18°C , Mostly cloudy with showers | Kigali-Rwanda

NCC: Inama Nkuru y’Igihugu y’Abana izibanda ku burenganzira bwabo

Yanditswe na Kayitare Jean Paul

Ku ya 19-11-2019 saa 10:56:02
Dr Uwera Kanyamanza Claudine, Umunyamabanga Nshingwabikorwa wa NCC, yagaragaje ibyo Inama Nkuru y'Igihugu y'Abana ku nshuro ya 13 izibandaho (Foto Nzabagerageza B.)

Inama y’Igihugu y’Abana (NCC), yatangaje ko Inama Nkuru y’Igihugu y’Abana ku nshuro ya 13 iteganyijwe kuba ejo ku wa Gatatu tariki 20 Ugushyingo 2019 igahuzwa n’Umunsi Mpuzamahanga w’Umwana izibanda cyane ku bibazo bibangamira uburenganzira bw’abana ndetse bakazigishwa ku burenganzira bwabo.

Umunyamabanga Nshingwabikorwa w’Inama y’Igihugu y’Abana, Dr. Uwera Kanyamanza Claudine, yagaragarije abanyamakuru ko Inama Nkuru y’Igihugu y’Abana yo ku nshuro ya 13 izaba umwanya wo kugaragariza abana amayeri ababasambanya bakoresha no kubakangurira gutanga amakuru ku gihe, igihe hari ushaka kubasambanya cyangwa yabikoze.

Insanganyamatsiko y’Inama Nkuru y’Igihugu y’Abana ya 13, Dr. Kanyamanza yavuze ko yatoranyijwe hagamijwe gukangurira abana kugira uruhare mu kugira uburere bwiza cyane cyane mu kurwanya gusambanywa kwabo. Insanganyamatsiko igira iti ‘Uruhare rw’umwana mu burere buboneye’.

Yavuze ko abana bazitabira iyi nama ari 580 bavuye mu mirenge, hakiyongeraho abahagarariye abana bafite ubumuga ndetse n’abahagarariye abandi bana batuye mu nkambi zitandukanye mu Rwanda.

Avuga ko abana bazaganirizwa ku burenganzira bwabo. Yagize ati “Uburenganzira bw’abana bufite inkingi zitandukanye duhereye ku burenganzira bwo kugira aho bavuka, kwandikwa, kuvuzwa, ubuzima bw’imyororokere n’ibindi.”

Yongeyeho ati “Nubwo tubasaba kugira uruhare mu burere bwabo ariko muri iyo nama tuzagaruka cyane ku bijyanye n’imyitwarire yabo, hagarukwe ku gusambanya abana, inda ziterwa abana kugira ngo bagire amakuru, bamenye uko bakwiye kwitwara, bigishwe kandi twumve n’ibitekerezo byabo.”

Kanyamanza akomeza avuga ko iyi nama bayitezemo byinshi. Ati “Dufite itegeko ryo kurengera umwana, dufite poritiki y’uburenganzira bw’umwana, poritiki yo kurwanya imirimo ivunanye ikoreshwa abana, dufite poritiki nyinshi cyane.”

Avuga ati “Dufite gahunda zitandukanye zijyanye n’imikurire y’abana nka gahunda y’imbonezamikurire y’abana bato. Hari ibyo dusaba ababyeyi kuko abana bavuka mu miryango ariko nanone hari ibyo dusaba abana ari nayo mpamvu tuba twabazanye kugira ngo banabyumve hakiri kare.”

Yasabye abana kwirinda ingeso mbi kandi ko bishoboka cyane cyane ingeso mbi zishobora kubashora mu busambanyi.

Ati “Abana tubagire inshuti zacu nk’ababyeyi kugira ngo nabyo bishoboke. Dukwiye kubatoza kunyurwa n’ibyo ababyeyi babo babahaye, twifuza ko abana bava mu nama bumva ko hari icyo tubatezeho.”

Rajat Madhok, Umuyobozi w’Ishami ry’Itumanaho mu Ishami ry’Umuryango w’Abibumbye ryita ku bana mu Rwanda (UNICEF Rwanda), avuga ko abana barenga 90% bari mu ishuri, ibyo bikaba bigaragaza ko abana b’abakobwa n’abahungu bafite uburenganzira bungana.

Ati “U Rwanda rwabigezeho kandi ikindi twishimira ni uko rumaze kugabanya n’imfu z’abana bapfa bavuka. Ikindi ni uko abana bakoreshwa imirimo ivunanye, umubare wabo wagabanutse ku buryo bugaragara. Uburyo bwo kubona amazi meza ndetse no kugera ku bigo nderabuzima nabyo byariyongereye ku kigero cya 83%. Ni byiza ko abana bigishwa kugira ngo bamenye uburenganzira bwabo ari nayo mpamvu hategurwa inama nk’izi.”

Rajat avuga ko abana bakwiye kurindwa imirimo ivunanye ariko icyo ngo bishimira ni uko abana bose bari muri gahunda y’imbonezamikurire.

Amahoro Natasha, uhagarariye abana mu karere ka Bugesera, agaragaza ko ikintu cya mbere iyi inama izabamarira, ari uko babasha kugera ku bantu bakuru bakabisanzuraho.

Ati “Nkuko mubizi mu Rwanda hari abana bagenda baterwa inda zitateguwe, mu by’ukuri umwana nta bwo ashobora kugenda ngo yihe abantu bakuru, ahubwo abantu bakuru ni bo bashaka kuza gushuka abo bana ndetse bakabashukisha ibintu bidafite agaciro ku buzima bwabo. Icyo mbona ni ubugome baba bafite mu mitima yabo bashaka guhungabanya uburenganzira bw’umwana.” Akomeza asaba ababyeyi kutabatinya, bityo bakabigisha iby’ubuzima bwabo.

Hagaragajwe ibizaganirwaho mu Nama Nkuru y’Igihugu y’Abana izaba ejo ku wa gatatu ku munsi mpuzamahanga w’umwana (Foto Nzabagerageza B.)

Umwanditsi:

Kayitare Jean Paul

Tanga Igitekerezo

Email yanyu ntigaragazwa ku rubuga. Amazina na Email ni ngombwa.