22°C , Partly cloudy | Kigali-Rwanda
Rwanyindo Kayirangwa Fanfan Minisitiri w’Abakozi ba Leta n’Umurimo (uwa 2 uvuye ibumoso), ubanza ni Habimana Kizito Gififu w'Intara y'Iburasirazuba, Meya Nambaje Aphrodise wa 3, n'abandi bayobozi (Ifoto Manishimwe N)

Ngoma: Minisitiri Rwanyindo yagaragaje ibyafasha akarere kwesa imihigo

Yanditswe na Manishimwe Noel

Ku ya 05-12-2018 saa 05:14:39

Minisitiri w’Abakozi ba Leta n’Umurimo, akaba n’Imboni ya Guverinoma mu Karere ka Ngoma, Rwanyindo Kayirangwa Fanfan, yabwiye ubuyobozi bw’aka karere ko kwesa imihigo bishoboka mu gihe buri wese azirikana imihigo yahizwe n’uruhare agomba kuyigiramo.

Ni ubutumwa yatangiye mu Karere ka Ngoma, mu nama mpuzabikorwa y’akarere iba buri mwaka, yari ifite insanganyamatsiko igira iti: “Dufatane urunana mu kwesa imihigo”.

Ni inama yitabiriwe n’abayobozi mu nzego zose kuva ku rwego rw’Isibo, inzego z’ibanze, abafatanyabikorwa mu iterambere ry’Akarere n’inzego z’umutekano.

Rwiririza Jean Marie Vianney, Umuyobozi w’Akarere ka Ngoma wungirije ushinzwe iterambere ry’ubukungu, yagaragaje aho imihigo 76 bahize muri uyu mwaka wa 2018-2019 igeze ishyirwa mu bikorwa, hanakirwa ibyifuzo by’ibyo akarere gakwiye gushyiramo imbaraga mu kwihutisha iterambere.

Yavuze ko imihigo ya 2018-2019 igizwe na 31 ijyanye n’ubukungu, 29 y’imibereho myiza na 16 ijyanye n’imiyoborere myiza.

Yagaragaje ko mu gihe uyu mwaka w’imihigo ugeze hagati, hari imihigo yamaze kweswa n’indi iri ku gipimo cyo hasi, kandi hakomeje gushyirwa imbaraga mu kwihutisha ibikiri ku ijanisha ryo hasi.

Yagize ati: “Dufite umuhigo wo kuhira ku buso buto bwa hegitari 80, tugeze ku kigero cya 70% tuwushyira mu bikorwa. Mu bijyanye n’ingufu tuzacanira abaturage by’umwihariko mu mirenge ya Rukira, Kibungo, Mutendeli, Kazo… Ngira ngo mwatangiye kubona amapoto n’insinga z’amashanyarazi, ndetse aba mbere bo mu Murenge wa Rukira batangiye no gucana, bitarenze uku kwezi kwa 12 n’ahandi muri iyi mirenge baraba bacana”.

Rwanyindo Kayirangwa Fanfan Minisitiri w’Abakozi ba Leta n’Umurimo (uwa 2 uvuye ibumoso), ubanza ni Habimana Kizito Gififu w’Intara y’Iburasirazuba, Meya Nambaje Aphrodise wa 3, n’abandi bayobozi (Ifoto Manishimwe N)

Imwe mu mihigo y’Akarere ka Ngoma ikiri ku gipimo cyo hasi, Rwiririza na yo yayigaragaje agira ati: “Mu miturire, ku bufatanye n’Inkeragutabara, tuzubaka amazu 4 mu Murenge wa Kazo, imwe ishobora guturwamo n’imiryango ine (4 in 1), ubu tugeze ku kigero cya 14%”.

Yakomeje avuga ko akarere kihaye umuhigo wo kwinjiza imisoro ingana na miriyari 1 na miriyoni 348, ubu uyu muhigo ugeze kuri 23%.

Ku muhigo wo gutanga inka 800, hamaze gutangwa inka 250, ni ukuvuga ko ugeze ku kigero cya 31.2% weswa.

Rwanyindo Kayirangwa Fanfan Minisitiri w’Abakozi ba Leta n’Umurimo, yasabye Ubuyobozi bw’Akarere ka Ngoma gushyira ingufu mu mihigo bigaragara ko ibipimo byo kuyesa bikiri hasi.

Yasabye abayobozi kuzirikana ko ahatari imikorere n’imikoranire binoze, kwesa imihigo ku rwego rwo hejuru bidashoboka, abagira inama y’ibyo bakwiye kwitaho.

Ati: “Mu rwego rwo kwesa imihigo ku buryo bukwiye ndasaba ibi bikurikira: gushyiraho uburyo buhoraho bwo kuganira ku mihigo mu nzego zose z’akarere, gushimangira umuco wo kuzuzanya no kurangwa no kumvikana. Kwirinda gutekinika muri raporo zinyuranye zitangwa, guteza imbere umuco wo kungurana ibitekerezo no kubaka umuco wo gutanga serivisi nziza ku muturage”.

Yijeje Ubuyobozi bw’Akarere ka Ngoma ko buri kwezi azajya aza nibura inshuri imwe gusura abatuye aka karere no gufatanyiriza hamwe gusuzuma uko imihigo ya 2018-2019 igenda ishyirwa mu bikorwa.

Mukandayishimiye Claudine, umaze imyaka 2 ayobora Umudugudu wa Rwamukobwa, mu Kagari ka Nyinya, mu Murenge wa Rukira yabwiye Imvaho Nshya ko inama mpuzabikorwa ibabera nk’umwanya wo kwisuzuma, kujya inama, bakanayifatiramo ingamba zo kwesa imihigo.

TANGA IGITEKEREZO

Leave a Reply

Your email address will not be published. Required fields are marked *