27°C , Partly sunny | Kigali-Rwanda
Abatuye Umurenge wa Murama biyujurije inzu izajya iberamo gahunda zitandukanye (Ifoto Manishimwe N)

Ngoma: Abaturage biyujurije inzu mberabyombi izihutisha iterambere

Yanditswe na Manishimwe Noël

Ku ya 12-02-2019 saa 16:12:26

Abatuye mu Murenge wa Murama, mu Karere ka Ngoma, biyujurije inzu yagenewe kujya iberamo inama n’ibirori bihuriramo abantu benshi.

Iyo nzu yubatswe iruhande rw’ibiro by’umurenge, ibikorwa byo kuyubaka bikaba bimaze gutwara amafaranga miriyoni 23,8.

Umunyamabanga Nshingwabikorwa w’Umurenge wa Murama, Buhiga Josué yabwiye Imvaho Nshya ko iyi nzu yatangiye kubakwa mu mwaka wa 2016.

Igitekerezo cyo kuyubaka cyaturutse ku kuba umurenge warakeneraga gukoresha inama z’abayobozi b’inzego z’ibanze baba bicaye hanze bakagira ikibazo k’izuba cyangwa haba ari mu bihe by’imvura yagwa ikarogoya gahunda zabo.

Yagize ati: “Twaravuze tuti uwakubaka icyumba kinini kizajya kiberamo inama, muri gahunda yo kwihesha agaciro. Twabibwiye abaturage barabyumva, dutangira ubukangurambaga mu midugudu yose, duhera ku mafaranga ibihumbi 2, kuri buri rugo rufite ubushobozi”.

Yakomeje avuga ko ku kiciro cya 1 buri rugo rwatangaga ibihumbi 2, ariko amafaranga aba make inyubako itarangiye, hongera gukorwa ubukangurambaga noneho buri rugo rukajya rutanga umusanzu w’amafaranga ibihumbi 3; bituma imirimo ikomeza ubu ikaba igeze ku kigereranyo cya 98%.

Ati: “Ubu aho igeze umusanzu w’abaturage umaze kugera kuri miriyoni 23 n’ibihumbi 800; igeze kuri 98%, turateganya ko izaba yuzuye neza mu byumweru bibiri biri imbere, kuko ubu turi kubaka ubwiherero bugezweho; tuzahita tunashyiramo idari”.

Ubuyobozi bw’Umurenge wa Murama bugaragaza ko iyi nzu ifite igice kinini k’icyumba kizajya kiberamo ibirori n’inama, gifite ubushobozi bwo kwakira abantu bagera ku bihumbi 2 bicaye neza, nirangira; umuturage wo muri uyu murenge azajya abonamo inyungu mu buryo butandukanye.

Gitifu Buhiga Josué yabwiye Imvaho Nshya ko amafaranga azajya ava mu gukodesha iki cyumba k’inama, azajya akoreshwa mu gushakira ibisubizo ibibazo by’abaturage.

Ati: “Amafaranga azajya avamo, azajya adufasha gukemura ibibazo by’abaturage. Niba dufite umuturage udafite inzu, aho kwirirwa dusaba akarere amafaranga, tuzajya dufata mu yacu, twubakire umuturage. Turateganya no kuzajya dukuramo amafaranga yo koroza abaturage bacu. Indi nyungu ni uko haramutse hari umuturage ukeneye gukoreramo ubukwe wa hano muri uyu murenge, aramutse agaragaje ko adafite ubushobozi; twayimutiza agakoreramo ubukwe adatanze amafaranga”.

Umuyobozi w’Akarere ka Ngoma, Nambaje Aphrodise, yatangaje ko iki gikorwa cyakozwe n’Abanyamurama ari icyo gushimwa.

Ati: “ Kuba ari icyumba gishobora kwicaramo abantu bagera ku bihumbi 2, ubwabyo ni ikintu gishobora gutuma twajya tunategura ibirori ku rwego rw’Akarere bikaba byabera hano; ni uburyo bwiza rero bw’iterambere kandi umuturage agizemo uruhare. Ubwo bizaba byiza cyane nibatangira kwinjiza amafaranga, inyungu ikagera no ku muturage wagize uruhare mu kuyubaka.”

Ubuyobozi bw’Umurenge wa Murama bugaragaza ko kuva iki cyumba k’inama cyuzuye, bagikodesheje inshuro 2, kikabinjiriza amafaranga y’u Rwanda agera ku bihumbi 600.

Icyakora bakaba hari umwenda wa miriyoni 1 n’ibihumbi 500, bagifitiye ba rwiyemezamirimo babafasha mu kuyubaka ariko ngo na yo barateganya kuyabona no kuyishyura vuba.

Biteganyijwe ko iyi nzu yubatswe ku bufatanye n’abaturage b’Umurenge wa Murama izatahwa mbere y’uko ukwezi kwa kabiri kurangira.

Umurenge wa Murama ugizwe n’utugari dutanu, imidugudu 44; ukaba utuwe n’abaturage ibihumbi 24 na 800.

Abatuye Umurenge wa Murama biyujurije inzu izajya iberamo gahunda zitandukanye (Ifoto Manishimwe N)

TANGA IGITEKEREZO

One Comment on “Ngoma: Abaturage biyujurije inzu mberabyombi izihutisha iterambere”

  1. Umurenge wa Murama ufite ubuyobozi busobanutse cyane cyane exctif BUHIGA turamushimira umurava nubwitange agira na komerezaho MURAMA oyeeeee!!!!!

Leave a Reply

Your email address will not be published. Required fields are marked *