28°C , Sunny | Kigali-Rwanda

Ndi Umunyarwanda ni Ndi Umukirisitu – Padiri Rutakisha

Yanditswe na Sezibera Anselme

Ku ya 12-09-2019 saa 11:40:52
Rutakisha avuga ko Ndi Umunyrwanda ari ndi Umukirisitu

Abayobozi b’Amadini n’Amatorero atandukanye mu Rwanda barahamya ko “Ndi Umunyarwanda” imaze kubageza ku ntera ishimishije mu kubaka ubunyarwanda n’ubumwe n’ubwiyunge muri Rusange.

Binashimangirwa kandi n’abahagarariye amatsinda atandukanye ashingiye kuri ayo madini n’Amatorero aho bagaragaza ko “Ndi Umunyarwanda” isigaye ituma biyumvanamo umwe ku wundi bitandukanye na mbere ya Jenoside yakorewe Abatutsi mu 1994 aho abayoboke b’Amadini n’Amatorero barangwaga n’amacakubiri ashingiye ku ivanguramoko, uturere ndetse n’igitsina.

Padiri Mukuru wa Paruwase ya Muhororo Rutakisha Jean Paul, avuga ko Ndi Umunyarwanda ari Ndi Umukirisitu kuko uyo uzanye amacakubiri mu Banyarwanda uba unayazanye mu Itorero cyangwa Idini usengeramo.

Rutakisha avuga ko Ndi Umunyarwanda ari ndi Umukirisitu

Avuga ko nyuma yo kubona ingaruka za Jenoside yakorewe Abatutsi mu 1994, Kiriziya Gaturika by’umwihariko muri Paruwasi ya Muhororo ndetse na Diyosezi yose ya Nyundo, bashinze icyo bise Sinodi, aho Abakirisitu bongera kwisuzuma no komorana ibikomere bya Jenoside no kongera kwiyunga n’Imana. Avuga ko intego ya Sinodi bayise ngo “Ubukirisitu butubyarire Ubumwe”, byose byashingiye kuri “Ndi Umunyarwanda”, iyi ntego ikaba yaratumye bongera kubaka Ubukristu bushingiye ku munyarwanda ufite indangagaciro za Kirazira.

Agira ati: “Navuga ko Ndi Umunyarwanda ari ndi Umukirisitu kuko ntaho bitaniye, mbere ya Jenoside hariho abantu babihishe mu madini no muri Kiriziya Gaturika, n’ubundi ntibivuze ko hatakiri abakibona muri icyo gihe, ariko tuzakomeza kwigisha kuko aho tugeze harashimishije.”

Umushumba w’Itorero ADPR Paruwasi Gahogo Rugaza Ephrem, avuga ko Ndi Umunyarwanda ari inzira y’urukundo Abakirisitu bakura n’ubundi mu mategeko y’Imana.

Agira ati “Yesu ajya mu Ijuru yasize adusabye kuba umwe nk’uko we na se bari umwe, ibyo bivuze ko twese Abanyarwanda bemera tugomba kuba umwe.

Rugaza Ephrem avuga ko Ndi Umunyarwanda ikurikiza Itegeko rya Yezu yasize araze abantu agiye kujya mu Ijuru

Iyo nshyigikiye Ndi Umunyarwanda mba nigiriye neza na mugenzi wange icyo gihe mba nubaka umuryango nyarwanda kandi iyo twubatse umuryango nyarwanda tuba twubatse Itorero.”

Umushumba w’Itorero MISPA Church Musabyimana Theoneste avuga ko “Ndi Umunyarwanda” ifasha inzira y’Ubukrisitu kurwanya ivangura iryo ari ryo ryose kuko mbere yo kwemera Imana ugomba kubanza kubaha no gukunda mugenzi wawe.

Agira ati “Mu itorero iyo tukwakiriye uba ugeze iwanyu mu rugo, nta bwo rero icyo gihe ugira abo uvangura mu itorero twese turangana n’Abanyarwanda rero tugomba kungana imbere y’umwe ku wundi nta vangura, kandi biradufasha cyane mu itorero ryacu.”

Musabyimana avuga ko Ndi Umunyarwanda Ituma Itorero rirushaho kunga ubumwe

Umushumba wa Diyosezi ya Kabgayi Musenyeri Simaragde Mbonyintege avuga ko “Ndi Umunyarwanda” ari umuco waranze Abanyarwanda kuva babaho n’ubwo nyuma byaje kuzamo igitotsi ndetse bikaza no kugera ku macakubiri yagejeje igihugu kuri Jenoside yakorewe Abatutsi kuko icyo gihe Abanyarwanda bari baramaze gutandukana.

Agira ati “Ndi Umunyarwanda nibe koko guharanira inyungu rusange z’Abanyarwanda, kubahana, kwitangira igihugu, atari ngombwa kujya ku rugamba ahubwo n’iyo ukora ibiteza imbere igihugu uba wubatse ubunyarwanda.”

Abafite imyemerere ishingiye kuri Isilamu bavuga ko na bo “Ndi Umunyarwanda” ifite agaciro kanini mu myemerere kuko mbere y’umwaduko w’Amadini Abanyarwanda barangwaga na “Ndi Umunyarwanda”.

Musengeri Simaragde avuga ko Ndi Umunyarwanda ikwiye guharanira inyungu rusange

Umuyobozi wa Isilamu mu Mujyi wa Kigali Sheikh Dawudi Bishokaninkindi, ashingiye ku myemerere ya Isilamu, avuga ko Idini yabo ishishikariza bwa mbere umuyoboke gukunda no kwitangira igihugu ke.

Agira ati: “Ndi Umunyarwanda icyo itwigisha ni ugukorera hamwe abato n’abakuru, nagira inama abigisha Iyobokamana bose ko mbere ya byose ‘Ndi Umunyarwanda’ ari we wubatse idini ye n’ibyo yemera”.

Abayoboke b’Amatorero n’amadini na bo bagaragaza ko Ndi Umunyarwanda ari isoko n’ishingiro ry’imyemerere yabo kuko ituma barushaho kwibona bamwe ku bandi bitandukanye na mbere ya Jenoside yakorewe Abatutsi mu 1994.

Sheick Bishokaninkindi avuga ko Imyemerere ishyira Ndi Umunyarwanda imbere kuko Islam ishyira imbere kwitangira igihugu

TANGA IGITEKEREZO

Leave a Reply

Your email address will not be published. Required fields are marked *