21°C , Partly sunny | Kigali-Rwanda

NEC yamurikiwe na Sosiyete Sivile imigendekere y’amatora y’abadepite

Yanditswe na SEZIBERA ANSELME

Ku ya 27-09-2018 saa 07:38:18

Umuvugizi wa sosiyete sivile nyarwanda Sekanyange Jean Leonard arashimangira ko amatora y’Abadepite mu Rwanda yagenze neza kabone nubwo hari utubazo tumwe na tumwe tukiri imbogamizi ariko bizera ko nyuma bizagenda bikosorwa.

Umuvugizi wa sosiyete sivile nyarwanda Sekanyange J Leonard ushima uburyo NEC yateguye amatora (Foto Sezibera A.)

Ibyo byagaragarijwe muri raporo sosiyete sivile yagejeje kuri Komisiyo y’Igihugu y’Amatora (NEC) kuri uyu wa 25 Nzeri 2018 ku birebana n’imigendekere y’amatora y’abadepite yabaye tariki 02-04 Nzeri 2018.

Sekanyange avuga ko mu gikorwa cyo gukurikirana uko amatora y’Abadepite mu 2018 yagenze neza, dore ko na Sosiyete sivile iba ifite inshingano zo gukurikirana uko yateguwe, imigendekere yayo kandi nyuma igatanga raporo ifasha NEC kugira ngo n’ay’ubutaha izayategure neza kurushaho igendeye ku nama iba yarahawe.

Avuga ko iyo raporo ifasha Abanyarwanda n’abanyamahanga bashaka kumenya uko amatora aba yaragenze babifashijwemo n’indorerezi sosiyete sivile iba ifite mu gihugu.

Sekanyange avuga ko kuva mu matora yo 2003, mu matora ya Perezida wa Repubulika 2017 no ku y’Abadepite uyu mwaka Sosiyete Sivile yagiye ikurikirana uburyo amatora akorwa ndetse igatanga na raporo zigamije kunoza imitegurirwe.

Avuga ko izo raporo zagiye zigira akamaro kuko inyinshi zagiye zigaragazamo ibishobora kubangamira imitegurirwe n’imigendekere myiza by’amatora kandi zigenda zifashishwa na NEC kugira ngo inoze neza imigendekere yayo.

Avuga ko uyu mwaka wa 2018 sosiyete sivile yari ifite indorerezi 305 mu gihugu hose harimo 264 bakoraga umunsi w’itora gusa, abandi 30 bakurikiranaga ibyo bikorwa ku rwego rw’akarere n’abandi 11 bari ku rwego rw’igihugu, izo zose zikaba ari zo zahurije hamwe raporo y’ibanze ku matora.

Komiseri muri Komisiyo y’Igihugu y’Amatora (NEC) Uwera Pelagie, avuga ko nka komisiyo idashobora gutegura no gukora amatora neza itabifashijwemo n’abafatanyabikorwa barimo nka Sosiyete sivile.

Ati Iyo urebye umubare w’abakozi NEC ifite bagera kuri 51 ukawugereranya n’uw’Abanyarwanda bari kuri lisiti y’itora 7 172 612 kandi basabwa kwigishwa bitari gukorwa n’abo bakozi gusa akaba ari yo mpamvu dushima uruhare rw’abafatanyabikorwa barimo sosiyete sivile badufasha kunoza ibitagenda neza amatora agatungana kuko abayitabiriye bashimye ibyayavuyemo.”

Avuga ko uruhare rwa sosiyete sivile mu matora y’abadepite 2018 rushingiye ku biganiro na NEC, guhererekanya inyandiko z’ibyo NEC yavugurura, ikindi gikomeye gishimwa ni uburyo bwo kwigisha uburere mboneragihugu bagahugura Abanyarwanda kandi bikaba bitanga umusaruro ufatika.

Avuga ko sosiyete sivile inafasha NEC mu gutanga indorerezi ku bwiganze bigatuma ntawaca hirya y’amategeko kandi hakabaho no kwitwararika. Aha, ashimangira ko bigira umusaruro mwiza w’uko buri gihe amatora abaye usanga yajemo umwihariko kandi NEC yiteguye kwakira no kunoza ibisabwa muri raporo ishyikirizwa.

Uwera avuga ko amatora arangwa n’ingengabihe kandi byose byubahirijwe neza uko buri gikorwa cyari giteganyijwe, ikagira ikindi gice cyo kwita kuri lisiti y’itora ari nacyo gikoresho gikuru mu matora, hakaba no kwakira abifuza kuba abakandida ndetse no kureba ibyavuye mu matora.

Uwera kandi yagaragaje ko NEC yishimiye ubwitabire bw’abakandida 521 bemejwe ku myanya 80 isabwa mu Nteko Ishinga Amategeko bifite igisobanuro kuko bigaragaza ubushake bw’abanyarwanda mu miyoborere y’igihugu cyabo no kubahiriza demokarasi.

Agira ati “Muri uwo mubare wose 521, harimo ubusabe (kandidature), 318 z’abakandida batanzwe n’imitwe ya politiki, izigera  179 ari abakandida ku myanya y’abagore 24 igize 30%, urubyiruko hemezwa kandidatire 26 naho abafite ubumuga hemezwa 10 zari zujuje ibisabwa”.

Uwera avuga ko kuba abiyamamaje bose barakiriye ibyavuye mu matora ari ibyishimo byinshi kuko yaranzwe n’umucyo n’amahoro.

Uhagarariye ishami ry’umuryango w’abibumbye ritsura amajyambere Fode Ndiaye yashimye uruhare rwa sosiyete sivile nyarwanda, ashima ubufatanye igirana na Leta by’umwihariko NEC mu gikorwa cy’amatora kuko bishimangira demokarasi bikazamura n’iterambere ry’igihugu.

Fode yasabye abahoraga bibwira ko sosiyete sivile nyarwanda ngo idashinga, kuza bakihera ijisho ndetse bakanayigiraho kuko igeze ku rwego ruri hejuru mu gushimangira demokarasi kandi ikaba n’umufatanyabikorwa mwiza mu nzego zitandukanye.

TANGA IGITEKEREZO

Leave a Reply

Your email address will not be published. Required fields are marked *