22°C , Mostly cloudy | Kigali-Rwanda
Ubwo intumwa za FEASSSA zari zimaze gusura Musanze mu rwego rwo kureba ko hujuje ibisabwa kugira ngo hazabere imikino ya FEASSS 2018 (Foto Ngaboyabahizi P)

Musanze byemejwe ko izakira imikino ya FEASSSA 2018

Yanditswe na NGABOYABAHIZI PROTAIS

Ku ya 16-01-2018 saa 07:36:27

Impuguke mu birebana n’imikino ziturutse mu bihugu byo muri Afurika y’Iburasirazuba, zakoze igenzura ku bibuga byo mu ntara y’Amajyaruguru mu karere ka Musanze, maze zemeza ko  imikino  ihuza amashuri yisumbuye yo mu karere k’Afurika y’ i Burasirazuba “FEASSSA 2018”   izabera mu Karere ka Musanze muri Kanama 2018.

Umuyobozi w’ishyirahamwe ry’imikino ihuza amashuri yisumbuye yo mu karere k’Afurika y’i Burasirazuba “FEASSSA”, Mugisha Justus yatangaje ko  nyuma yo gusura   ibigo by’amashuri n’amacumbi binyuranye basanze ari nta makemwa  ko nta cyatuma  iyi mikino itabera mu Rwanda.

Ubwo intumwa za FEASSSA zari zimaze gusura Musanze mu rwego rwo kureba ko hujuje ibisabwa kugira ngo hazabere imikino ya FEASSS 2018 (Foto Ngaboyabahizi P)

Yagize ati “Ibibuga ni byiza n’ubwo hari bike bikeneye gukosorwa ariko tuzagaruka mu mpera za Gicurasi 2018, tuze kureba uko bihagaze ariko ndemeza bidakuka ko u Rwanda ari rwo ruzakira imikino ya FEASSSA 2018, kuko  ni rwo rwujuje ibisabwa”.

Uyu muyobozi akaba yarakomeje avuga ko mu Ntara y’Amajyaruguru by’umwihariko mu Karere ka Musanze bahishimiye kandi bizera ko uko u Rwanda rusanzwe rutegura neza n’ubu bizeye ko bizagenda neza.

Ati:Byagiye bigaragara ko iki gihugu gitegura neza amarushanwa kigenda gihabwa, ibi ariko nanone biterwa n’imiyoborere myiza irangwa muri iki gihugu, rwose umutekano hano ni nta makemwa. Mpamaze iminsi 2, ariko nishimiye inzego z’umutekano, amahoteli yo muri uyu mujyi wa Musanze  akora neza kandi afite isuku ndetse na  serivise nziza”.

Umuyobozi w’Akarere ka Musanze wungirije ushinzwe imari, ubukungu n’iterambere, Ndabereye Augustin yasabye abatuye Musanze kuzakira neza abaza babagana. Ati:“Ni amahirwe Akarere ka Musanze duhawe, ariko cyane ku bashoramari , urumva abantu basaga ibihumbi 3 bazaba bari muri aka karere bazaba bakeneye serivise, ku macumbi, amafunguro, n’ibindi”.

Akomeza avuga ko abaturage   bagomba  kubibyaza umusaruro, batanga serivise nziza ndetse bagira n’isuku. Ati:“Uyu ni umwanya wo kugaragaza ubwiza bw’akarere kacu,  kuko dufite n’ibyiza nyaburanga abantu basura bakadusigira amadovize”.

Iyi mikino ya FEASSSA 2018 hazakinwa umupira w’amaguru, Basketball, Volleyball, Handball, Tennis, Koga n’iyindi. Iyi ni inshuro ya gatatu  igiye kubera mu Rwanda nyuma y’iyabereye i Kigali mu 2008, Huye mu 2015.  Umwaka ushize wa 2017 iyi mikino yabereye Gulu muri Uganda.

Impuguke zigera kuri 40 zaturutse mu bihugu bya Tanzaniya, Uganda, Kenya n’u Rwanda ni zo zasuye akarere ka Musanze tariki 14 Mutarama 2018. Abaturutse hanze bakaba bari bageze mu Rwanda tariki 12 Mutarama 2018.

TANGA IGITEKEREZO

Leave a Reply

Be the First to Comment!

avatar