21°C , Partly cloudy | Kigali-Rwanda

NAEB yahaye icyayi cy’u Rwanda abakora mu buvuzi bwa COVID-19

Yanditswe na Imvaho Nshya

Ku ya 21-05-2020 saa 16:25:43

Ikigo k’Igihugu cy’Ubuzima (RBC) cyashimiye  ubuyobozi bw’Ikigo k’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi (NAEB), bwageneye icyayi cy’u Rwanda abaganga n’abandi bakozi bari ku ruhembe rw’imbere mu kuvura no kurwanya icyorezo cya Koronavirusi (COVID-19).

RBC yatagaje ko yashyikirijwe icyo cyayi kuri uyu wa Kane tariki 21 Gicurasi 2020, kikaba kitezweho gufasha abo bakozi bakora amasaha 24 bagerageza gutabara ubuzima.

Umuyobozi wa RBC Dr. Ndanzimana Sabin, yavuze ko iyo mpano iziye igihe kuko icyo cyayi gikomeza gufasha abo bakozi kunoza akazi kabo ka buri munsi.

Yagize ati: “Iki cyayi kiziye igihe kuko kigiye gufasha cyane amatsinda yacu akora amasaha 24 buri munsi, mu kurwanya COVID-19. Turabashimiye, kugira icyo mutanga bigaragaza uburyo muha agaciro imirimo dukora.”

Kugeza ubu mu Rwanda hamaze gutahurwa abarwayi 314 ba COVID-19 barimo  216 bamaze gukira neza, mu gihe abakirimo kwitabwaho n’abaganga ari 98. Kugeza ubu ntawurabikwa ko yahitanywe n’icyo cyorezo kimaze guhitana abarenga ibihumbi 331 ku Isi.

Abanyarwanda batandukanye bakomeje kugaragaza ko banyuzwe n’ubwitange bw’inzego z’ubuzima ndetse n’abandi bose bitangiye guhashya COVID-19 mu Rwanda.

 

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.