21°C , Partly cloudy | Kigali-Rwanda
ADEPR Bukane yoroje inka imiryango itishoboye (Foto Ngaboyabahizi P)

Musanze: Abanyamadini basabwe kujyanisha amasengesho n’ibyateza imbere rubanda

Yanditswe na Ngaboyabahizi Protais

Ku ya 17-07-2019 saa 08:46:30

Ubuyobozi bw’Akarere ka Musanze, burasaba abanyamadini kujya basenga ariko nanone bakazirikana ko bakwiye kubijyanisha n’ibikorwa bigamije iterambere ry’abaturage.

Ni ubutumwa bwatanzwe n’Umuyobozi w’Akarere ka Musanze wungirije ushinzwe imibereho myiza y’abaturage Uwamariya Marie Claire, ubwo abayoboke b’itorero ADEPR Bukane borozaga inka imiryango itatu, ndetse bakishyurira imiryango 15 itishoboye ubwisungane mu kwivuza.

Yagize ati: “Gusenga ni kimwe no gukora ni ikindi, nta muntu rero ukwiye kumva ko azasenga gusa ngo maze abeho, yaba umuvugabutumwa ntiyavuga ngo azabuvuga gusa bumutunge, mboneyeho no gushimira ADEPR Bukane yahisemo gushaka ubushobozi mu gufasha iyi miryango iboroza inka, ndetse ikazirikana ko hari abakeneye kuvuzwa.

Ni ngombwa gusenga ariko bagakora no kugira ngo imiryango irusheho kubaho neza, ibi biri muri gahunda ya Perezida wacu Paul Kagame kugira ngo dukomeze kwishakamo ibisubizo”.

Uwamariya yakomeje asaba abahawe ziriya nka kuzazibyaza umusaruro, ndetse bakanazirikana ko na bo byaba byiza bagize abandi boroza.

Kamugisha Naser, umuyobozi w’itorero ADEPR mu karere ka Musanze, avuga ko mu nyigisho batanga zo gusenga harimo no gutoza abayoboke babo gukora cyane.

Yagize ati: “Ubutumwa tubagenera ni ubutumwa bworoshye kumva, Bibiliya itubwira ko udakora adakwiye no kurya, aha rero nibasenge cyane ariko nanone bakore cyane.

Nta muyobozi w’itorero wakwishimira kugira abayoboke bagenda bazungera kubera inzara n’imibereho mibi ikomoka ku mirire mibi, gukora turabyemera nk’abanyamadini, kuko umukirisitu akwiye kugira uruhare mu kubaka igihugu”.

Uyu muyobozi akomeza avuga ko mu rwego rwo gufasha bamwe mu baturage baturiye urusengero rwabo batishoboye, bahisemo kubaha inka kugira ngo bakomeze kwiteza imbere no kunoza imirire.

Bamwe mu borojwe inka bavuga ko bagiye gukomeza gukora umurimo w’Imana batekanye, ngo kuko iyo basengaga basize abana bashonje batafashwaga, nk’uko Nyirandungutse Marie Chantal yabitangarije Imvaho Nshya.

Yagize ati: “Rwose ndagira ngo nkubwire ko benshi mu batishoboye ubona mu rusengero twatahaga tudafashijwe kubera ibibazo by’ubukene, hari bamwe babona turimo turira mu rusengero bakibwira ngo tuba twafashijwe, oya ni agahinda, kuko hari ubwo uva mu rugo nta cyo kurya, umwana nta bikoresho by’ishuri afite na we waburaye, ibi bigatuma uhungabana.

Mbonye inka rero iyi igiye kuba igisubizo k’ibibazo mfite by’ifumbire n’amata, ijambo ry’Imana rigiye kujya ryinjira mu mutima utuje”.

Muri iki gikorwa cyo gufasha abatishoboye no kubaremera, hanatanzwe imashini ebyiri zidoda ku rubyiruko mu rwego rwo kurwanya ubushomeri.

Iki gikorwa cyateguwe hagamijwe gushima Imana aho ibagejeje, kikaba cyaratwaye amafaranga asaga miriyoni ebyiri n’igice.

ADEPR Bukane yoroje inka imiryango itishoboye (Foto Ngaboyabahizi P)

 

TANGA IGITEKEREZO

Leave a Reply

Your email address will not be published. Required fields are marked *