18°C , Partly cloudy | Kigali-Rwanda
Indorerezi z'amatora ziri mu Rwanda zagiranye ikiganiro na Komisiyo y'Igihugu y'Amatora, zihabwa amakuru y'ibanze ku matora y'Abadepite (Foto James R.)

NEC yaganiriye n’indorerezi z’amatora y’abadepite

Yanditswe na MUGISHA BENIGNE

Ku ya 31-08-2018 saa 07:46:05

Komisiyo y’Igihugu y’Amatora (NEC), yagiranye ikiganiro n’indorerezi z’amatora y’abadepite azaba mu cyumweru gitaha, aho Perezida w’iyi komisiyo Prof. Kalisa Mbanda yatangaje umubare w’indorerezi zimaze kuboneka, ndetse anatangaza ko amatora y’Abadepite   azatwara akayabo ka miliyari 5.4 z’amafaranga y’u Rwanda.

Indorerezi z’amatora ziri mu Rwanda zagiranye ikiganiro na Komisiyo y’Igihugu y’Amatora, zihabwa amakuru y’ibanze ku matora y’Abadepite (Foto James R.)

Iki kiganiro cyabaye ejo hashize ku wa Kane tariki 30 Kanama 2018, cyari kigamije guha indorerezi amakuru agezweho ajyanye n’amatora y’abadepite. Izi ndorerezi zakitabiriye ni iz’amahanga n’iz’Abanyarwanda.

Avuga ku ngengo y’imari y’amatora, Prof. Kalisa Mbanda yagize ati “Ingengo y’imari y’amatora y’Abadepite ingana na miliyari 5.4 z’amafaranga y’u Rwanda, kandi agera kuri 98% yatanzwe na Leta y’u Rwanda, 2% ni yo yonyine akomoka ku nkunga”.

Prof. Kalisa Mbanda yagarutse ku mubare w’Indorerezi z’amatora ukiri muto ugereranyije na site z’amatora ziri mu gihugu, ariko agaragaza ikizere ko umubare uziyongera biturutse ku ndorerezi z’imitwe ya Politiki n’abakandida bigenga bataratanga indorerezi  zabo.

Ati “Indorerezi z’abanyamahanga ni 184 naho iz’Abanyarwanda zituruka mu miryango ya sosiyete sivili zo ni 766, gusa twizera ko uyu mubare uziyongera muri iyi minsi, kuko imitwe ya Politiki n’abakandida bigenga bataraduha indorerezi zabo”.

Perezida wa Komisiyo y’Igihugu y’Amatora kandi yagaragarije indorerezi umubare w’abakandida bemewe n’iyi Komisiyo, avuga ko abakandida bose ari 521, barimo abagera kuri 318 bakomoka mu mitwe ya Politiki, 4 bigenga, 179 b’abagore, 26 b’urubyiruko, 10 biyamamariza guhagararira abafite ubumuga mu Nteko Ishinga Amategeko.

Yagarutse ku kwiyamamaza kw’abakandida n’igihe ntarengwa bagomba kuba basoje icyo gikorwa no kumanura ibirango bakoresheje biyamamaza.

Ati “Ku itariki ya 02 Nzeri 2018 i saa kumi n’ebyiri z’umugoroba, ni bwo kwiyamamaza kw’abakandida depite bizaba bisojwe, ni ngombwa kandi kuri uwo munsi n’iyo saha kuzaba bakuyeho ibirango byose bakoresheje biyamamaza”.

Imitwe ya Politiki irimo kwiyamamaza ni 5, ari yo Ishyaka riharanira kwishyira ukizana (PL), Ishyaka riharanira Demokarasi (PSD), PS Imberakuri,  Ishyaka rya Green Party n’Umuryango FPR-Inkotanyi.

Indorerezi zahawe umwanya wo kubaza ibibazo, zigaruka ku buryo  amatora rusange y’Abadepite  azakorwamo, babaza niba urupapuro rw’itora ruzaba ruriho abo bakandida 521 bose, umuntu agahitamo 53 bagomba gutorwa kuri uwo munsi.

Aha Perezida wa Komisiyo y’Igihugu y’Amatora yasobanuye ko urupapuro rw’itora ruba ruriho imitwe ya Politiki yiyamamaje uko ari 5 kongeraho abakandida bigenga, bityo utora agahitamo umutwe wa Politiki umwe cyangwa Umukandida wigenga.

Yousif Abouroaf, umwe mu bagize Inteko Ishinga Amategeko ya Sudani y’Epfo waganiriye n’Imvaho Nshya, yavuze ko basobanukiwe uko amatora y’Abadepite mu Rwanda akorwa, amabwiriza n’amategeko agenga indorerezi z’amatora, uburenganzira bwazo mu kugenzura amatora n’ibyo zibujijwe.

Naho Yama Dany Victorien, Indorerezi ikomoka mu gihugu cya Santarafurika, avuga ko yizeye ko amatora y’Abadepite mu Rwanda azakorwa neza mu mucyo no mu bwisanzure, kuko atari ubwa mbere ayajemo, aho avuga ko u Rwanda rumaze kugira ubunararibonye mu matora, ko nta mpungenge na nke afite ndetse ko iyo baje kuba indorerezi banatahana amasomo meza bavanye mu Rwanda.

Ati “Nta kibazo cy’amatora mu Rwanda, igihe cyose amatora ya hano ahora atanga amasomo ku bindi bihugu, n’ubu rero nizeye ko aya y’Abadepite agiye gukorwa azagenda neza nk’ayandi yose yahise”.

Amatora y’Abadepite azatangira tariki 2 Nzeri 2018, hakazatora Abanyarwanda bari mu mahanga bazatorera muri z’Ambasade, kuri uwo munsi kandi hazakorwa amatora y’abahagarariye abafite ubumuga azabera ku rwego rw’uturere.

Tariki ya 03 Nzeri 2018 hateganyijwe amatora rusange y’Abadepite azabera mu gihugu hose, naho tariki ya 04 Nzeri 2018 hakazakorwa amatora y’abakandida bahagarariye abagore bagize 30%, hakazatorwa abagore 24 bazinjira mu Nteko Ishinga Amategeko, kuri uwo munsi nyine hakazakorwa amatora y’abahagarariye urubyiruko azabera ku rwego rw’igihugu, ahazatorwa abantu babiri baruhagarariye bazinjira mu Nteko Ishinga Amategeko.

 

 

TANGA IGITEKEREZO

Leave a Reply

Your email address will not be published. Required fields are marked *