17°C , Partly cloudy | Kigali-Rwanda
Nambaje Aphrodice Umuyobozi w’Akarere ka Ngoma avuga ko utugari tudafite abakozi bahagije tuzaba twababonye bidatinze (Ifoto Manishimwe N)

Ngoma: Barizezwa ko ikibazo cy’utugari tudafite abakozi bahagije kigiye gukemuka

Yanditswe na Manishimwe Noël

Ku ya 07-12-2018 saa 16:19:42

Umuyobozi w’Akarere ka Ngoma, Nambaje Aphrodice yatangaje ko ikibazo cya tumwe mu tugari tudafite abakozi bahagije kirimo gushakirwa igisubizo ku buryo nyuma y’ibyumweru 2 kizaba cyakemutse.

Ni nyuma y’uko bamwe mu baturage bamugaragarije imbogamizi z’uko imitangire ya serivisi mu tugari tumwe na tumwe itagenda neza bitewe no kuba hari umukozi umwe, kandi ubundi hagombye kuba hari 2; ni ukuvuga Umunyamabanga Nshingwabikorwa w’Akagari n’umukozi w’akagari ushinzwe imibereho myiza n’iterambere ry’abaturage.

Umuturage wo mu Kagari ka Sakara yagize ati: “Dufite ikibazo cy’uko abakozi b’akagari kacu badahagije kuko hari igihe tugenda tugasanga ngo Sosiyare (Umukozi w’akagari ushinzwe imibereho myiza n’iterambere ry’abaturage) yagiye nko mu nama, kandi dukeneye serivisi, kubera ko nta Gitifu tugira… ubona ko hari serivisi nyinshi tutabonera igihe”.

Akagari ka Sakara, mu Murenge ya Murama kagiye kumara igihe kigera ku mwaka katagira Umunyamabanga Nshingwabikorwa, n’Akagari ka Muhango mu Murenge wa Kibungo na ko kamaze igihe kinini katagira umukozi ushinzwe imibereho myiza n’iterambere ry’abaturage.

Nambaje Aphrodice Umuyobozi w’Akarere ka Ngoma avuga ko utugari tudafite abakozi bahagije tuzaba twababonye bidatinze (Ifoto Manishimwe N)

Tumwine Innocent, Umuyobozi w’ishami ry’imiyoborere myiza mu Karere ka Ngoma yabwiye Imvaho Nshya ko kuri ubu hakenewe abakozi 7 mu tugari n’imirenge, ariko hamaze gutangwa amatangazo, ndetse n’abapiganira iyo myanya bamaze kumenyekana, hakaba hasigaye gukora ibizamini byanditse ku bufatanye n’ Ikigo gishinzwe guteza imbere inzego z’ibanze (RALGA).

Ati: “Twifuza ko ibizamini byakorwa ku itariki ya 20 uku kwezi, urutonde rw’abazakora ibizamini rwarakozwe, tutegereje gusa ko RALGA izadufasha gukoresha ibyo ibizamini”.

Nambaje Aphrodice, Umuyobozi Akarere ka Ngoma agaragaza ko hari ikizere ko bitarenze igihe k’ibyumweru 2 buri kagari kazaba gafite abakozi buzuye.

Ati: “Ni ikibazo kizwi, hari igihe bakozi bashyirwa mu tugari nyuma bakagenda, iyo agiye rero hari ubwo bitinda guhita haboneka undi, ariko turimo turabikoraho, turizera ko mu byumweru 2 buri kagari kazaba gafite umukozi w’akagari ushinzwe imibereho myiza n’iterambere ry’abaturage (SEDO) ahandi hakeneye Gitifu na ho abe ahari”.

Yongeraho ati: “Ariko ntihiregangizwa ko hari n’ubundi buvugizi bwakozwe. Akagari ni urwego rurimo rutekerezwa kubakwa rugakomera. Twabitanzeho ubuvugizi kandi birimo gukorwa, ku buryo hazongerwa n’abakozi”.

Akarere ka Ngoma kagizwe n’imirenge 14, igizwe n’utugari 64.

TANGA IGITEKEREZO

Leave a Reply

Your email address will not be published. Required fields are marked *