27°C , Partly sunny | Kigali-Rwanda
Miss Rwanda 2018 Iradukunda Liliane yambika ikamba umusimbuye, Nimwiza Meghan, mu ijoro ryo kuwa 26 Mutarama 2019

Ndatangira gushyira mu bikorwa umushinga wange vuba – Miss Nimwiza

Yanditswe na Ndamyirokoye François

Ku ya 07-02-2019 saa 17:40:55

Nyampinga w’u Rwanda 2019 Nimwiza Meghan aratangaza ko vuba aha azatangira umushinga yiyemeje wo gukangurira urubyiruko kwitabira ubuhinzi.

Nimwiza avuga ko akomeje kuganira n’abamugira inama kugira ngo atangire ariko mu cyumweru gitaha ashobora gutangira kuwushyira mu bikorwa.

Avuga ko azibanda ku kujya mu bigo by’amashuri yisumbuye ari kumwe na rumwe mu rubyiruko rwatangiye ibijyanye n’ubuhinzi ndetse n’abandi bazobereye ibijyanye n’ubuhinzi bamwunganire mu gusobanurira urubyiruko.

Ashimangira ko urubyiruko nirusobanukirwa ibijyanye n’ubuhinzi bizagira akamaro gakomeye ku gihugu.

Nimwiza Meghan ubwo yasubizaga ibibazo by’abagize akanama nkemurampaka ku munsi wa nyuma w’irushanwa

Uko amerewe n’ubuzima bw’ubwamamare

Nimwiza Meghan avuga ko arimo kugenda amenyera kuba icyamamare ngo nubwo bikiri bishya kuri we ngo gusa habaye impinduka nini ku buzima bwe kuko ubu yamenywe n’abantu benshi bitandukanye na mbere.

Kubera kumenywa cyane avuga ko ubu avugwa na benshi banyuranye harimo abamushyigikiye ndetse n’abatamushyigikiye ngo ariko byose arimo kugenda abimenyera kuko kuba icyamamare ibyo byose bibaho.

Miss Rwanda 2019 Nimwiza Meghan n’ababyeyi be, nyuma yo gutangazwa ko ari we Miss Rwanda 2019

Nyampinga w’u Rwanda 2019 Nimwiza Meghan yambitswe ikamba ku ya 26 Mutarama 2019 asimbuye Iradukunda Liliane ufite ikamba rya Miss Rwanda 2018.

Yambitswe ikamba asa n’utunguranye kuko atari mu bavugwaga cyane ku mbuga nkoranyambaga no mu bitangazamakuru, ndetse no mu manota y’abatorwaga n’abaturage kuri SMS yakundaga kuza mu myanya ya nyuma.

Nyuma ya Jenoside yakorewe Abatutsi hamaze gutorwa ba Nyampinga b’u Rwanda batandukanye ari bo Bahati Grace, Mutesi Aurore, Kundwa Doriane, Akiwacu Colombe, Mutesi Jolly, Iradukunda Elsa, Iradukunda Liliane ndetse na Nimwiza Meghan ufite ikamba rya Nyampinga w’uyu mwaka.

Miss Rwanda 2018 Iradukunda Liliane yambika ikamba umusimbuye, Nimwiza Meghan, mu ijoro ryo kuwa 26 Mutarama 2019

TANGA IGITEKEREZO

Leave a Reply

Your email address will not be published. Required fields are marked *