18°C , Showers | Kigali-Rwanda
Bamwe mu bagabo bo muri Musanze bavuga ko bagira ipfunwe ryo kuvuga ko bakubitwa n'abagore babo (foto Ngaboyabahizi Protais).

Musanze: Abagabo bahohoterwa n’abagore basabwe kubigaragaza bashize amanga

Yanditswe na Ngaboyabahizi Protais

Ku ya 19-04-2019 saa 12:03:10

Habimana Egide wo mu Murenge wa Nyange mu Karere ka Musanze, agira abagabo bagenzi be inama yo gushira amanga bakagaragaza ihohoterwa bakorerwa n’abagore bamwe na bamwe.

Yihereyeho, avuga ko yamaze imyaka ibiri ahohoterwa n’umugore we akabiceceka, ariko yaje kubigaragaza barabunga, none ubu babanye neza mu mahoro, urukundo ni rwose mu rugo.

Mu buhamya bwe yagize ati: “Nkanjye nakorerwaga ihohoterwa n’umugore wanjye, sinagiraga ijambo ku mutungo twari dufite, mu buriri ho twasaga n’abaturanyi kuko yiryamiraga iriya nanjye iriya rwose ku buryo haza n’undi akaharyama. Tekereza ko namaze imyaka ibiri narabicecetse ngo bagenzi banjye batazanseka, ariko nageze aho mbona bindenze, aho mbivugiye baratwunze, ubu tubanye neza, ibi bintu bituma nta terambere ryagerwaho kuko nta bwumvikane buba buhari, iyo umuti udashatswe.”

Ubuyobozi bw’Akarere ka Musanze buvuga ko uko iminsi yicuma ariko abagabo bahohoterwa mu ngo n’abagore babo bakabiceceka irushaho kuzamuka, bukabasaba kujya babivuga.

Bishimangirwa kandi na Mbonigaba Aimable wo mu murenge wa Musanze, uhamya ko bamwe mu bagabo bahohoterwa bakaryumaho, bigatuma abakimbirane yo mu ngo atarangira.

Yagize ati: “Abagabo benshi baracyakorerwa ihohoterwa n’abagore babo mu ngo ariko bakabigira ibanga bibwira ko nibimenyekana bazitwa inganzwa mu ngo zabo bakanga icyo gisebo muri bagenzi babo, ariko nta mpamvu yo guhisha ibyo bakorerwa n’abagore babo, usanga ari byo bibyara amakimbirane, ukumva ngo runaka yishe umugore we, cyangwa se umugore akakurangiza, nibatinyuke babivuge umuti w’ikibazo ni ukukigaragaza”.

Ihohoterwa ni ikimwaro kuri twe

Umunyamabanga nshingwabikorwa w΄Akarere ka Musanze Bagirishya Pierre Claver, atangaza ko abagabo bakwiye kuva ku izima bakavuga ihohoterwa bahura na ryo kuko gukomeza kubihishira ari kimwe mu bishobora no kugeza abantu mu bwicanyi mu ngo.

Yagize ati “Akarere ka Musanze kuri ubu gafite umubare munini w’abagabo bagikorerwa, ihohoterwa ni ikimwaro kuri twe, tugomba kwikuraho, ayo mateka atari meza akibagirana, kuba hakiri abagabo bakorerwa ihohoterwa n’abagore babo bakihagararaho ngo bitagaragara ko babaye inganzwa birababaje, nibatinyuke babivuge dufatanye kubaka umuryango muzima, kuko akenshi ingo nk’izi biba bigoye ko bagera ku iterambere, kandi nta soni kugira ngo umugabo abe yavuga ko yakubiswe n’umugore we kuko hari ubwo abivuga yamukomerekeje”.

Muri Gashyantare 2019, akarere ka Musanze kagaragaza ko 361 zibana mu makimbirane, muri zo abagabo bagera kuri 63, akaba ari bo batinyutse kuvuga ihohoterwa bahura na ryo barikorewe n’abagore babo.

Bamwe mu bagabo bo muri Musanze bavuga ko bagira ipfunwe ryo kuvuga ko bakubitwa n’abagore babo (foto Ngaboyabahizi Protais).

TANGA IGITEKEREZO

Leave a Reply

Your email address will not be published. Required fields are marked *