22°C , Partly sunny | Kigali-Rwanda

Musanze: Bafatiye ingamba zikarishye abishora mu buharike n’ubushoreke

Yanditswe na Uwimana Donatha

Ku ya 09-10-2019 saa 11:03:35
Gitifu w'Umurenge wa Shingiro Muremangingo Jerome avuga ko bahagurukiye ikibazo cy'ubushoreke n'ubuharike

Ubuyobozi n’abaturage bo mu Murenge wa Shingiro mu Karere ka Musanze bafatiye ingamba zikarishye abagifite ingeso yo kwishora mu buharike ndetse no mu bushoreke.

Muri uyu murenge ngo hagaragara ubuharike n’ubushoreke aho usanga bibangamiye umuryango nyarwanda bigateza ingaruka ku bana ndetse no ku rugo muri rusange. Ubuyobozi n’abaturage bavuga ko babonye ko bikomeje gufata intera bashyiraho ingamba zikarishye.

Umunyamabanga Nshingwabikorwa w’Umurenge wa Shingiro Muremangingo Jerome mu kiganiro n’itangazamakuru, yavuze ko koko muri uyu murenge iki kibazo gihari ariko bafashe ibyemezo aho bahera ku bagore babigisha binyuze muri matsinda yabo uburyo barwanya iki kibazo.

Yagize ati: “Binyuze mu matsinda agiye arimo abagore, tubigisha y’uko umugore wa kabiri bazajya babona yagiye mu rugo cyangwa umugabo  bazajya babona yagiye ku mugore wa kabiri bazajya bagenda bagafata wa mugore wa kabiri bakamukura muri ya nzu niba yamuzanye mu gihe yabanaga n’undi mugore cyangwa wa mugabo wagiye kwinjira undi mugore asohorwa hakurikijwe amategeko”.

Amategeko avuga ko ubusambanyi ubundi ari icyaha, cyane cyane iyo byiswe ubushoreke n’ubuharike. Iyo iyo miryango ibana mu buryo butemewe n’amategeko, ngo babakangurira kujya gusezerana bakabana mu buryo bwemewe.

Avuga ko bari bafite imiryango myinshi ibana mu buryo butemewe n’amategeko igera hafi ku 1.200. Ubwo bukangurambaga bwatumye abasigaye batarasezerana bagera ku miryango 600, gusa ngo ni uguhozaho.

Muremangingo yakomeje agira ati: “Ni urugendo abantu bafatanya yaba ubuyobozi cyangwa abafatanyabikorwa ariko cyane cyane twifashisha abagore kuko ni bo bakwiye kuba aba mbere mu kurwanya bwa bushoreke.”

Bamwe mu baturage bo muri uyu murenge koko bahamya ko hari ubushoreke muri uyu murenge aho usanga bamwe mu babukora ngo baba babitewe n’ubusinzi ibyo bigateza amakimbirane.

Habimana Claude avuga ko abagabo bakora ubuharike n’ubushoreke akenshi ari ababa babana batarasezeranye, abenshi baba ari abasinzi, cyangwa barasezeranye ugasanga bafitanye amakimbirane mu ngo.

Ubushoreke avuga ko bugira ingaruka ku bana kuko usanga batandikishwa mu bitabo by’irangamimerere. Gusa ngo biyemeje guhangana n’abishora muri izo ngeso mbi.

Umwanditsi:

Uwimana Donatha

Tanga Igitekerezo

Email yanyu ntigaragazwa ku rubuga. Amazina na Email ni ngombwa.