaho n’amashanyarazi    ari 56 %, harimo abakoresha ayo ku miyoboro  minini ( On –grid) 32%;   n’akomoka ku mirasire y’izuba 24.12%.

Mu burezi

Mu gihe mbere ya Jenoside   muri Ngoma harimo ibigo by’amashuri bitagera kuri   bitanu, mu myaka 25 ishize u Rwanda rwibohoye, ubu  muri aka karere harimo ibyumba by’amashuri  964  abanza  byigirwamo n’abanyeshuri 84, 566, n’iby’ayisumbiye 531 byigirwamo n’abanyeshuri 19,900.

Meya Nambaje avuga ko kuba u Rwanda rwarashyize imbaraga mu burezi budaheza no kurwanya ubujiji bigaragaza iterambere.

Ati: “Muri iyi myaka 25 ibikorwa remezo by’amashuri  byarongerewe,  hanashyirwaho gahunda y’uburezi kuri bose n’uburezi budaheza. Kandi iyo  ufite abantu bize, bafite ubumenyi  bajijutse, biroroshye cyane  ko no kugira umubare munini w’abafite  ubumenyi bwisumbuye mu gukoresha ikoranabuhanga, abakoresha za terefoni, abahererekanya amafaranga mu buryo bw’ikoranabuhanga ni benshi kandi   banakoresha za mudasozwa.”

Mu buzima

Ubu mu Karere ka Ngoma harimo ibigo Nderabuzima 15 bikora,  amavuriro yunganira 19 akora,  n’Ibitaro bikuru bya Kibungo, hakaba n’urwego rw’Abajyanama b’ubuzima rugizwe  n’abatanga serivisi z’ibanze z’ubuvuzi  mu midugudu bagera  1,889.

Agaruka ku ruhare rw’Abajyanama b’ubuzima mu kwita ku buzima bw’Abanyengoma, Meya Nambaje yagize ati: “Abajyanama b’ubuzima bahabwa ubumenyi  butuma bashobora gupima indwara  ya Marariya, bakavura indwara z’inzoka n’ibindi  ku buryo tubona ko  mu rwego rw’ubuzima  muri iyi myaka 25  hakozwe ibintu byinshi cyane,  kandi bigamije kugira abaturage bafite ubuzima bwiza, batekanye.”

Ubuhinzi 

Umuyobozi w’Akarere ka Ngoma Nambaje Aphrodise  avuga ko  mbere ya 1994,  abantu   batari  bazi ko bafite ibishanga byera umuceri  ‘ku buryo umuceri wagombaga  kuva Tanzaniya , Pakisitani   na bwo kandi ukaribwa n’umugabo ugasiba undi. Ariko ubu uko imyaka igenda ishira   dufite ibishanga hafi kuri hegitari  2,500  bitunganyijwe, abaturage barahinga bagasarura kabiri mu mwaka’.

Igihingwa kitwa Ingazi gikorwamo amamesa na cyo gihingwa cyane mu mirenge ya Rukumberi na Sake (Ifoto Manishimwe N)

Ibipimo bigaragaza ko umuceri uhingwa muri Ngoma  kuri  hegitari  imwe heraho toni eshanu.

Na ho ibigori bihingwa ku butaka buhuje bwa hegitari zisaga ibihumbi 21,200,  soya zihingwa kuri hegitari 700, ibishyimbo bihingwa kuri hegitari  41,300, ibyumbati ihingwa kuri  hegitari  3,500, imboga n’imbuto zihingwa  ku buso  bugera ku bihumbi  bine, harimo ubukorerwa hafi y’ibiyaga bya Mugesera, Sake na Birira  hakoreshejwe uburyo bwo kuhira n’ umushinga wo kuhira imusozi kuri hegitari 265 mu bice by’imirenge ya Remera na  Rurenge.

Mu bindi bihingwa Akarere ka Ngoma kazwiho harimo urutoki ku buryo ku masoko yo hirya no hino mu gihugu ku mwaka   hagezwa ibitoki biribwa bisaga toni ibihumbi 400  byera muri aka karere.

Inanasi zihingwa kuri hegitari zigera ku bihumbi bine,  kandi ngo Akarere karateganya kubaka uruganda ruzitunganya ku buryo zishobora no kumishwa zikoherezwa mu mahanga.

Hari n’ibihingwa  ngengabukungu nka kawa,  Makadamiya, Ibobere n’ubworozi bw’amagweja,  n’igihingwa kihariye kitwa Ingazi zivamo amamesa.

Ibiyaga bitatu bya Mugesera,  Sake na Birira, na byo bikorerwamo ubworozi n’uburobyi bw’amafi ku buryo  hasarurwa toni zisaga ibihumbi 170 ku mwaka.

Amabuye y’agaciro  

Nyuma ya Jenoside yakorewe Abatutsi ni bwo byamenyekanye ko mu butaka  bw’Akarere ka Ngoma   hari ibice birimo amabuye y’agaciro,  ku buryo ubu hacukurwa amabuye y’agaciro  arimo  Koruta, Gasegereti, Worufuramu, hakaba n’ibindi birombe bivamo amabuye akora imihanda n’ayubaka inzu azwi nka Kariyeri.

Iterambere ry’Umujyi wa Ngoma

Ubuyobozi bw’Akarere ka Ngoma  bugaragaza ko  mu myaka 25 ishize u Rwanda rwibohoye, hari  iterambere rigaragara mu guteza imbere ibijyanye n’amahoteri  n’imyidagaduro.

