27°C , Partly sunny | Kigali-Rwanda

Nduhungirehe yateye ingabo mu bitugu Iradukunda Elsa uri kuvuza abarwaye ishaza

Yanditswe na Gisubizo Gentil M.

Ku ya 12-02-2020 saa 16:07:11
Abakobwa bari bahanganiye ikamba rya Miss Rwanda 2020 bari baje gushyigikira Miss Iradukunda

Guhera ku wa Mbere tariki 10 Gashyantare 2020, Nyampinga w’u Rwanda 2017 Iradukunda Elsa yatangije igikorwa cyo kuvuza abagera kuri 300 abafite ikibazo cyo kutabona bitewe n’uburwayi bw’ishaza mu jisho batuye mu Karere ka Bugesera.

Miss Iradukunda Elsa yakomeje kuvuza abarwayi ku wa Kabiri tariki 11 Gashyantare 2020, ariko by’umwihariko akaba yaraherekejwe n’abakobwa 20 bari guhatanira ikamba rya Miss Rwanda 2020 mu rwego rwo kumushyigikira.

Minisitiri Nduhungirehe yasobanuriwe uburyo igikorwa cyo kubaga ishaza kigenda

Usibye aba bakobwa kandi n’Umunyamabanga wa Leta muri Minisiteri y’Ububanyi n’Amahanga, Olivier Nduhungirehe, nawe yagiye kureba aho iki gikorwa cya Nyampinga w’u Rwanda watowe mu 2017 kigeze.

Amaze kwerekwa imirimo iri kubera mu bitaro bya Bugesera akibonera uko abafite ubwo burwayi bari gufashwa, Minisitiri Nduhungirehe yasabye uyu mukobwa gukomeza gukora ibikorwa nk’ibi bifitiye abanyarwanda akamaro.

Ikindi yamusabye ni ugushyira imbaraga mu kubimenyekanisha ku buryo byaha isomo n’urundi rubyiruko aho ruri hose rukajya rufatira ingero kuri ibi bikorwa by’indashyikirwa.

Mu kiganiro n’abanyamakuru, Iradukunda Elsa, yavuze ko yahisemo gukorera iki gikorwa mu Karere ka Bugesera kuko ariho habonetse abenshi bamusaba kuba ariho akurikizaho nyuma yo kuva mu turere twa Rubavu, Nyamagabe na Huye aho yavuje abantu hafi barenga 1200.

Miss Iradukunda yagize ati “Ubushobozi bw’ibikorwa nk’ibi ntabwo bwabura cyane ko mfite abantu bamfasha, ndashimira ibitaro bya Kabgayi nk’ubu biba byifashe bikimura ibagiro ryabyo icyumweru cyose n’abaganga usanga bitanga bikomeye, ndabashimira kandi nibo bantera imbaraga zo gukomeza ibi bikorwa.”

Iki gikorwa kirakomeza kugeza mu mpera z’iki cyumweru havurwa abatuye Akarere ka Huye bafite ikibazo cy’indwara y’ishaza.

Babanje kwakirwa n’umuyobozi w’ibitaro bya Bugesera

Umwanditsi:

Gisubizo Gentil M.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.