22°C , Partly cloudy | Kigali-Rwanda
Prof. Kalisa Mbanda perezida wa Komisiyo y'Igihugu y'Amatora mu kiganiro n'Itangazamakuru (Foto Gisubizo G.)

NEC imaze kwakira abakandida 16 bigenga bahatanira ubudepite

Yanditswe na TWAGIRA WILSON

Ku ya 11-07-2018 saa 06:47:18

Komisiyo y’Igihugu y’Amatora yatangaje ko kugeza ubu imaze kwakira abakandida bigenga 16 bahatanira kujya mu Nteko Ishinga Amategeko umutwe w’Abadepite, mu matora ateganyijwe muri Nzeri 2018.

Prof. Kalisa Mbanda perezida wa Komisiyo y’Igihugu y’Amatora mu kiganiro n’Itangazamakuru (Foto Gisubizo G.)

Perezida wa Komisiyo y’Igihugu y’Amatora Prof. Kalisa Mbanda yavuze ko umubare munini muri abo bakandida bigenga bari mu kiciro cy’urubyiruko, bakaba  baratangiye n’igikorwa cyo kujya mu turere gushaka imikono y’abagomba kubasinyira kugira ngo buzuze ibisabwa ku bashaka kujya mu nteko.

Ubuyobozi bwa Komisiyo y’Igihugu y’Amatora bwabitangaje ejo hashize mu kiganiro bwahaye itangazamakuru mu rwego rwo kugaragaza aho imyiteguro y’igikorwa cy’amatora kigeze, aho Perezida w’iyi Komisiyo Prof. Kalisa Mbanda n’Umunyabanga Nshingwabikorwa wayo Munyaneza Charles bavuze ko imyiteguro igenda neza kandi igeze kure, ku buryo n’abakorerabushake ba Komisiyo  y’Amatora bagera ku bihumbi 70 bafasha kwigisha uburere mboneragihugu bateguwe hirya no hino mu turere,  ndetse n’abakozi b’ingoboka bafasha mu bikorwa byo gucunga neza ibikoresho by’amatora nyirizina kugira ngo bige byifashishwa inshuro nyinshi, bose barateguwe ubu bakaba baramaze kugera aho buri wese azakorera.

Ku birebana n’abahatanira kujya mu nteko baba ari abigenga cyangwa abaturuka mu mashyaka ya politiki, Prof. Mbanda avuga ko urutonde ntakuka rw’abakandida bemejwe guhatanira kujya mu nteko NEC izarutangaza ku ya 6 Kanama 2018, mu gihe kwiyamamaza kw’imitwe ya politiki n’abakandida bizatangira ku ya 13 kugeza ku ya mbere Nzeri 2018.

Gufotora mu byumba byitora biremewe

Ashingiye ku mabwiriza mashya, Umunyabanga Nshingwabikorwa wa Komisiyo y’Igihugu y’Amatora Munyaneza Charles, yagarutse ku burenganzira bw’itangazamakuru mu bihe by’amatora y ‘Abadepite, aho yavuze ko noneho itangazamakuru ryemerewe gufata amafoto mu byumba by’itora, binyuranyije nuko mbere byari bimeze. Ati  «Ikibujijwe gusa ni ugufata amafoto mu bwihugiko aho utora aba agiye guhitamo uwo yatoye».

Amatora  rusange  mu Rwanda ku badepite  53 babarizwa mu mitwe ya politiki yemewe mu gihugu n’abigenga biteganyijwe ko azaba ku ya 3 Nzeri 2018, mu gihe ay’abadepite 24 bagize 30% by’abagore n’ayabazatorwamo  uhagarariye abafite ubumuga azaba ku ya 4 Nzeri,  igikorwa cyose cy’amatora kikazatwara ingengo yimari ya miriyari 5 z’amafaranga y’u Rwanda, aho 95% y’iyo ngengo yaturutse imbere mu gihugu.

TANGA IGITEKEREZO

Leave a Reply

Be the First to Comment!

avatar