Nk’uko Meya Nambaje abisobanura ati: “Mbere ya Jenoside hari hariho Saint Joseph ya kera ubu   yaravuguruwe,  n’Akarere kubatse  Hoteri iri hafi gutahwa , dufite  ibibuga by’imikino n’imyidagaduro.  Sitade ya Cyasemakamba yahozeho  mbere ya Jenoside ariko kari akantu gato, kashaje, kasenyutse,  ariko uyu munsi  yaratunganyijwe neza ku buryo ubu yagizwe sitade nziza y’ibirori ubu yakira abantu babarirwa mu bihumbi bitanu.  Kandi ubu dufite  na Sitade  ya Ngoma na yo yarubatswe, mu minsi mike tuzayitaha ndetse kuri uyu munsi wo kwibohora nyirizina hari ibikorwa bimwe byahabereye mu kwishimira ibyagezweho mu myaka 25 ishize.”

Mbere ya Jenoside yakorewe Abatutsi  Umujyi wa Kibungo  ngo wari utuwe n’abantu babarirwa mu bihumbi bibiri,  Ubuyobozi bw’Akarere ka Ngoma busobanura ko ubu wagutse ukaba utuwe n’abasaga ibihumbi 30.

Imiturire yaranogejwe

Mu gihe mbere abantu bari batuye batatanye,  nyuma  ya Jenoside yakorewe Abatutsi  mu myaka  1998 ni bwo  abantu batuye mu buryo bwiza mu midugudu,  ku buryo ubu mu Karere ka Ngoma  ibipimo bigaragaza ko  batuye mu mudugudu ku gipimo cya 96.5%.

Meya Nambaje avuga ko  ubu hari gukorwa  ibijyanye no kongerera  ubushobozi  iyo midugudu , hubakwa  n’imidugudu y’ikitegererezo  iba irimo ibikorwa remezo byinshi, ubu hakaba hari  imidugudu y’ikitegererezo ya  Rukumberi, Mutenderi na Kazo, imaze gutuzwamo  imiryango isaga 100.

Imibereho y’abaturage yarahindutse

Ubushakashatsi bukorwa buri mwaka ku iterambere ry’imibereho  y’abaturage mu ngo ya  EICV 5,  buherutse  muri 2018, bwagaragaje ko abatuye  Akarere  ka Ngoma  bagiye bahindura ibipimo by’imibereho  aho muri 2017 bavuye  kuri 19% bari  munsi y’umurongo w’ubukene  ariko   mu mwaka umwe baragabanutse  bagera kuri 14%.

Ikigereranyo cy’abatuye i Ngoma bagerwaho n’amazi meza ni 82% (Ifoto Manishimwe N)

Bavuye no  kuri 46%  bari bakennye  bagera kuri 37%.  Byatumye Akarere ka Ngoma kava ku mwanya wa 22  ku rutonde rw’uturere  mu bijyanye n’igipimo cy’ubukene,  kagera kuri 12%.

Hari ubutumwa  Umuyobozi w’Akarere ka Ngoma Nambaje Aphrodise agenera abaturage mu iyizihizwa ry’isabukuru y’imyaka 25 u Rwanda rumaze rwibohoye.

Agira ati:  “Icyo abaturage basabwa ni ukumenya ko tutaragera iyo tujya. Aho tuvuye  turahabona, ibyo tugezeho  turabifite ariko ntituragera ku  byangombwa byose dukeneye mu buzima. Ahubwo  ni uguhora dutera intambwe izimbye iyo twari turiho. Tukava mu bwiza tujya mu bundi bwiza.”

Akomeza agira ati: “Urubyiruko ni abaragwa, ibyo u Rwanda rugezeho n’ibiri gukorwa uyu munsi, kubisigasira rero no kubirinda ni bo baragwa babyo, kandi si abaragwa ngo birangirire aho ngaho ni n’uruhererekane rw’ibyo bazaha abazabakomokaho, abuzukuru b’ab’ubu , abuzukuruza n’ubuvivi. Twubake ibirama kandi tubirinde.”

Akarere ka Ngoma ni kamwe mu turere turindwi tugize Intara y’Iburasirazuba, gatuwe n’abaturage basaga ibihumbi 390,  kagizwe n’imirenge 14,  utugari 64 n’imidugudu 473.

Gahunda ya Girinka imaze kugera ku miryango isaga ibihumbi 8,500 mu Karere ka Ngoma (Ifoto Manishimwe N)

Gare ya Ngoma mu Karere ka Ngoma

Inzu zatujwemo imiryango y’abarokotse Jenoside batari bafite amacumbi (Ifoto Manishimwe N)

Imiryango isaga 100 imaze gutuzwa mu midugudu y’Ikitegererezo, buri mwaka hari inzu zubakwa n’abaturage bazituzwamo (Ifoto Manishimwe N)

Hatunganyijwe imihanda y’igitaka n’urusekabuye itsindagiye neza ibirometero bisaga 200 ( Ifoto Manishimwe N)

Umuceri mu Karere ka Ngoma uhingwa kuri hegitari zisaga 2,500 (Ifoto Manishimwe N)

Mu Karere ka Ngoma babarurwa hegitari zigera ku 4,000 zihinzweho inanasi ku butaka buhuje cyane cyane mu mirenge ya Sake, Mugesera na Zaza (Ifoto Manishimwe N)

Mu bihingwa Akarere ka Ngoma kazwiho harimo n’urutoki, hasarurwa toni zisaga ibihumbi 400 ku mwaka (Ifoto Manishimwe N) (1)

Umusaruro w’ibigori mu Karere ka Ngoma usarurirwa muri za hangari (Ifoto Manishimwe N)

TANGA IGITEKEREZO

Leave a Reply

Your email address will not be published. Required fields are marked *