22°C , Mostly cloudy | Kigali-Rwanda
Minisitiri w’Ububanyi n’Amahanga n’Umuryango w’Afurika y’Iburasirazuba, Mushikiwabo Louise ashishikariza abanyamakuru kuvuga amakuru y'Afurika (Foto James R)

Mushikiwabo arasaba abanyamakuru b’Afurika kuvuga inkuru z’iwabo

Yanditswe na TWAGIRA WILSON

Ku ya 13-03-2018 saa 07:01:06

Minisitiri w’Ububanyi n’Amahanga n’Umuryango w’Afurika y’Iburasirazuba, akaba n’Umuvugizi wa Guverinoma, Mushikiwabo Louise, asanga igihe kigeze ngo abanyamakuru bo kuri uyu mugabane w’Afurika bareke guceceka, ahubwo bashyire imbere umuco wo gutara no gutangaza  inkuru  zirebana n’iterambere ryawo.

Minisitiri w’Ububanyi n’Amahanga n’Umuryango w’Afurika y’Iburasirazuba, Mushikiwabo Louise ashishikariza abanyamakuru kuvuga amakuru y’Afurika (Foto James R)

Minisitiri Mushikiwabo yabitangarije i Kigali kuri uyu wa Mbere, ubwo yatangizaga inteko rusange ihuje abayobozi b’ibigo by’itangazamakuru mu bihugu 40 bikoresha uburyo bw’amajwi n’amashusho bo muri Afurika (African Union Of Broadcasting). Abari muri iyi nama barigira hamwe uburyo bwo kwimuka bakava mu ikoreshwa rishaje (Analogue) bagatangira gukoresha ikoranabuhanga rigezweho (digital).

Mu butumwa bwe, Minisitiri Mushikiwabo yibukije abahagarariye amaradiyo na televiziyo ko mu by’ukuri Afurika ifite icyo yabwira abaturage bayo ndetse n’Isi muri rusange, kandi birahari byiza, kuruta kuvuga iby’ahandi. Ati “Igihe kirageze ngo abanyamakuru b’Afurika bareke guceceka, ahubwo batangire bavuge amakuru y’ibibera iwabo. Nk’ubu hari amakuru meza arebana no kwishyira hamwe ku bihugu, ishoramari mu ikoranabuhanga n’ibindi.  Itangazamakuru ry’Afurika rikwiye gushyiraho urubuga rwafasha guhatana n’ibindi bitangazamakuru mpuzamahanga”.

Gusa asanga igikomeje kuba inzitizi, ari uko bimwe mu bihugu bitaratangira gukoresha ikoranabuhanga rigezweho, ariko ku ruhande rw’u Rwanda hari icyakozwe. Yagize ati “Ku ruhande rw’u Rwanda, ubu ikoranabuhanga rigezweho ryatangiye gukoreshwa guhera mu 2014, ndetse ku buryo u Rwanda ruri imbere gato y’intego ITU yihaye, ubu hari televiziyo zisaga 12 zatangiye gukora kandi zaje ziyongera ku yindi yari isanzwe ihari.”

Perezida w’ibigo by’itangazamakuru bikoresha uburyo bw’ikoranabuhanga ry’amajwi n’amashusho bo muri Afurika, Dr Kwame Akuffo Anoff–Ntow, agira inama abahagarariye ibigo by’itangazamakuru byo muri Afurika ko kwishyira hamwe nk’abasangiye umwuga kandi bakawukora neza bifashishije  uburyo bw’ikoranabuhanga rigezweho bageza amakuru ku banyafurika,  ari bimwe mu byafasha abatuye umugabane  kwigobotora  ubukoloni bwo hanze.

Umujyanama wihariye w’umunyamabanga wa Smart Africa Nsengimana Jean Philbert  yibutsa isano iri hagati y’urwego rw’ikoranabuhanga n’itangazamakuru kuko byuzuzanya, avuga ko ari nayo mpamvu usanga ibikorwaremezo  kugeza ubu bimaze  gushyirwaho  ari nabyo byifashishwa mu kazi ko gutangaza amakuru hakoreshejwe  uburyo bugezweho.

 

 

TANGA IGITEKEREZO

Leave a Reply

Be the First to Comment!

avatar