23°C , Mostly cloudy | Kigali-Rwanda
Imihanda iri kubakwa mu nsisiro za Musanze igeze kuri 80% (foto Ngaboyabahizi P)

Musanze: Imihanda yubakwa mu nsisiro izuzura bitarenze Kamena

Yanditswe na NGABOYABAHIZI PROTAIS

Ku ya 02-04-2018 saa 08:54:18

Banki y’Isi itera inkunga ibikorwa byo kubaka imihanda mu nsisiro z’Akarere ka Musanze iratangaza ko hakurikijwe aho ibikorwa bigeze, iyi mihanda izuzura muri Kamena.

Imihanda iri kubakwa mu nsisiro za Musanze igeze kuri 80% (foto Ngaboyabahizi P)

Imihanda irimo kubakwa ifite ibilometero bisaga 4,5; abaturage bagahamya ko iyi mihanda ije kubakura mu bwigunge ndetse n’ubutaka bwabo bukagira agaciro.

Zishan Karim Lennarz impuguke mu by’imigi muri Banki y’Isi yavuze ko yishimiye ko ibikorwa byo kubaka iyi mihanda bigenda neza, ati: “Ibi ni ibikorwa byatewe inkunga na Banki y’Isi, twishimiye ko bigenda neza, n’uburyo Leta y’u Rwanda ibikurikiranira hafi, twizeye tudashidikanya ko uyu mushinga uzaba urangiye gushyirwa mu bikorwa muri Kamena uyu mwaka duhereye ku buryo ibikorwa birimo kugenda. Tuzagaruka kureba aho bizaba bigeze icyo gihe”

Yavuze ko iyi ni imihanda yatoranyijwe na Leta y’u Rwanda iterwa inkunga na Banki y’Isi.

Ati: “Twumva ko ari umushinga uzagirira akamaro abaturage ku buryo bufatika bakavugurura imibereho yabo, iki gikorwa kandi kigamije no gutunganya imigezi inyura mu mujyi wa Musanze, ituruka muri parike y’ibirunga”.

Umwe mu baturage bo murenge wa Muhoza ahubatswe iyi mihanda n’ibiraro binyuranye, Muhire Jean Bosco, yagize ati: “ Kuba turimo kubakirwa imihanda irimo kaburimbo, iki ni igikorwa kije guhesha agaciro imirima yacu, ndetse n’iterambere rigiye kutugeraho mu buryo busesuye, wajyaga mu mugi guhaha ukaza na moto mwagera ku kiraro ukavaho ukongera gutegereza umuntu wikorera ku  mutwe.

Iyi mihanda rero ije gukemura ibi bibazo byose, tugiye kujya tuzigama amatike, kandi n’umutekano wacu ugiye kwiyongera kuko amazi yazaga akajyana ibintu byacu kubera ko nta biraro byari bihari, ariko ubu ibiraro ku mugezi wa Rwebeye, Susa, Muhe n’ahandi ubu birimo kubakwa ku buryo dufite ikizere ko haba mu mvura tuzajya twambuka uko dushatse”.

Yakomeje agira ati: “Kongera guherekeza abana bacu ku ishuri ubu turabisezereye bazajya bigeza ku ishuri, nta bwo twari tuzi ko mu mudugudu wacu haza kaburimbo nk’iyi, ikindi dushima ni uko iyubakwa ry’iyi mihanda ryatumye tubona akazi ubu tukaba twiteza imbere ”.

Umunyamabanga Nshingwabikorwa w’Akarere ka Musanze Bagirishya Peter Claver avuga ko ari imihanda izaba ikoze neza kandi abaturage basabwa kuyifata neza kuko ari iyabo.

Iyi mihanda ireshya n’ibilometero 4.5 ikaba izuzura itwaye agera kuri miliyari 5 na miliyoni 100 z’amafaranga y’u Rwanda abaturage bavuga ko izahindura isura y’umujyi wabo.

 

 

 

 

 

 

 

TANGA IGITEKEREZO

Leave a Reply

Your email address will not be published. Required fields are marked *