26°C , Partly sunny | Kigali-Rwanda

Ndekezi wamugariye ku rugamba arasaba urubyiruko gusigasira ibyagezweho

Yanditswe na TWAGIRA WILSON

Ku ya 02-02-2018 saa 07:36:50

Bamwe mu bamugariye ku rugamba  barimo Ndekezi John, batujwe mu mudugudu wa Nyarugunga, mu Murenge wa Nyarugunga mu karere ka Kicukiro mu Mujyi wa Kigali, barasaba urubyiruko ndetse n’abandi  guharanira gufata no gucunga neza ibyiza baharaniye birimo umutekano, imiyoborere ndetse n’imibereho myiza ubu Abanyarwanda bafite, ashima ko Leta ikomeje kubazirikana mu mibereho yabo.

Abamugariye ku rugamba batujwe mu mudugudu wa Nyarugunga bashima Leta uko ibitayeho (Foto James R.)

Abamugariye ku rugamba babivugiye mu murenge wa Nyarugunga mu kagari ka Kibaya aho bari bifatanyije n’inzego za Leta ndetse n’abaturage bo mu kagari ka Kibaya, mu biganiro biganisha kwizihiza ku nshuro ya 24 umunsi w’Intwari z’Igihugu, aho abari muri icyo gikorwa baganirijwe ku mateka y’u Rwanda n’ibyiciro by’Intwari zitandukanye by’umwihariko aho bagarutse ku magambo yasize avuzwe n’Umwami Rudahigwa waharaniye ko Abanyarwanda bava mu bukoloni.   Yasize agize ati “Nubwo ngiye ariko nzi neza ko u Rwanda ruzavukamo izindi Ntwari zizarugeza ku nkombe’’.

Mu kiganiro n’abanyamakuru, Ntwari Hardi uyobora umuryango w’abakorerabushake ushinzwe gukangurira urubyiruko ibikorwa by’ubutwari no gukunda igihugu, avuga ko ku bufatanye n’abandi bafatanyabikorwa bazakomeza gufasha abamugariye ku rugamba, binyuze mu mishinga n’amakoperative.

Naho Ndekezi John, umwe mu bamugariye ku rugamba yishimira ko  mu myaka 24 ishize batakwibagirwa ko hari icyo Leta yakoze igamije gufasha abamugariye ku rugamba kugira imibereho myiza bo n’imiryango yabo.

Akomeza agira ati “Kugeza ubu turishimira ko Leta itadutereranye yakomeje kuzirikana akazi twakoze n’uburyo twitanze, gusa byaba byiza kurushaho inzego zibishinzwe mu bushishozi bwazo zigize icyo zikora ku buryo na twe twashyirwa mu bagenerwabikorwa bafite ububasha bwo guhahira mu maguriro ahuriweho n’Ingabo, Polisi n’Urwego rw’Igihugu rushinzwe imfungwa n’abagororwa, byarushaho kudushimisha cyane.

Umudugudu wa Nyarugunga  uherereye mu kagari ka Kibaya muri Nyarugunga, utuwemo n’imiryango y’abamugariye ku rugamba igera kuri 27, bubakiwe amazu agezweho yihariye afite amashanyarazi n’amazi  ndetse n’inzu mberabyombi, bakaba baribumbiye mu makoperative yatumye bishyira hamwe bategura imishinga y’ubuhinzi igamije kubateza imbere.

TANGA IGITEKEREZO

Leave a Reply

Your email address will not be published. Required fields are marked *