21°C , Partly cloudy | Kigali-Rwanda

Musanze: Hamuritswe imbuto nshya y’ibirayi yitezweho kongera umusaruro

Yanditswe na TWIZEYIMANA FABRICE

Ku ya Aug 3, 2018

Ikigo k’igihugu gishinzwe guteza imbere ubuhinzi n’ubworozi (RAB) n’abafatanyabikorwa bacyo, bamuritse amoko asaga atandatu y’imbuto nshya y’ibirayi, yitezweho kuzamura umusaruro w’ibirayi mu gihugu.

Abahinzi bo mu karere ka Musanze bishimiye umusaruro babonye ku mbuto zimaze igihe zigeragezwa (Foto Twizeyimana F)

Ni imbuto yatunganyijwe ndetse igeragezwa ku bufatanye bwa RAB, Ikigo mpuzamahanga giteza imbere ibinyabijumba, CIP (International Potato Center) , Ikigega cya Leta Zunze Ubumwe z’Amerika gishinzwe iterambere mpuzamahanga (USAID) kibinyujije mu mushinga wacyo PSDAG, n’abandi bafatanyabikorwa.

Mu muhango wo kumurika aya moko atandukanye y’ibirayi, wabereye mu karere ka Musanze kuwa 1 Kanama 2018, hagaragajwe ko izi nzego zose ziyemeje gufatanya mu gushaka uburyo abahinzi b’ibirayi babona babona ubwoko bwinshi bw’ibirayi, ku buryo ari bo bihitiramo ibyo bahinga bijyanye n’ibyo isoko bafite ribasaba.

Ubuyobozi bwa RAB bwavuze ko amoko asaga 6 ari yo yamaze gukorerwa igeragezwa, ku buryo abahinzi bashobora gutangira kubihinga.Mu gushakira abahinzi iyi mbuto, hibanzwe cyane ku mbuto y’ibirayi ishobora kwihanganira imihindagurikire y’ikirere n’indwara zitandukanye zikunze kwibasira ibirayi, ndetse kandi ikaba inatanga umusaruro ushimishije.

Dr Bucagu Charles, Umuyobozi wungirije wa RAB, ushinzwe guteza imbere ubushakashatsi n’ikoranabuhanga mu buhinzi,  yashimye aba bafatanyabikorwa biyemeje kunganira Leta muri gahunda nziza yihaye yo kongera umusaruro, abanyarwanda bakihaza mu biribwa ndetse bagasagurira n’amasoko bakabona amafaranga.

Yagize ati “Iki gikorwa twakoze uyu munsi ni ikimenyetso kigaragaza ko intego twihaye yo kuzamura umusaruro w’ibihingwa bikuru n’ibirayi birimo ishoboka.Kuzamura umusaruro bihera ku mbuto nziza, ni ukuvuga ko imbagara nyinshi zizakomeza gushyirwa mu gushaka imbuto ibere aho muhinga,  ariko n’imbuto itanga umusaruro.

Niyo mpamvu aya magerageza akorwa  agomba gukorerwa muri RAB, ndetse agakorerwa aho mutuye kugira ngo ajyane n’ibyo n’imiterere yahoo kandi anajyanye n’imbuto mwifuza, itanga umusaruro, yihanganira indwara.Ubwo rero ni ikintu gikomeye tugana muri ya ntego yo kuzamura umusaruro, twihaze ariko dusagurire n’isoko.”

Umuyobozi wungirije wa USAID mu Rwanda Kevin Armstrong, yavuze ko baterwa ishema no gutera inkunga ubushakashatsi bugamije kongera umusaruro w’ubuhinzi, kuko bifuza ko abanyarwanda bakora ubuhinzi bubafasha kubona ibyo kurya bihagije kandi bukabinjiriza amafaranga bakiteza imbere.

Kirimi Sindi, umuyobozi w’Ikigo mpuzamahanga giteza imbere ibinyabijumba, (CIP) mu Rwanda, yavuze ko bifuza ko ubuhinzi bw’ibirayi bukorwa kinyamwuga, ku buryo buri muhinzi azajya ahinga imbuto y’ibirayi runaka bitewe n’aho azabihinga ndetse n’isoko azabigurishamo.

Yagize ati “Hari abazajya bakenera guhinga ibirayi byo kugurisha mu nganda zibitunganya, hari abazajya bakenera ibyo kurya mu rugo…hari ubwoko bw’imbuto yagenewe guhingwa mu bice bishyuha cyane mu Burasirazuba bw’igihugu, mbese turifuza ko umuhinzi abona imbuto y’amoko atandukanye akihitiramo bijyanye n’ibyifuzo bye.”

Dr Kirimi yakomeje avuga ko bifuza ko mu mwaka utaha bazaba bamaze kubona ubwoko bugera ku 10 bushobora guhingwa, kandi ngo ku bufatanye n’izindi nzego barimo gukorana bizeye ko bizagerwaho.

Abahinzi b’ibirayi mu karere ka Musanze bafite ikizere ko imbuto nshya izabafasha kongera umusaruro mu bwinshi no mu bwiza, bakarushaho kwihaza bakanasagurira amasoko, dore ko n’ubusanzwe aka karere gafatwa nk’ikigega k’igihugu ku musaruro w’ibirayi.

Hakizimana Thomas ukorera ubuhinzi muri Cyuve, akaba ari umwe mu bahawe imbuto z’ibirayi zikiri mu igeragezwa, yagize ati “Njye nakoze igerageza ry’imbuto snya 5, kuva mu mpero za  Werurwe kuri ubu zikaba zamaze gusarurwa nk’uko mwabibonye.Zimwe muri zo ziratanga ikizere cyo kuzavamo imbuto nziza zitanga umusaruro mwiza kandi  ubereye isoko, uzatuva kwiteza imbere.”