21°C , Partly sunny | Kigali-Rwanda
Abayobozi batandukanye bitabiriye umuhango wo gusoza ingando z'aba banyarwanda batahutse bava muri Kongo

Musanze:Abanyarwanda 72 bavuye mu mashyamba ya Kongo basubiye mu buzima busanzwe

Yanditswe na NGABOYABAHIZI PROTAIS

Ku ya 17-02-2018 saa 07:40:54

Abanyarwanda 72 baherutse gutahuka bava mu mashyamba ya Repubulika iharanira Demokarasi ya Kongo, basoje ingando bakoreraga mu kigo k’igihugu gishinzwe gusezerera no gusubiza mu buzima busanzwe abahoze mu ngabo.

Abayobozi batandukanye bitabiriye umuhango wo gusoza ingando z’aba banyarwanda batahutse bava muri Kongo

Bagaragaje ko n’ubwo babaye mu mitwe yitwara gisirikare mu mashyamba igihe kirekire, ariko amasomo bahawe azabafasha kubana neza n’abandi banyarwanda, ndetse bagafatanya kubaka igihugu.

Lieutenant Mfashadusenge Emmanuel, yagize ati “Maze imyaka isaga 20 nzenguruka mu mashyamba ya Kongo, nta nzu, nta mwana wange wiga, nta nka, nta hene, mbese ndi umuntu uzi ko ndamutse ariko ntirirwa.

Ibi ni ibintu nge na bagenzi bange byadusubije inyuma, ariko rero ngo burya habanza ubujiji nyuma ubwenge bukaziraho, nasanze ngiye kuzagwa ku gasi mfite igihugu cyange mpitamo gutaha.”

Yakomeje agira ati:“Nasanze u Rwanda uko barutubwiraga mu mashyamba ndetse no ku maradiyo anyuranye atari ko rumeze, narahageze ndakirwa, ndigishwa mbese ubu ni Paradizo, birambabaza iyo mbonye abana bacu tukiri mu mashyamba baramaraga imyaka 18 batazi gusoma, ariko uw’itatu hano yandika neza avuga icyongereza, igifaransa n’izindi narumiwe ngeze hano, naramwaye rwose.

Twataye igihe twica n’abana bacu mu bwenge, nshimye ariko ko tuvuye hano tuzi gusoma no kwandika ku batari babizi”.

Mfashadusenge akomeza avuga ko ngo yigishijwe byinshi ku bijyanye n’imibanire n’abandi, kwiteza imbere, abyigiye mu kigo cya Mutobo, ahamya ko ari kaminuza u Rwanda rwishyurira buri munyarwanda wese utahutse.

Umuyobozi wa Komisiyo yo gusezerera no gusubiza mu buzima busanzwe abahoze mu ngabo, Mukantabana Seraphine, yagize ati “Igihugu cyacu kihaye intego ko nta muturage wacyo n’umwe uzandagara mu mahanga, ari yo mpamvu usanga Leta y’’u Rwanda buri gihe isaba abari hanze gutahuka.

Mwebwe rero muri abagabo, muri abantu bakwiye gushimwa kuko mwahisemo neza mu gatahuka mu rwababyaye, murasabwa rero gukora cyane kuko ntawasubiza ibihe inyuma, ariko na none nimushyireho umwete mugende ku murongo umwe n’abo musanze, murasabwa kandi kubana neza n’abanyarwanda musanze mu gihugu”.

Yakomeje agira ati:“Nimwicare mutuze, mwirindwe gushyira akaguru aha ngo akandi mugashyire aho ntazi kuko bizabasubiza inyuma, mwumve ubuyobozi bwanyu n’aho abishuka ngo bazongera guhemukira u Rwanda kuko muzi ko byabananiye mubihorere.

Nta kintu muzanye mu ntoki nk’imitungo, ariko na none icya mbere mufite hano ni igihugu cyanyu kandi kizakomeza kubaba hafi muri byose”.

TANGA IGITEKEREZO

Leave a Reply

Be the First to Comment!

avatar