22°C , Partly cloudy | Kigali-Rwanda
Perezida wa Madagascar Hery Rajaonarimampianina arimo kwakira kandidatire ya Louise Mushikiwabo ku mwanya w'Ubunyamabanga Bukuru bwa OIF

Mushikiwabo yamaze gutanga kandidatire ku buyobozi bwa OIF

Yanditswe na UWIMANA DONATHA

Ku ya 12-07-2018 saa 06:29:23

Minisitiri w’Ububanyi n’Amahanga  n’ibikorwa by’Umuryango w’Afurika y’Iburasirazuba, Madamu Louise Mushikiwabo,  yamaze gutanga ku mugaragaro  kandidatire ye ku mwanya w’Umunyamabanga Mukuru w’Umuryango uhuza Ibihugu bivuga ururimi rw’Igifaransa, OIF.

Perezida wa Madagascar Hery Rajaonarimampianina arimo kwakira kandidatire ya Louise Mushikiwabo ku mwanya w’Ubunyamabanga Bukuru bwa OIF

Minisitiri Louise Mushikiwabo akaba yarageze i Antananarivo muri Madagascar ejo hashize tariki 11 Nyakanga 2018, aho yatanze iyi kandidatire ye.  Yakiriwe na Hery Rajaonarimampianina, Perezida wa Madagascar, akaba ari we kuri ubu uyoboye uyu muryango wa OIF uhuza ibihugu 57 bikoresha Igifaransa.

Mushikiwabo na Perezida wa Madagascar Rajaonarimampianina bakaba baraganiriye ku ngingo zitandukanye, harimo ingingo irebana n’uko Umunyamabanga mukuru mushya wa OIF agomba kuzibanda ku gushakira ibisubizo bifatika ikibazo k’imirimo ku rubyiruko rwo mu bihugu bivuga Ururimi rw’igifaransa.

Muri iki gihugu cya Madagascar, aherekejwe na Dr. Donald Kaberuka, Umunyarwanda wahoze ayobora Banki Nyafurika Itsura Amajyambere, Minisitiri Mushikiwabo yahuye na Minisitiri w’Ububanyi n’Amahanga w’iki gihugu Dovo Eloi Maxime bagirana ibiganiro.

Ibi biganiro bagiranye bikaba byaribanze ahanini ku hazaza h’Umuryango uhuza ibihugu bikoresha Igifaransa, ndetse no ku mubano hagati y’ibihugu byombi.

Uturutse ibumoso ni Minisitiri w’Ububanyi n’Amahanga wa Madagascar Dovo Eloi Maxime, Minisitiri Louise Mushikiwabo, Perezida Hery Rajaonarimampianina na Dr. Donald Kaberuka

Mushikiwabo atanze kandidatire ye, mu gihe Abakuru b’Ibihugu na za Guverinoma by’Umuryango w’Ubumwe bw’Afurika baherutse kwemeza kuzashyigikira kandidatire ye, bari mu nama ya 31 y’uyu muryango baherutse guhuriramo i Nouakchott muri Mauritania.

Amatora y’Umunyamabanga Mukuru w’uyu Muryango uhuza ibihugu bikoresha ururimi rw’Igifaransa, azaba ku matariki ya 11 na 12 Ukwakira uyu mwaka mu nama yawo izabera Everan mu gihugu cya Romania.

Mushikiwabo akazaba ahanganye n’Umunyakanadakazi Michaëlle Jean usanzwe kuri uyu mwanya kuva mu 2014. Mushikiwabo kandi kandidatire ye inashyigikiwe na Perezida w’u Bufaransa Emmanuel Macron, nk’uko yabitangaje muri Gicurasi uyu mwaka.

TANGA IGITEKEREZO

Leave a Reply

Be the First to Comment!

avatar